ابرة الجرب واللقاح

السلام عليكم ورحمة الله وبركاته

يا اخوان عندي ناقه شريتها حايل وتعبت عليها عدة اشهر وبعد توفيق الله تعالى عشرت ولله الحمد والمنه ..

المشكله انه من اول عشارها جاها جرب ولها فوق الشهرين .. وعندنا بيطري يقول الدكتامكس ما تضر اللقاح وبيطري ثاني يقول اي ابره قبل 3 شهور احتمال تضر اللقاح

الان نغسلها بجاره وندهنها بكريم الجرب ولكنه زايد فيها جدا

ولا ودي اغامر بالابره وتكسر الناقه ..

حد عنده شور من خبره

والله يرعاكم

رد: ابرة الجرب واللقاح

عسى الله يعطيك منها ماتسر ويصمل بلقاحها
انا سمعت دكتور يقول ماتضر الفرنسيه الزرقاء في اللحم شرط ماتزيد عن 9 مل وتعيدها عقب عشرة ايام
ودكتور ثاني يقول الا تضر واي ابرة اي كانت احتمال 10% تفيخ
لكن عن تجربه ماجربت انا .. وفي احد الاعضاء ذكر في احد ردوده انه طق الابل المعاشير كلها بايرة الزرقاء الفرنسيه للجرب ولافيخ شي منها..موضوعك محير الله يعينك استخر والخيره فيما اختاره الله

رد: ابرة الجرب واللقاح

بعد شهرين مايضر 10 ملي الزرقاء على ان تعاد بعده ب 15 يوم 10 ملي اخرى
عن تجربه

رد: ابرة الجرب واللقاح

عسى الله مايضيع تعبك

ويتمم لقاحها على خير

انصحك بإستخدام كريم الجرب لين تعدي الثلاثه شهور الاولى على الاقل بعدها بإمكانك تستخدم الابره اللي ذكروها الاخوان وقلل النسبه الى النصف يعني خلها 5سم
وتكررها بعد عشره ايام

اما بالنسبه للجره انصحك بعدم استخدامها للجرب لأنها عباره عن سموم وحاره جدا على جلد الناقه مع ان الجرب لوحده يسبب حكه وتهيج للجلد

ابعد عن الجره واستخدم الكريم + استخدام الطب الشعبي , على اقل تقدير ايقاف انتشار الجرب في الناقه الى ان تعدي مرحلة الخطر بعدها استخدم الابره

رد: ابرة الجرب واللقاح

من واقع تجربه تظر العام ضربنا بكر معشر لها اكثر من شهرين او اكثر واصعدت الناقه .مع العلم اللي طاقه طبيب بيطري ويقول متظرش ولاكن ماصدق . نوع اوفمك امريكيه .والله يقديك للصواب ويستر على ناقتك .

رد: ابرة الجرب واللقاح

ياممـدوح .. أنت تعبـت .. واضربـت المبروكه ولقحـت .. فلاتقربها بالابره نهائياً أيّاً كان نوعهاا ..
فدون ستة شهور لقاح عليها خطـر ..
انا عندي ناقـه شريتها حايل ولقحت ولله الحمد ولها حوالي الـ 6 اشهر وجاها جرب .
ولكن للاحتياط ماطقيتها ابره نهائياً .
أخذت الجاره قوة10 % واضفت لها الماء وغسلت اماكن الجرب واحياناً ارشها بالبخاخ كل 3 ــ 4 أيـام ..
وفعلاً نجحت الطريقـه .. وماتت البكتيريا والفطريـات .. ونبت شعر الناقـه وهي الآن من احسن مايكون ولله الحمد .
..

رد: ابرة الجرب واللقاح

المغامرة شينة يابو أحمد
وتوافيق من الواحد الاحد

انا قبل سنتين عندي ناقة جاها جرب ولها شهر ونص معشر
وضربتها أبرة جرب ديكتوماكس الزرقاء
والحمد لله ماجاها شي ..
والسنة هذي ضربت حوالي أربع نياق معاشير بأبر جرب وهيام
ولاجاهن الا العافية ..
والله ييسر أمرك في الدنيا والآخره وانا أخوووووك

رد: ابرة الجرب واللقاح

ابو احمد الغسيل كافي
وفي الصيف يروح الجرب اذا غسلت الناقة
واذا تخلط الزيت مع الجاره والملح وتدهنها يكون افضل

رد: ابرة الجرب واللقاح

ابره الجرب الدكتوماكس الفرنسية ماتضر ان شاء الله بعد ثلاثه اشهر من اللقاح لكن في الفتره الحاليه لا تقرب الناقه ترى اذا ماضرتها الابره ضرها الطرح خلك مثل ما قالولك الاخوان بالعلاجات الخارجية ولا تستعجل على الابره

رد: ابرة الجرب واللقاح

ارحب يابو احمد
موضوعكم مسير على خيمة البرقاوي وابو عدوه وتارك خيمة الراوي
بس الاصل واحد وهو الفايده
البل كلها عندي داقها الافوميك الامريكي والقحات فيها ١٠ والمعاشير ٤
ولاضرر ولله الحمد
واللي تحت الجلد مامنه اي مضررررره
تقبل مروري

رد: ابرة الجرب واللقاح

جزاكم الله كل خير وبارك لكم في حلالكم ومالكم

قررت اعزلها واستخدم علاج خارجي واخلي الابره حتى يتقدم لقاحها

شاكر مقدر للجميع اشواركم الطيبه

رد: ابرة الجرب واللقاح

مع الاخ محمد التميمي

رد: ابرة الجرب واللقاح

مرحبا بك ياممدوح ,, الشتاء اللي زل عندي معشر لها شهرعلى ولد الوافي وبدا فيها الجرب شي بسيط وعطيتها ابرة جرب الزرقاء 20سم ولا ضرهااا والحمد لله راح الجرب والناقه تم عشارها .. وبالعكس الجرب بيخلي الناقه تفيخ ,,

رد: ابرة الجرب واللقاح

اللي تحت الجلد اردنيه تعالج ولا تضر مجربها ما شفت منها الا كل خير و الجرب اذا طول يذبح الناقه توكل على الله واعطها 15تحت الجلد ولا تكرره بتزين انشاء الله.

رد: ابرة الجرب واللقاح

الأفضل مثل ماقال بعض الأخوان تجنب أبرة الجرب بأكملها لأن بعض الأبل حساس مهما قلت النسبه.

لاكن أستمر بالجره رشها قبل المغرب بوقت قصير أو بعد المغرب علشان تنطح البراد والجره لها مفعول قوي ضد الجرب.

والله يبارك لك بحلالك ومالك.