علاج اكل الوبر في الابل ...؟

سلام عليكم ورحمة الله وبركاته .. اخواني اعضاء المنتدى اتمنى ان تكونوا جميعكم في صحه وعافيه وامن وستر ..

بغيت رايكم في الابل اللي تاكل وبر بعض ( تنتف من بعض الشعر ) .. وهي ابل واحد من جيراني ولم يجد لها حل .. وهو يعطي الابل ملح من الاحمر والاصفر ويعطيها شعير ورودس ..

ارجوا من لديه الخبره في العلاج او الحل لايبخل علينا ..جاري متضايق بالحيل ..اسال الله ان يبارك لكم في حلالكم
انتظر الرد .. وجزاكم الله خير

رد: علاج اكل الوبر في الابل ...؟

وعليكم السلام ورحمة الله وبركاته

اقسام المنتدى فيها الكثير من المواضيع عن هذه المشكله وبالنسبه لي فحلها الوحيد ان البل تسرح اقل شي 5 ساعات في اليوم وتطيب خطرها وتترك هالعاده

شبكت البل في الشتاء اللي راح وقامت تناتف وعودت سرحتها اسبوع زمان وتركت هالطيع الامحق

رد: علاج اكل الوبر في الابل ...؟

ارحب ياحاتم
مشكلة اكل الوبره والدمن هي عاده قبل كل شي
فيه طرق جربت ونجحت
1- غسل الابل بجاره خصوصاً شعفت السنام والجنب
2-تجليل الناقه او عزلها ان صارت على وحده او ثنتين
3-وضع مسحوق الفلفل الحار في زيت ودهن السنام والجنب
تقبل مروري اخي حاتم

رد: علاج اكل الوبر في الابل ...؟

الاخ حاتم
بعد التحية

الابل تأكل وبرت بعضها وقت سقوط وبرتها فقط وذلك لنقص الاملاح في الجسم وانصحك بأعطائها الملح الازرق وحلق وبره الابل لان اكل وبره الابل تتكون كور في بطن الناقة تودي لهزل اوانسداد الامعاء وتمنع اكل الناقة لانها تحس أنها دائماً شبعانة

رد: علاج اكل الوبر في الابل ...؟

جربت الحدج يفرك على شعفة السنام
ومن يمينه ويساره وآخره والغارب
ونفع بأذن الله تعالى

رد: علاج اكل الوبر في الابل ...؟

هذا رابط لعضو يشكتي من نفس المشكله وتمت الاجابه من الاعضآء جزاهم الله الف خير
http://www.mzayan.com/vb/showthread.php?t=47316

وبالنسبه لي انصحك بالعلاج ذا :-

عبدالله حمد العتيبي


هذا ياخوي نقص املاح في البل ..
في علاج عند البيطري والله مدري وش اسمه بس هو بودره تحطها مع الشعير وهو يعوض الاملاح الناقصه !
وان حصل شراب الديدان في حوض البل .. للبل كلها ترى ماهي شينه !

عبدالله الثمالي

ابد مر البيطري وعنده بودره تحط مع العلف ويروح منها هالطبع انا مجربها العام ونجحت

هذا سبته نقص الاملاح والمعادن والسبب عدم التنويع فالاعلاف والحكره عن المسراح

الموضوع : لعجوم تاكل وبرت بعض
المنتدى : عيآدة مزاين البيطريه
الكاتب : راشد بن سعد

رد: علاج اكل الوبر في الابل ...؟

الحل انه يحلقها بالمكينه وانكانها ابل مزاين يلبسها اجله

رد: علاج اكل الوبر في الابل ...؟

الاخ حاتم هذا مهو مرض عشان تدور له علاج
هذي وانا اخوك طبيعه ولها عدة طرق يستعملونها الناسوبعضها تصيب وبعضها تخيب
لاكن ان كان اللي تنتف ناقه او ناقتين ياانك تعزلهن وكل وحده في شبك او انك تجللهن
ام انكان الابل اللي تاكل وبرتها واجد يقولون الناس الي صابتهم المشكله هذي مالك الا مسحوق الفلفل
الاحمر تخلطه بشوية ماء وتمسحه علي جنوب الابل
وشعفه السنام

رد: علاج اكل الوبر في الابل ...؟

هذا المرض سمعت انه اول ماطلع عند هل مزارع الاغنام ويحطون لها طابوق املاح الابيض الاسباني
وهو خاص للمرض هذا وتترك النتف يوم تحصل الطابوق الابيض .. والاملاح الابيض خاص للمرض حتى يوم تسال البيطري ليش الابيض
عندك في المحل قال للغنم اللي تنتف بعضها .. لكنن ماتلقاه عند اي بيطري الا اللي حوله ديرة غنم .. الشاوية

رد: علاج اكل الوبر في الابل ...؟

اكل الوبر نقص املاح وديدان في البطن حط لهن البصل والثوم في المعالف حطه علي حاله لين يتعودن عليه واطلقهن من الشبك وان قدرت تجي في مكان فيه شجر او ارطا نــعومك وسرحهن يومي اقل شي 5 كيلوا والله ينفع به ..

رد: علاج اكل الوبر في الابل ...؟

انا لقيت واحد حاط على شعاف الابل زيت محروق وسالته قال لي على شان ماتاكل وبرة بعضها مع العلم ان ابله سمان بالحيل ويقول بعد الزيت المحروق انقطعت هذه العاده وانا صراحه اشوف انه حل معقول

رد: علاج اكل الوبر في الابل ...؟

الله يجزاء كل من شارك في هذا الموضوع خير وعسى الله يبارك لكم في حلالكم ولاهنتوا..