ضراب اللقيه ؟

السلام عليكم ورحمه الله وبركاته .
سوال يالربع لقيه اخر السنه ذى تضرب ولا لا ؟؟؟

رد: ضراب اللقيه ؟

كان عمرها زين اضربها اول الموسم
واذا العكس اخر الموسم وبكل الحالات لايطوفها الموسم الجاي
هذا رئيي
تقبل مروري

رد: ضراب اللقيه ؟

اذا كانت ناقة مزاين فاصبر عليها لين تجذع ,,
واذا كانت دون المزاين أضربها سهيل القادم

والله ييسر أمرك في كل الأحوااااااال

رد: ضراب اللقيه ؟

رايي كان الضرايب عندك وااااجد وتقدر تصبر عليهاا لاتضربها ألاّ جذعـه ,
يتم عمرهاا ويقسى عظمهاا وتكون باهيه وراهيـه ,
اضربنا اللقاياا , وغطهن اللقاح ولا لحقن امّاتهن بالجروم ,
وعدّينا بعض البكار واضربناهن جذعات وطلعن ينومسن ولاهن بحول خواتهن فالجروم والرهى ,
..

رد: ضراب اللقيه ؟

لاتضربها لاين يشد عمرها

رد: ضراب اللقيه ؟

الافضل اضرابها جذعه

رد: ضراب اللقيه ؟

السلام عليكم ورحمه الله وبركاته
يعطيكم العافيه وشكرا على المرور والنصايح الطيبه تكون من الطيبين دايما .

رد: ضراب اللقيه ؟

على حسب كبر عمرها من صغره وزينها

انكانها عاديه عرضها الفحل وانكانها زينه لا والله إلا اصبر عليها

وانا والله العاديه اعرضها الفحل من لقيه ولا الزينه لا والله امسكها لين جذعه

رد: ضراب اللقيه ؟

حط في بالك اشياء وانته اعلم بحلالك وابخس يا اخوي

اللقيه لو نوختها ..

- شي منهن تبدي بسبب كبر الحوار في بطنها وصغر حجمها ...
- تعسر الولاده في كثير من صغار السن ....
- قد يحدث جروح اثناح الولاده مما يعيق انتاجها في المستقبل ...
- توقف نموا الناقه وثبات حجمها في كثير من الحالات ....

والامر راجع شورك ياللي نويت عليه ......
للاسف .. نوخت لقيه السنه .. ولين يومك بعدها ما ولدت .. ونموها ما زاد .. تمت على حجمها ياللي نوختها عليه .. واخواتها ياللي كانن صغار قدهن تلحقنها بالطول ما شاء الله ...