وش افضل الاسواق هالايام

بسم الله الرحمن الرحيم


السلام عليكم ورحمة الله وبركاته


صبحكم الله ومساكم بالخير


البارح كلمني لحية غانمة شروا هالوجية ونشدني عن أفضل الأسواق للبل هالايام وده يجلب ولايدري سوق الجنادرية والا سوق بريده عرضت عليه انه يبعيها فالمنتدى وزرا علي خبركم الشياب والتكنلوجيا مايجتمعون وانا حبيت استفسر منكم واخذ الشور



وسلامتكم

رد: وش افضل الاسواق هالايام

افضل شي الايام ذي البيع في مزايين سعد ابو قرنين

رد: وش افضل الاسواق هالايام

وعليكم السلام ورحمة الله
هههههههههههه
عزالله بيزون علاك يا نواااااااف
وش عرف المشيبة بالنت والبيع والشرا فيه

انت ما حددت لون المبروكااااااات

رد: وش افضل الاسواق هالايام

الاخوان مشعل وطلال بيض الله وجيهكم


مزاين ابو قرنين وينه فيه ؟؟؟


وبالنسبة للألوان شعل ثنتين وحدة حدرها بكرة عمرها حول سبعة اشهر ووحدة قعود عمره حول خمسة اشهر


وحمراء حدرها قعود عفر عمره حول ستة اشهر وشقحاء يقول لقحة من شهر واحد او ثنين حسب كلامة

رد: وش افضل الاسواق هالايام

افـضل الاسواااق با التاكيدد الجنادريه

تمـشي فيه البل كلهاااا

وبالنسـبه لمزاين ابن قرنين انصحك لا توديها لانكك تتعب حيل

اولى شي لزم تحط لك شبك وراعي والماء متدري من وين تجيبه

ومزاين ابن قرنين اذا فيه سوق بيكون سووق للنوادر وانت اذا ابلك غوالي ودها

اماا اذا هي ابل مقاني فا سووق البل افضل لها وتمشي فيهاا خص الخلفات

واناا لم اسمع الى الان احد وداء ابل يم مزاين ابن قرنين يبيع

رد: وش افضل الاسواق هالايام


انا اقول خله ينتظر شوي ام رقيبه معاد هي بعيده
إلا اذا كان مستعجل شي ثاني

رد: وش افضل الاسواق هالايام

شرواك الطيب

مثل ماقال اخوي سلطان

والله يرزقه البيعه الي تسره

رد: وش افضل الاسواق هالايام

الاخوان / سلطان وخالد ويزيد


بيض الله وجيهكم وشاكر لرأيكم وفزعتكم وهذا من طيبكم



كل الشكر للجميع