الجفال .. أسبابه والعلاج ؟ ياهل البل

السلام عليكم ورحمة الله وبركاته ك


ياجماعة الخير البل فيها جفال خلال الشهرين الماضيه جفلت يمكن خمس مرات

ومره او مرتين كان سبب الجفال على كلام الراعي من لعب البكار ويازينهن ويازين لعبهن

وبعطيكم علوم البل لعل وعسى نلقى عندكم الحل

اول شي البل كلها شرايا بعضها العام وبعضها السنه هذي

فيها قعدان وبكار ولقحات وخلفات

لها في مراحها الحالي سته شهور

ترعى في وادي على بعد 2 كيلو اوثلاثه

والبل مامعها رحول

والجفال يجيها مع المسراح الصبح

وتجفل في اتجاه مرعاها وتعداه تقريبا 10 كيلو ومايردها الا الله ثم الجبال

بداية جفالها كان بداية صيد الرهو وكان طريقه يمر من حول البل والقنوص واجد دقوا الارض عندنا اللي يتفرج في البل واللي يبغى حليب واللي يبغى رقم الراعي عشان يعلمهم في الطير اذا جاه
وكان فيه رمي على مسافة 2 كيلو والحمدلله اللي كفانا شرهم

البل كان يمرها ناس اعرفها ونا مااعرفها (وعين الحسود فيها عووووووووووووووووود)

والراعي المسكين اليوم جفلت دق يصيح يقول البل جفلت والصراحه اليوم فكرت بجد اشتريله دباب اربع كفرات والدباب ارخص من الرحول ولاياكل ولايشرب هههههههه

عطونا رايكم الله لا يحرمكم الاجر

والسلام ختام

رد: الجفال .. أسبابه والعلاج ؟ ياهل البل

اولا / اخر المسراح لين يطيح اللي في روسها الى الساعه 9

ثانيا / اعزل الدق من مفروده وحقه لا تسرح مع الجل لين تعود الجل على الركود

ثالثا / الرحول ضروري وابرك من الدباب الي بيجيب لها الجنان زود بيطري على الابل صوت الدنه وبتستجن زود

رابعا / الخبز من فوق الرحول يعطي الراعي الابل تراه (عقال الابل ) ويزين الطبع

خامسا / شف الناقه الي تهج الابل ذرع لها ولا اعزلها في الشبك وامنها من السرحه لين تهدا

وقبل كل شي مر ابلك وتاكد من ان ابلك فيها هجيج ترى الرعيان يكثرون الحجج عشان يخلص من السرحه

رد: الجفال .. أسبابه والعلاج ؟ ياهل البل

اضافة الى ماذكره اخي ابوفالح حاول تجي وسط الابل وترفع الصوت بالاذان شي مجرب

رد: الجفال .. أسبابه والعلاج ؟ ياهل البل

البلا في الوادي والقنوص اللي يجون الوادي والعااامل بعد وهو عادةً في فصل الصيف دااايم يجي وشر الى جاء ويتعب راعي البل ويضيق صدره


وإضافةً إلى ماذكره اخي ابو فالح

دور لها خد نفااااااااه (عبله) سعه تمد الشوف فيه وانزل فيه وعطها كبريت (الحصى الأبيض) نقعه في الماء يقولون زين للجفال

وان شاء الله ماتشوف الجفال

رد: الجفال .. أسبابه والعلاج ؟ ياهل البل

ماقصر خالد الفالح

وابلك اللي فيها ماهو جفال إبلك اللي فيها فسقه ولعب مع المقهور

الجفال مرض ان صاب الإبل كسرها وبهذلها ولا تعينها

رد: الجفال .. أسبابه والعلاج ؟ ياهل البل

حياكم الله

وشرفني مروركم الكريم

والاستنتاج من جميع الردود ان الحل هو مايلي :

1- الرحول
2-المسراح المتأخر
4- الاذان وسط البل
5- ان اللي في البل ماهو جفال بل هو لعب وفسقه على قولة ابو ذيب

رد: الجفال .. أسبابه والعلاج ؟ ياهل البل

ولايهنون أخواني حط فيها حصان والا فرس أصل عربي الانجليزي مايعرف البل خواجه ههههههههه ولا هجت خل الراعي يركب وراها ولا يفك الحصان ومن حين توحي دبك حوافره الله وكيلك ماعاد تدري وين تروح وبأذن عقب ما عاد تجفل لوترمي جنبها دبابه ان شاء الله والحصان كلما كان صغير احسن يدرب على الابل ويعرف العلم

رد: الجفال .. أسبابه والعلاج ؟ ياهل البل

ولايهنون أخواني حط فيها حصان والا فرس أصل عربي الانجليزي مايعرف البل خواجه ههههههههه ولا هجت خل الراعي يركب وراها ولا يفك الحصان ومن حين توحي دبك حوافره الله وكيلك ماعاد تدري وين تروح وبأذن عقب ما عاد تجفل لوترمي جنبها دبابه ان شاء الله والحصان كلما كان صغير احسن يدرب على الابل ويعرف العلم

نعم الراي والحصان موجود عند اخوك تستاهله
الجفال يكون في بدايت سهيل بالتحاه الشمال اذا صار الطعام مر يزيد ومر يقل وخيلت البرق عطايا الله صارت تجفل و مع بدايت الصيف في الوقت اللي ذكرته تجفل للجنوب او الغرب حسب موقعها تبي المقيض او مخيله برق وتبي الحيا والله اعلم وفيه اخبر منا بالموضوع
اما كيف توقفها وتنسيها
اول شي الجفال ما يطول حده اسبوع بالكثير واحسن شي القيد و الشبك الى ما بعد الظهر
وشف مكانك فيه شي مضايقها مثل كثرت الناس وصوت المعدات والحكره والنامس و الطعام الملخبط وترى رعي وطعام ما تضبط ركز على احدهم والثاني مساعد وانت اخبر.

رد: الجفال .. أسبابه والعلاج ؟ ياهل البل

كفو والله يابوساعد

وبيض الله وجهك

رد: الجفال .. أسبابه والعلاج ؟ ياهل البل

وانا اخوك حطلك شبك وعزل الدق فيه

وحط للبل كلها ملح مقري فيه

والابل لاتسرح بدري اخره لين الساعه 9 او 10 عشان يطيح الي في روسها

واما الرحول لابد منهااا


تقبل مروري

رد: الجفال .. أسبابه والعلاج ؟ ياهل البل

بسم الله الرحمن الرحيم
الجفال سببه الجن ولا يحضرن الحديث الذي عن الرسول صلى الله عليه وسلم
أول شي فارق الوادي وبتعد عنه والسبب تكثر الجنون بلوادي
ثانياً جبلك مطوع يقرا على الابل و حط بلحوض ملح مقري
ثالثاً اهجر الحيران كلها
رابعاً رش المراح بماء مقري به
خامساً متمني لك التوفيق

رد: الجفال .. أسبابه والعلاج ؟ ياهل البل

أرسل الموتر وكلمني على0541611154
أو اوصف لي مكانك ويجيك الى عندك وانت تتسناهل وجهك ابيض
وان صورت لنا فديو وانت تركض به وحطيته نشوفه كرم منك وانكانك شيبت معذوووووووووووووووووووور
ههههههههههههههههه

رد: الجفال .. أسبابه والعلاج ؟ ياهل البل

الاخوان وفوا وكفوا وانا جربت الشب اسقيها عليه ونافع باذن الله للجفال لان الجفال من الجن والشب علاج له

رد: الجفال .. أسبابه والعلاج ؟ ياهل البل

عليك بالفرس وأنا أخوك ترى مجربه وهي العلاج الاول بإذن الله ،،