ابي رايكم بالناقه بيض الله وجيهكم

السلام عليكم ورحمة الله وبركاته،،، حياكم الله ياخوان وشكرا لكم مقدما..عندي ناقه خلفه ام ثاني تحتها قعود الناقه مابطيت شاريها وهي الله يطول اعماركم نحوس بعض الشي وبالغصب تحلبها اوتنوخها وقبل كل هذا اذا جاها احد قرب منها تشاور بذيلها وتبدا الله يكرمكم تبول وتدمن وترغي وقلت اعرضها على فحل وشاورت له من بعيد ماتبيه علما ان اللي شريتها منه ماقالي لقحه والا لا..مادري وش علتها وهل هي بهالمواصفات تكون لقحه والا لا..نبي منكم العلم وجزاكم الله خير،، اخوكم ابوعبدالله

رد: ابي رايكم بالناقه بيض الله وجيهكم

وعليكم السلام ورحمة الله
مراااااااااااااحب اخوي احمد

أتوقع والله العالم ان جميع ماتراه مجرد خوف .

الفحل أدرى بها طال عمرك ..
فك البعير عليها وهو أبخص .

رد: ابي رايكم بالناقه بيض الله وجيهكم

وعليكم السلام ورحمة الله وبركاته
اذا الناقه لسقتها تشاول وتمشي للبعير لقحه
وعلى كلامك انها تهج من البعير
اتوقع أن الناقه منخرعه
ولهاج البعير بيطلعه لك
متمني لك التوفيق

رد: ابي رايكم بالناقه بيض الله وجيهكم

بعض البل تشاوول خووف

اعرضها على البعير لاهاج وهو اللي يطلع علمها

رد: ابي رايكم بالناقه بيض الله وجيهكم

كلام ساجر صحيح
واضيف عليه انت تقول ترغي
واللقحه ماترغي بالهين وسلامتك

رد: ابي رايكم بالناقه بيض الله وجيهكم

ناقتك فيها راعه فقط

ومثل ماقال عيد اللقحه ماترغي

رد: ابي رايكم بالناقه بيض الله وجيهكم

بالمواصفات هاذي ماهي لقحه
وفقك الله

رد: ابي رايكم بالناقه بيض الله وجيهكم

كفيتو ووفيتو وكلاكم يقنعني بيض الله وجيهكم يالنشاما،،، وبعد اذنكم نستمر بشوف المزيد من العلوم اللي اصحابها يمكن مادخلو.

رد: ابي رايكم بالناقه بيض الله وجيهكم

ما قصروا الاخوان مثل ماقالوا لك البعير بيطلعها
حدها على البعير وخله يكرفها اذا وقفت له وقفت ثقه ولا تحركت وارفعت راسها فوووووق وشاولت مضبوط يعني اعقدت ذيلها وقلبت عيونها لقحه بأذن الله
لكن اذا تشاول مشاول خفيف و لا وقفت للبعير و قامت تجتر وهي تشاول ولا رغت ماظنها لقحه
تشاول خووف مثل ماقالوا الاخوان وهذي الناقه تقول انت انها نحوس اكيد مضروبة قبل كذا ومروعه ولما تقربون منها تشاول من الخوف تبي السلامة