استفسارعن صورة البعيرالمصيبه والوسم الى عليه

الاخوه الاعزا السلام عليكم ورحمة الله وبركاته عندى صورة هاالبعير من زمان وحبيت اسئلكم عنه وعن الوسم الى عليه الى عنده اى معلومه يعلمناعنه الله يعطيكم العافيه جميعا

رد: استفسارعن صورة البعيرالمصيبه والوسم الى عليه

ارحب ياسعد

اتوقع ان الصوره ماهيب طبيعيه لاحظ مشرب البعير اللي فوق

رد: استفسارعن صورة البعيرالمصيبه والوسم الى عليه

الاخ عبدالعزيز الله يعطيك العافيه على تعديل اصوره انا لى ساعه ياالله عرفت اضيف الصوره ترانى غشيم بهاالامور والولا الله ثم حبى لى هاالمخلوق العجيب الوافي ماعرفت الانترنت وشكر

رد: استفسارعن صورة البعيرالمصيبه والوسم الى عليه

يامرحبا بك ياسعـد ..
ومثل ماقال عبدالعزيز
الصوره فيها شك أنها معدله .. والله اعلم

رد: استفسارعن صورة البعيرالمصيبه والوسم الى عليه

وعليكم السلام ورحمة الله بركاته

الاخ سعد

الصوره معدله وليست حقيقيه


وشكرا

رد: استفسارعن صورة البعيرالمصيبه والوسم الى عليه

السلام عليكم ورحمة الله وبركاته اولا اشكرالاخوه على التعليق على الصوره ثانيان عندى ملاحظه على الصوره يمكن تكون مقصوصه من مقطع فديو والشبك الى فيه الزمول شبك الاميرسلطان بن عبدالعزيز رحمه الله المهم عندى الوسم الى على رقبةالبعير الى هو المقص ومطرق على مطق العصا منهو صاحبه الى يعرف شئ عنه يعلمنا ولله يحفظ الجميع

رد: استفسارعن صورة البعيرالمصيبه والوسم الى عليه

اتوقع انه لمغتر سوداني مادام الوسم غريب وشبيه للوسم ذا قد شفته في السودان
ومن عقبه قبل سنتين يذكر لي شخص ثقه ان فيه بعير مغتر شري من السودان من رشيدي بمية الف ريال والرشيدي جايبه من دارفور وباعه في سوق
كسلا وشراه سعودي ورحله للسعوديه لكن على وصف الرجال اللي يعلمني ان راسه كارثة ومغتر ولاتفرقه من مغاتير الجزيرة

رد: استفسارعن صورة البعيرالمصيبه والوسم الى عليه

الاخ ناصرالسلام عليكم ورحمة الله وبركاته اشكرك على اجتهادك لاكن البعيرالى تقصد فى السودان شراه من الرشيدى مالك الهجن والمغاتيرالمعروف حمد الربيعان وشفت البعيرعليه عمرهايل ماشفته حتى فى ازمول المجاهيم لاكن راس البعيرمقبول مايشدك باالحيل مثل سايرالبعارين والوسم الى عليه وسم الرشايده فى السودان يختلف عن وسم هاالبعير ولك منى جزيل الشكر

رد: استفسارعن صورة البعيرالمصيبه والوسم الى عليه

الاخ ناصرالسلام عليكم ورحمة الله وبركاته اشكرك على اجتهادك لاكن البعيرالى تقصد فى السودان شراه من الرشيدى مالك الهجن والمغاتيرالمعروف حمد الربيعان وشفت البعيرعليه عمرهايل ماشفته حتى فى ازمول المجاهيم لاكن راس البعيرمقبول مايشدك باالحيل مثل سايرالبعارين والوسم الى عليه وسم الرشايده فى السودان يختلف عن وسم هاالبعير ولك منى جزيل الشكر

اشكرك على المعلومه وياليت تزودنا بصورة له لاني انا ماشفته ونعم فيه عمر هايل على ماسعت
لكن البعير ماهوب للرشايده لان ابلهم قصيره وتقربها للسواحليه. يمكن حطوا وسمهم عليه جديد لان البعير جاي من الغرب من غرب السودان
الوسم اللي في الصورة اللي انت عارضها شفته على بعض الحلال في السودان لكن المقص اصغر ومتقدم قدام في نص الرقبه واللي خلاني اشك انه سوداني صورة البعير اللي في الصورة ان لحيه دقيق وطويل وهذا ميزة في السودانيات دق اللحي

رد: استفسارعن صورة البعيرالمصيبه والوسم الى عليه

الاخ ناصر بنسبه للبعيرشفته قبل سنتين اوثلاث تقربا فى مزعة حمد الربيعان والاصورته لانى ابحث عن الراس فى الدرجه الاولى والاعجبنى الراس شفت باقى البعير والبعيرمات بعدماجامن السودان بشهرين تقريبا لاكن الربيعان من ربعنا ان كان له صوره عندهم عرضته لك نشاالله

رد: استفسارعن صورة البعيرالمصيبه والوسم الى عليه

السلام عليكم

قولو لا اله الا الله

كبرو الصورة عندكم في الكمبيوتر

الصورة معدلة 100%

رد: استفسارعن صورة البعيرالمصيبه والوسم الى عليه

الوســــــــم وسم العريفي

ونا ارسلت الصوره لواحد منهم استفسر وقال هذا وسم ابن مخـــــــــضار العريفي ابناخي العونه وهذي صور ابعيره اللي باعه على الامير عبدالعزيز بن فهد .واصل البعير عوني

لاكن الصور معدله ماعدلت مادري انا عطيتك علوم البعير والوسم .وعفاك