وش رايكم بالفحل وانتاجه

السلام عليكم ورحمة الله وبركاته

حبيت استشيركم في الفحل معديان وانتاجه .. علما ان اصله طيب ومعروف عند اهله .. وابي بكل صراحه

وانتاجه يزود زينه كل ما تقدم في العمر حسب ساسه اللي معروف عندنا

هذي صورة الفحل معديان




وهذي صور بناته مفاريد وحيران هذي السنه






وهذا مقطع فيديو للبكره المعروضه فوق

[youtube]http://www.youtube.com/watch?v=ERtvUWT5kJw[/youtube]

وهذي صور للبكار المفاريد









وننتظر ارائكم عن الفحل وانتاجه .. ومشكورين

رد: وش رايكم بالفحل وانتاجه

وهذي صورة لبكره من انتاج الفحل نسيت اضيفها في الموضوع

رد: وش رايكم بالفحل وانتاجه

ارجو اعطاء ارئكم وينكم ياهل النظر ترا ماعرضنا الا نبي نستفيد منكم وكل عام وانتم بالف خير ارجو التفاعل

رد: وش رايكم بالفحل وانتاجه

ارحب يانايف ,
الفحل طيّب , طيب بداوه ,
راسه ضخم وعظم راسه زين, ولو أن لحيه قصير , ورقبته طويله , وعظمه زيـن , وسدو جنبه ماهو بسدو المجهم اللي تبي ,
وانتاجه مايخيب باذن الله
البكار في عمومها بدويات وزينة مراح , ولو شفنا امهاتها قطعنا علم البعير لأن الأم دورها كبير ,

رد: وش رايكم بالفحل وانتاجه

البقا يامشعل وانت راعي نظر مايحتاج وتر الفحل اطيب من الصوره وبناته كل فتره زمنيه قصيره تتفير للافضل وسبق عرضت وحده من بناته وابديت رايك انهاعاديه وهي اللي في المقطع وش تشوف الحين نظرك فيها وانا انتظر راي الاخوان ومشكور ين

رد: وش رايكم بالفحل وانتاجه

البكره مبروكه , وان شاء الله انها متطوره , مع ألتزامي بالملاحظات اللي ذكرتها عليها وهي عادها حواره ,
والله يبارك لك , والبعير ذا طيب , وانا شفت عرضه قبل فتره , عسى الله يمنحكم منه مايسركم وانتم هل النظر والغوالي يانايف ولاعليك زود ,

رد: وش رايكم بالفحل وانتاجه

أرحب يانايف
الشور أمانه بالنسبه للفحل شكله طيب والمأخذ عليه قصر لحيه
بالنسبه للبكار أشوفهم عاديات هالحين لكن الوقت قدام وهو الحكم'،،،،،،،،،، والفحل يببي له ناقه تساعده بالإنتاج ولا تحكم عليه بكره أو بكرتين
تقبل تحياتي

رد: وش رايكم بالفحل وانتاجه

ارررحب يانايف
البعير للرجال اللي يبي البداوه ويستانس عز الله زين
العظم طيب ,والرقبه منتله وطيبه , وراسه زين ولكن ماهوب الاقصى
الظهر فيه ملاحظه, وجنبه مثل ماقال مشعل ماهوب جنب المجهم اللي تبيه
اما الانتاج
فعز الله انه مقنع ولو انه عندي بهده وانا مرتاح
البكار فيها رق حلو,وروسها موجهه وزينه , ارقابها زينه ولو ان فيها خضعه
ملاحظاتي عليها انها ماهيب متسنده تخاضع ارقابها والظهر فيه ملاحظه
ولا تكابر روسها بالحيل
الله يبارك لك فيه ويمنحك منه مايسرك

رد: وش رايكم بالفحل وانتاجه

البعير انتاجه يهده

والبكار بيظهرن وهن ظاهرات لاطيب انشاء الله
ولا تستعجل الفحل بدوي وانتاجه بداوه ولا كن ماتظهر الله العالم الى لقايا يبوشن

رد: وش رايكم بالفحل وانتاجه

اول ماشفت البعير توقعت انتاجه اطيب من كذا بكثير

روس البكار دقاقه , ورقابها فيها حدابه مدري من البعير والا من امهاتها

والا قلطة السنام واضح انها من البعير

والا البعير اضيف على ملاحظات الاخوان ان عرقوبه مافيه الهزعه المطلوبه

رد: وش رايكم بالفحل وانتاجه

السلام عليكم
امسك فحلك الله يبارك فيه ... الفحل زين وانتاجه زين يتعبون الرجال ماجابوا مثله ....اقصد الانتاج.....لان المجهم صعبه وفحلها صعب
حيرانك بتزين ورقابها بتعدل باذن الله...
هاذي نظرتي والله يبارك لك

رد: وش رايكم بالفحل وانتاجه

الله يعطيكم العافيه على تفاعلكم وكلكم اهل نظر والله يرزقنا وياكم الانتاج الفاخر وترا الفحل على حسابكم اللي بيظرب شي من ابله وموقع الابل جنوب عنيزه في نفود الشقيقه

رد: وش رايكم بالفحل وانتاجه

ماشاء الله تبارك الله

الفحل كفوو وعليه رقبه لايعلى عليها

الله يبارك لك فيه ويرزقك الانتااج الطيب

رد: وش رايكم بالفحل وانتاجه

شاكر لك ياسعود مرورك والله يرزقنا وياكم الانتاج الطيب