أسئلة تحتاج إلى أهل الخبرة

السلام عليكم ورحمة الله وبركاته

السؤال الأول
متى يكتمل نمو البعير في أي سنة يكون ذلك ؟

السؤال الثاني
متى نحكم على انتاج البعير بعد أي برق ؟

السؤال الثالث
هل البعير يجيب شكله ؟

السؤال الرابع
هل البعير الزين يرفع من زين الأبل حتى لو هي دون المستوى ؟

السؤال الخامس
هل الناقة الطيبة تحسن من انتاج البعير


وجزاكم الله خيرا

رد: أسئلة تحتاج إلى أهل الخبرة

السلام عليكم ورحمة الله وبركاته


وعليكم السلام

حسب خبرتي ابي ارد على الاسئله .. وان شاءالله الجميع يشارك بخبرته..



السؤال الأول
متى يكتمل نمو البعير في أي سنة يكون ذلك ؟

ج- يكتمل80% في سن رباع يكتمل 100% شاق نابه يكمل الفحل في زينه وعمره ..



السؤال الثاني

متى نحكم على انتاج البعير بعد أي برق ؟


من الانتاج الاول ..





السؤال الثالث
هل البعير يجيب شكله ؟


نعم يجيب وله النصيب الاكبر من الانتاج. بشرط من الابل اللي فوق الوسط

السؤال الرابع
هل البعير الزين يرفع من زين الأبل حتى لو هي دون المستوى ؟



هذا فيه اختلاف ومن واقع خبرتي. فيه ابل زينها عادي وفحلها ساس وراس لكن الزين من انتاجه منها فرق بسيط جداً او شبه معدوم الزين،، بل الانتاج على امهات الحيران يعني الابل تاخذ حيرانها. وإذا حصل حوار تجد الزين فيه بسيط جداً فرق درجات بسيطه . إلا بعض الابل نسميها بطن! يجي ولدها على مواصفات الفحل وساس الفحل وهذه نقطة الخلاف بين اهل الابل ولا اعلم السر في ذالك. .. لتوضيح اكثر عندك فحل شاريه بملبغ عالي جداً وهديته في الابل ولم ينتج من ابلك شي زين.. وكنت ناوي تبيعه جزاره.

وهذا صار عند واحد من الربع. وانا اعرفه وعرف ابله ونتاج الفحل من ابله.

يوم من الايام جاء واحد من ربعنا معه ضرايب 2 اضربهن لقح وحده من الابل وهي ناقه اقل من عاديه. لايمكن اشتريها ولا ارغب ان تكون مع ابلي. ويوم والدت جابت قعود فاخر سئلته قلت اول حوار فاخر لهذا البعير ولم يحصل مع ابل صاحب البعير هذا الانتاج! قالي هذه الناقه بطن ولدها على البعير وساسه دايماً ، ليس هذه المره بل سبق وانتجت على فحول أخرى ونفس الفحل اللي يضربها!! قلت كيف الفحل ماينتج إلا من هالنوع من الابل؟ قال سبحان الله اغلب الفحول هكذا!! .. هذا هو الخلاف حول الفحل !! هذا في بعض البعارين وليس كلها...

بل فيه بعارين اضربت هذه الابل وانتجت انتاج افضل من الابل نفسها. لااعلم السر...










السؤال الخامس
هل الناقة الطيبة تحسن من انتاج البعير

بشرط ان الفحل يكون زين وساسه معروف نعم تنتج انتاج فاخر.. ولعكس إذا الفحل عادي يكون انتاجها مثل امه واقل درجات..


وجزاكم الله خيرا

هذا حسب خبرتي في الابل والانتاج والحلال بحظوظ اهله..

رد: أسئلة تحتاج إلى أهل الخبرة

هذا حسب خبرتي في الابل والانتاج والحلال بحظوظ اهله..

الله لايهينك ياسلطان على المعلومات المفيدة

رد: أسئلة تحتاج إلى أهل الخبرة

صباح الخير وكل عام وانتم طيبين

الاسئلة طيبة ويستفيدون منها هل الحلال

السؤال الاول

يكتمل نمو البعير للضراب في سن جذع ويكمل نمو زينة في سن الرباع

السؤال الثاني

بعد ثالث برق

السؤال الثالث

البعير يجيب شكلة واكثر مايجيب خواتة من ابية

السؤال الرابع
اذا كانت البل دون المستوي راح تتعب البعير في الانتاج

السؤال الخامس

نعم تحسن من انتاج العير وساسها طيب
لكن اذا كان زينها واقف يكون الانتاج وسط او دون الوسط

رد: أسئلة تحتاج إلى أهل الخبرة

انا مريت على الموضوع يوم ما كان فيه ردود وقلت اترك المجال لاهل الخبرة

واليوم ابشارك الاخوان باللي اعرفه

السلام عليكم ورحمة الله وبركاته

السؤال الأول
متى يكتمل نمو البعير في أي سنة يكون ذلك ؟

انا مع اخوي سالم ان نمو البعير يكتمل رباع

السؤال الثاني
متى نحكم على انتاج البعير بعد أي برق ؟

المعروف انك تحكم على البعير من ثالث برق

السؤال الثالث
هل البعير يجيب شكله ؟

البعير يجيب على خواته والام لها دور

السؤال الرابع
هل البعير الزين يرفع من زين الأبل حتى لو هي دون المستوى ؟

اذا كان انتاج البعير ازين من امهاته اكيد بيرفع من زينها

وفيه ناس اضربت انياق دون الزين وجابت بكار طيبة
السؤال الخامس
هل الناقة الطيبة تحسن من انتاج البعير

اكيد ان الناقة الطيبة تساعد البعير بزين الانتاج


وجزاكم الله خيرا

رد: أسئلة تحتاج إلى أهل الخبرة

السلام عليكم ورحمه الله وبركاته كل عام وانتم بخير اخوكم على الحربي الحقيقه هذا الكلام اللي هو عين الصواب بالاستشاره لكن ابي اعرف معني كلمه اول برق هل هو اول انتاج يعني مانحكم عليه الا بعد مايضرب ثلاث سنوات هل كلام الاخوان البعير يجيب شكله من خواته من ابيه ولا خواته من البطن يعني من امه ارجوا التو ضيح وشكرا

رد: أسئلة تحتاج إلى أهل الخبرة



نعم اول برق يعني اول انتاج
والفحل يجيب خواتة من ابية
ولكم تحياتي

رد: أسئلة تحتاج إلى أهل الخبرة

يكتمل نمو البعير ﻻجاء رباع والبعير مايحكم على انتاجه لين تجي بنته لقيه يظهر كل زينها والفحل الطيب يعمر المراح والناقه تساعد البعير بعد