الفحل الباكستاني

مسيكم بالخير يالربع وكل عام وانتم بخير :
عندي سؤال ,,
وشهي عذاريب الفحول الباكستانيه !! ووشهي ايجابياتها
وهل تنصحون اقني لي واحد !!
لقيت لي واحد في السوق راسه كايف لكن تقاصرت جرمه

رد: الفحل الباكستاني

مسيت بالنور والرضى يامحمد بن نوار
اول عذاريب الباكستاني عند اغلب العرب يقولون تقعد فالمرحان ماهيب بدويه وهذا قول دارج عند الاغلبيه
ان جيت لطيبها فوالله ماودك تصد عنه ولايردك عنه غير الانتاج ورديها ماينبغا بريال000
وانا خابرلي رجال طلع بنفسه لباكستان وابطى ماحصل مطلبه وهوراعي نظر لين الله وفقه برجال ذكرله بعير في افغانستان وشراه ودخله عن طريق قطر والبعير اجمعوا جميع من شافوه على طيبه وهو عند رجال مايلحقه لوم اول وتالي بيض الله وجهه بياضن كلن يشوفه مايرد عنه لابعيد ولاقريب عبدالله بن خجيم المري ونعم لين تقوم الساعه بهاك الوجه ولاتسده وابشرك انتج انتاج ن طيب وعهدي بوحده من بنات البعير عليها 250000اتمنى اني افدتك

رد: الفحل الباكستاني

لا يطيح الباكستاني بابلك ان طعتني
ودور لك بعير تفرح بانتاجه ويسر خاطرك بدون خلط او تهجين
والابل الباكستانيه تدبل كبدك في الشديد وفي المسراح
والسر الباكستاني مانفع كبار ملاك الابل وانا بنفسي شايف تهجين في مزارع حول مدينة الخرج لملاك كبار لابل باكستانيه الميه يجي فيها ٥ زيان
والباقي قصب
وجهت نظر ثمثلني أنا وهذا رأيي

رد: الفحل الباكستاني

الباكستانيه من ناحيتي انا كانن عندي ثنتيه2 حمر شريتهن خوات علشان روسهن طيبه وجرومهن وليتني ماشريتهن والله انه علتن بكبدي اذا شديد بلشت فيهن يالله تمشي وترعى وتمشي على مهلها كنها تبي تغثك والوضح تروح وهن باقي نحوشهن بسياره والعلف تاكل ماتشبع ولاتسمن وابشرك بشاااره اني بعتهن

رد: الفحل الباكستاني

لو كان فيها خير كان ما خلاها الطير باكستاني وش حدك عليه

رد: الفحل الباكستاني

اشرد من الباكستاني وانا اخوك ولا بتشوف اللي انا شفته

رد: الفحل الباكستاني

الباكستانيه ماتنفع ابد وعذاريبها واجد وثقيله ولاهي مرايه

رد: الفحل الباكستاني

الله لا يهينكم جميعاً من اثراء هالحوار ونستخلص الاتي في عذاريب الفحول الباكستانيه:
1- تدبل كبدك في الشديد وفي المسراح
2- الميه يجي فيها ٥ زيان والباقي قصب
3- تاكل ماتشبع ولاتسمن

بينما ايجاباتهن الاتي:
1- روسهن طيبه وجرومهن

رد: الفحل الباكستاني

تبي الراي يا ابن الأجواد .. ولا قصور بالأخوان ... ان كانك تدور المقنوي والوناسه فابعد عن الباكستاني واتبع شور الاخوان ....

وان كانك تبي الأنتاج ورجال تقدر تشري الغوالي من الضرايب وتهد فيها الفحل الباكستاني ( اللي لونه مثل الغراب - وعيزه عيز مجهم -وغاربه بحر- ولافيه عنجه - وراس ورقبه كايفه ) فابشر والله بالسنع والملايين

انا ما اقول هذا الكلام عرف مني والا اجتهاد اقوله شوف العين طال عمرك ... شفته بعيني في ابل هامور في الخرج ضرايبه من ابل الصخابر .. ولقيت فحول باكستانيه من ابل ال سعود عند ناجي الدوسري حول جرش في الرياض وغيرهم واجد ولا شروها الا تهجين جيل اول وجيل ثاني ثم يباع الباكستاني ويهد المجهم الفاخر في بنات الباكستاني المهجنه .... وتعال وشوف عقب الأنتاج الفاخر

ورح تنشد عن بعض اشهر الفحول في الخليج تلقى فيها سر باكستاني لكن الموفق من وفقه الله ورزقه في الخلطه الطيبه

والله يرعاك

رد: الفحل الباكستاني

الفحول الباكستانيه نوعين
نوع ردي العظم والظهر والها معنق شين تقول طير الماء
ونوع عظامها وظهورها طيبه ولحيها طافحه والوانها طيبه واشوفها فحول
بالنسبه للون اهم شي مايقربها الزراق
تقبل تحياتي

رد: الفحل الباكستاني

الفحول الباكستانية انواع منها ألي يبط مرارتك ومنها الوسط يحذف من العشر 2 الي3 طيبات ومنها الفاخر الي اكثر البيع والملاين منها وام أرقيبة اكبر دليل طول عمرنا وحنا في الايل ماشفنا مثل الزين لاحد يكذب نفسة وهذا الصدق انا أعرف رجل اعمال وأنتوا تعرفونه عدل جاب فحل من باكستان وهده في أبل عجلات والوبره عكشة والظهور متفهقات وساعدهم البعير براس والعرقوب وفج النحر والرقبة الرقاق وانتج منهن بكار والبكار هد فيهن بعير جودي وزين وانتج وقام يبيع باملاين والبعير الباكستاني مات وللعلم انتاجه كله داخل المزرعه ومحد يدري عنه .

رد: الفحل الباكستاني

ابعد عن الباكستاني وتربح