ابشتري ناقه وابي مشورتكم

السلام عليكم
ابي استشيركم يا الربع ابشتري لي ناقة اتمنحها ولا اعرف عن النياق شي وابي استشارتكم وش الاشياء الي تعيب الناقه وشي المميزات الي ادورها في الناقه
لا تواخذوني رفيكم غشيم لاكن المثل يقول الي ينشد ما يضيع
وابي اعرف وش الافضل المغاتير ولا المجاهيم ولا الحمر وهل صحيح كثر الحليب في المجاهيم وحلاوة الحليب في المغاتير
وجزاكم الله خير ورحم الله والدي والديكم عن النار

رد: ابشتري ناقه وابي مشورتكم

أخوي أبو سعد .. أولاً مرحباً بك بين أخوانك في منتدى مزاين ..
نصيحتي لك أن لا تستعجل بالشراء ودور لك من هو أخبر منك لأن السوق للأسف ما يرحم وخصوصاً الشريطية السودانية .
أما الأفضل في البل فكلها مبروكة وكلُ وهواه أما فيما يخص المجاهيم ( عشقي ) فهي أكثر حليب عن باقي البل .

ولكم تقديري .. أبوعبدالرحمن

رد: ابشتري ناقه وابي مشورتكم

صار لي اشري اكثر من شهرين مريت على عدد من الاسوق في المملكه وبما انك تدور منيح فالموضوع بيكون اسهل وعليه انصحك لا تشري من السوق ودور القنايه واهل البل اشتر ناقه من مراح لا تشري من السوق .. الكذب والغش منتشر بشكل مخزي .. وخذ معك من يبخص البل .. واشترط على راعيها سلامتها من الذيبه والبديه وقلب العصب .. ومامثل المنيح الهديه

وبخصوص النوع كانك رجال بتقابل الناقه وتحلبها صبح ومسى فخذ مجهم ترويك حليب وان كان وقتك ضيق ولا تقدر تبري ديس الناقه فابعد عن المجهم لا يخرب عليك ديسها وخذ لك وضحا حليبها اقل


والله يرزقك

رد: ابشتري ناقه وابي مشورتكم

لا أزيد على كلام أخوي ممدوح الشريـف ....

وبيض الله وجهه ووجه الاخ احمد ..

والله يرزقك بما يسرك .

رد: ابشتري ناقه وابي مشورتكم

السلام عليكم ورحمت الله وبركاته
انا ابي اشارك اخواني الافاضل بالنصيحه اولا لاتستعجل لان بعد شهرين بيبدا اولاد الابل الي اللقحات من اول الوقت اخذ خلفه وثانيي شي للعلم اول الوقت راح اتكون الخلفه غاليه فحاول اتشوفلك خلفه سعرها مناسب ولاتشتري شي الى تشرط عليها سلم من جميع النواحي واهدايه وخلهم يحلبون الناقه قدامك وان قدرت احلب الناقه معهم واشرب من حليبها وانبغيت الي اجمل عند الضيوف اخذ المجهم ولامهونه في المغتر وان بغيت اتمتع باللحليب ولذته لونه مو مثل كميت حليب المجهم اخذ مغتر وترا في بعض البل المجاهيم حليبها واجد وسكر وفي مغاتير حليبها يظاهي حليب المجاهيم بالكميه وعليك بالديد الهش الي لاجيت اتحلبه ماهو قاسي لا هش واسئل الله التوفيق لك ولي وكل مسلم

رد: ابشتري ناقه وابي مشورتكم

وعليكم السلام ورحمة الله وبركاته
او شيء الله يوفقك للناقة المبروكة
ثاني شيء الوقت المناسب للمنايح هو شهر 12 انجليزي يعني في ايام البراد حيث ان الخلفات في ذاك الوقت توّها مصاغير يعني حيرانها صغار
ودور اصحاب الخبرة في الإبل ضروري جداً جداً ولو تروح لحراج الإبل في الخرج وتشري من تحت الحراج على الشرط يعني سالمة العذاريب وهديّه ويشرطها الدلاّل
وتكون شبب من جذعة الى ثنية الى رباع الى سدس الى اول فطرللناب حيث يكون الناب خلف السداسية وتوّه ظاهر,, وهي الاعمار المناسبة للمنايح,,
وان يكون ديسها وفي روايه((ديدها)) هش سهل الحلب وعكسه ((عزوز)) يعني ثقيل كأنه ((هبر لحم)) وأن يكون شخبه غزير وعكسه ان يكون شخبه ضعيف
واحرص على ان يكون ((الديدس))
(( بعد دمج الروايتين )) متناسق ومتوسط الحجم حيث لايكون صغير كأنه ديد غزال ولايكون كبير لا يستطيع الحوار رضعه فيزيد في حجمه ويخرب عليك ديدس ناقتك
وان يكون ولدها توه جادلً سنامه من 2-3 شهور يعني لايكون حوار صغير تخاف عليه من المرض والموت ولا يكون كبير متعدي 6 شهور
ويصير حليبها مهب حلو
ومن ناحية الحليب فتختلف من ناقة لأخرى حيث بعض الإبل يكون حليبها واجد والعكس صحيح ومن ناحية حلاوة الحليب فتختلف ايضاً من ناقة لأخرى والسن له دور حيث أن الأباكيراللي يكونن اول ولدةً لها
عادة مايكون حليبهن قليل الدسم وحلو الطعم ,
ولكن يكاد اهل الخبرة على ان يجمعوا أن الحمر هي أحلى الإبل حليباً
والامر الآخر ان الطعام له دور كبير في غزارة الحليب وفي طعمه حيث ان اللي موفر لها البرسيم يجي حليبها غزير وحلو
واللي تاكل الشعير يكون حليبها اقل حلاوة
وهذا ماجاد به الوقت ولى ان شاء الله موضوع مستقل بهذا الخصوص
تقبل مداخلتي .

رد: ابشتري ناقه وابي مشورتكم

اخواني احمد الفلاح وممدوح الشريف ومشعل الشويش وعبدالله الجوفان ومشعل الغنامي الله يجزاكم الف خير ويجعله في موازين حسناتكم عزالله انكم ما قصرتو ويكفيني منكم الرد والاهتمام وب اذن الله اني باخذ بنصايحكم الي ما تقدر بثمن بس فيه واحد قالي لاتشتري ناقه وكل يوم اشرب من الي يبيعون الحليب 15 ريال والناقه بتاكل عليك اكثر وتقدر كل يوم تشرب من ناقه شكل
بس اذا شريت ناقها ما لك الا ناقه وحده تشرب منها
انتو وشرايكم في نصيحته

رد: ابشتري ناقه وابي مشورتكم

أنا اقول ياسلطان دام الموضوع على الحليب فانا عندي حل واتمنى انك تقبل به
اتمنى انك من اهل الرياض وعندي لك منايح مصاغير ساعه الاثلث وانت عندها في مراحي واعتبرها حلالك وملك لك تمناحها
واول إنتاجها بيكون بعد شهر وشوي آلساعه المباركه انت وغيرك ولاحطيناها الا نبي الدعاء
ارسل لي عل الخاص وتحت أمرك

رد: ابشتري ناقه وابي مشورتكم

ابيض وجه يالتميمي علمك غانم
لابالله الي يبيعون احسن واوفر

رد: ابشتري ناقه وابي مشورتكم

اخوي محمد الوهبي التميمي
جعل والديك في جنات النعيم ولهيب غريبه عليكم يا بني تميم الكرم والجود والنخوه وعسى الله يبارك لك في حلالك وتشوف منه مايسرك وجعل المال والعيال خدامك
هذي مني لك والله ان دعوة اخر الليل ما تنقطع مني لك لانك وفيت وكفيت

رد: ابشتري ناقه وابي مشورتكم

طلبك موجود

وترا ماني شريطي

واسطة خير فقط

والله يوفقك

اذا لك رغبه اتصل بي على هذا الرقم
0551101112

رد: ابشتري ناقه وابي مشورتكم

علمك غانم يالتميمي ولا هي بغريبة

كاسب اجر وجمالة