ماخاب من استشار ..

السلام عليكم ورحمة الله وبركاته

يا عيال الاجواد عندي بكره مفروده على الازهر .. البكره طيبه وسيمت وعمرها 4 اشهر بسبعين الف ولا فكرت ابيع

والحين عليها عرض من احد ملاك الابل بدل بقعود حق ساس وراس عليه اسوام عاليه

واحترت انا امسك بكرتي والا ابدل بالقعود علما انه طيب جدا جدا

قلت استشيركم وهذي مجموعة صور للبكره وهي حواره وصور حديثه وهي مفروده ... ومن استشارك دخل ذمتك

رد: ماخاب من استشار ..

مرحبا بـك ياممـدوح ..
استشـر واستخر اهم شي الاستخاره وانا اخـوك ..ماتدري وش الخيره فيـه .
أما حسب نظرتي للصور .. ( وانا احكم على الصور .. وحكم الصور قد يختلف عن الطبيعه )
اشوف أن البكره طيبـه فوقها بكرتين وتحتها واجد فوقها بكرة المزاين الكايفه العواشـه .. وفوقها الفرديـه النادره
والبكره أصلها طيّب جداً .. ويتطوّر للافضل ولو تصوّرها ليا جت حقّه يبي يجي لها شكلً غير ..
الراس طيّب اذن وخده وعرنون ولو أن كنّي تصاغرت مقدم وجهها من العين وقدام وعليها وبرةً حرشاا .. وحلا .. وغـلا ..
والرقبه مااتضحت كذلك عرقوب البكره وعظاها وومشاها وسنادها هذي أمور مايحكم فيها ألاّ اللي واقفً عليها
أما السعر فـ اسوق أن الـ70 ألف اللي سيمت بها وهي حواره وافيـه فيها وهي مفروده .. وجهة نظر
أما القعـود مانقدر نقول أخذ القعـود أو لا ولانقدر نحكم على الشي اللي ماشفناه .. وسلامتك

رد: ماخاب من استشار ..




انا من وجهت نظري انك تشوف القعود واذا كان طيب
اقبل البدل لان القعود ينتج بدال البكرة ذي عشر

رد: ماخاب من استشار ..

مرحبا اخوي ممدوح كان صورة القعود عندك اعرضها او ارسلها على الجوال وبنعطيك اللي في ذمتنا اللي يبرينا قدام الله .

رد: ماخاب من استشار ..

الله يوفقك يا ممدوح وانا اقول لاتستعجل اذا حصل لك تصور القعود هذا شي جيد على شان نقوم با الاجتهاد لك والله الموفق .

رد: ماخاب من استشار ..

[QUOTE=محمد ابو عدوة;607369]مرحبا اخوي ممدوح كان صورة القعود عندك اعرضها او ارسلها على الجوال وبنعطيك اللي في ذمتنا اللي يبرينا قدام الله .[/كلام في الصميم

رد: ماخاب من استشار ..

الله يجزاكم خير بحاول اجيب صوره للقعود علما ان راعيه يقول عليه سوم 110

.............................

اللي مخليني اتردد ان انتاج القعود علمه عند خالقه وساسه مالي الا كلام راعيه ولا اجزم على شي .. واقول لو اخلي بكرتي عندي سنتين ان شاء الله واضربها على ركاب طيبه وان شاء الله تجيب لنا الفحل اللي نضمن ساسه

والمستقبل والرزق علمه عند عالم الغيب والشهاده .. الله يختار لنا ولكم مافيه الخير والصلاح

رد: ماخاب من استشار ..

مرحبا بـك ياممـدوح ..
استشـر واستخر اهم شي الاستخاره وانا اخـوك ..ماتدري وش الخيره فيـه .
أما حسب نظرتي للصور .. ( وانا احكم على الصور .. وحكم الصور قد يختلف عن الطبيعه )
اشوف أن البكره طيبـه فوقها بكرتين وتحتها واجد فوقها بكرة المزاين الكايفه العواشـه .. وفوقها الفرديـه النادره
والبكره أصلها طيّب جداً .. ويتطوّر للافضل ولو تصوّرها ليا جت حقّه يبي يجي لها شكلً غير ..
الراس طيّب اذن وخده وعرنون ولو أن كنّي تصاغرت مقدم وجهها من العين وقدام وعليها وبرةً حرشاا .. وحلا .. وغـلا ..
والرقبه مااتضحت كذلك عرقوب البكره وعظاها وومشاها وسنادها هذي أمور مايحكم فيها ألاّ اللي واقفً عليها
أما السعر فـ اسوق أن الـ70 ألف اللي سيمت بها وهي حواره وافيـه فيها وهي مفروده .. وجهة نظر
أما القعـود مانقدر نقول أخذ القعـود أو لا ولانقدر نحكم على الشي اللي ماشفناه .. وسلامتك

بيض الله وجيهك يا اخ مشعل على الراي الوافي وانا اوافقك الراي

بخصوص البكره .. بالنسبه للعرقوب والهزاع والفجحه والسناد والغارب والجنب فهي رقم واحد... ولا استغني عن رايك بعد ما تشوف هالفديو رغم انه قديم وعمرها شهور والبكره زانت اكثر

http://www.youtube.com/watch?v=g_N_LZqGIqI&feature=channel

وشوف ممشاها وفجحتها وسنادها وعلمني هل فيها شبه بأختها النادره الظفره ..

http://www.youtube.com/watch?v=4RehQcCoRkM

رد: ماخاب من استشار ..

صدقـت ياابو احمـد ..
البكره عظاها وافي .. من جل عظم وعرقوب وفجحه ( شولاً مواطيها ثقال ) .. الله يبارك فيها .
أما المقارنه مع اختهاا ( الظفره ) فالمقارنه معها صعبـه جداً .. ولكن قد يكون هناك ( وجه شبـه ) بينهن فالعظا والممشى والجنب خصوصاً لاعقّبت بكرتك اللقيـه ,
والظفره فيها ميزه صعب تلقاهاا .. وهي أنه على طفاحة لحيهاا عليها ركزة خشم صعبه جداً ..
وبكرتك اتوقـع لها مستقبل زاهـر بإذن الله خصوصاً لاطلعت من الحقـه للقيّـه ..
...
ان كانك بتصوّر القعـود وتعرضه هناا فياليـت تستأذن من مالكـه وبعد الاذن تنزّل الصور ياممدوح لإن قوانين المنتدى لاتسمح بذلك ...
...

رد: ماخاب من استشار ..

اخوي ممدوح

انا اقول ان البكره ذي بتظهر وعلمها عند خالقها ...

البكره ذي طيبه وقيمتها اكثر من سومة القعود بواجد ( وجهة نظري) وأنصحك تقضبها الين تعقب سهيل حقه وتبي تلقى الكلام

وبالنسبة للازهر غني عن التعريف بإنتاجه الله يبارك لاهله فيه

وتقبل مروري

رد: ماخاب من استشار ..

الاخ ممدوح البكره طيبه وبتظهر لك ان شاء الله
واذا جات جذعه والا ثنيه نوخ عند ركاب الرجال اللي فيهم خير وزمولهم منتجه وبتعين خير ان شاء الله.

رد: ماخاب من استشار ..

بيض الله وجيهكم جميعا ورحم الله والديكم ..

الأخ مشعل يوم اقول قارن حددت انا اخوك الممشى وعظى البكره ... اما الراس فلا شك ان الظفره اطيب

...................

وابشركم استخرت عن البدل .. هاليومين اللي راحت وانا ادور ام القعود ولا عينتها وهونت ..

جزاكم الله خير

رد: ماخاب من استشار ..

جوّد بكرتك ابرك

الا كان القعود يشبة قعود ال فاضل ولد وحيدان ولا لا تفك بكرتك

بغض النظر عن زين بكرتك وشينها

اما الظفرة ناقة طيبة نادرة وعليها مدخل .. وهو حجم الراس صغير

اما باقيها مامعها لحام

وسلامتك

رد: ماخاب من استشار ..

بيض الله وجيهكم جميعا ورحم الله والديكم ..

الأخ مشعل يوم اقول قارن حددت انا اخوك الممشى وعظى البكره ... اما الراس فلا شك ان الظفره اطيب

...................

وابشركم استخرت عن البدل .. هاليومين اللي راحت وانا ادور ام القعود ولا عينتها وهونت ..

جزاكم الله خير

الخيـره فيما اختـاره اللـه

وابشر بخير

وأسأل الله أن يرزقك من واسع فضلـه ..

..

رد: ماخاب من استشار ..

الـــــبـــكــــرة طــــيـــبـــة و فـــي رجـــــــا خــــــــيــر