وش معنى صيفية؟؟ووش معنى شتوية؟؟

[align=center]بسم الله الرحمن الرحيم
السلام عليكم ورحمة الله وبركاته
كيف حالكم يااهل مزاين؟ان شاء الله بخير
.
.
عندي استفسارات الله لا يهينكم بخصوص معنى
شتوية/.................................................. ............
وصيفية/.................................................. .........
.
.
وهل الفحل يضرب بالصيف!!!!!!!الي اعرفه ان اغلب الفحول تفدر(الابعض السودانيات تتاخر شوي)
وشكرًا
.
.
.
.
.
(أن كان ابو حمد(فهد صلبوخ)يقرأ الموضوع تراني حاولت أرسل له على الخاص ورفض أما أن صندوق الرسايل ممتلي او أنها اختار خاصية عدم تلقي الرسائل)[/align]

وعليكم السلام ورحمة الله وبركاته
حياك الله يا خالد
الشتوية هي اللي تلد في الشتاء ويعتبر من طلوع سهيل الين تبدي لك الثريا فجر من الشرق والحوار اللي تجيبه امه بعدها يعبر صيفي
هذا حسب معرفتي واللي عنده من الاخوان توضيح اكثر فحنا نستفيد
والبعارين بعضها يهيج في القيض ولا هو بواجد
وسلامتك..

الشتويه اللي مولوده في الشتا وقبلها الصفريه اللى مولوده مع طلوع سهيل في الصفري اما الصيفيه هي اللي تولد آخر الربيع مع بداية الصيف وفيه كذلك القيضيه وهي اللي تولد في القيض اما بالنسبه للفحول ماهي سوا بعضها يضرب حتى في الصيف ويكون اضراب متفرق وتشوف البعير شكله فادر يعني بطنه كبير.
ولك تحياتي

الأخوان
حمد اليامي
علي ال مرعي
الله لايهينكم وبيض الله وجيهكم
ولكن هل فيه فرق بينها من ناحية
الجرم(كبره وصغره)والزين أو انها سواء
ولا يفرق بينها الا ان هذي مولدها كذا وهذي مولدها
كذا ، وشكرًا

نعم يوجد فرق ياخالد دامها حيران ومفاريد في الجرم وعقبه كل بكره تطلع على حجمها وحجم امهاتها واسرارها.

بسم الله الرحمن الرحيم

نعم هناك شتويه وصيفيه
الشتويه مثل ما وضحو الاخوان

والصيفيه هناك بعارين تهيج متأخر وتفدر متأخر
ويسمونه الفحل الفسقان الي يضرب بالصيف هذا من ناحيت فحول الجزيره المعروفه
اما الفحول المستورده مثل الباكستاني والسوداني فهناك منهم من يضرب بالصيف والشتي
لطبيعت الارض المولوده بها
والفرق بالنسبه للمولود فحوار الشتي يجي كامل ويعيش بصوره عاديه

اما الصيفي فيجي حجمه اقل وينخاف عليه من الموت
سواء بحجمه او للحرارة الجو والشمس
فيضعون له عريش او عزبه او عشه لتحميه من حرارة الجو

السلام عليكم اول شي الحمدلله على السلامه يا بو نايف
ثانيا مواليد الصيف دائما يكون حجمهم اصغر من الطبيعي في السنوات الاولى من حياتهم و لذلك يكونون غير مرغوبيض للركض اما للتربيه كإبل فإذا كبر الحاشي و تعدى مرحله العنايه فلا بأس به اذا كان شكله طيب

مع الاخ علي ال مرعي
,,,,,,ووو

الأخوة الاعزاء جميعًا
الله لا يهينكم ، وبيض الله وجيهكم
وشاكر لكم تجاوبكم وتفاعلكم مع الموضوع
وشكرًا

بسم الله الرحمن الرحيم

نعم هناك شتويه وصيفيه
الشتويه مثل ما وضحو الاخوان
والصيفيه هي المولوده بعد شهر ثلاثه

الاخ خالد شكرا على الطرح وماقصروا الاخوان
واوافق الاخ علي المرعي الراي

الربع ماقصروا

مرحبابك يامطول الغيابات
بشر عن الجامعه عسى تخرجت
بالنسبه لسؤالك
الاخوان ماقصروا
وماخرجوا عن الوصف
اخو الجميع بندر البقمي ....ابو مطر

هلابك ياخالد

واتوقع اللبس عندك في كلمة صيفية والصيف مصطلح عند اهل البادية يطلق على فصل الربيع اي شهر 3 و 4 و5 ميلادي

فالحوار اللي ينولد في هذا الوقت يسمى صيفي.

والصَفّري هو مايولد في شهر 9 و 10 و 11 ميلادي نسبة الى الصّفري او فصل الخريف

والشتوي مايولد في فصل الشتاء (الفصل الوحيد اللي اتفق فيه البدو مع الحضر )وهو مايولد في شهر 12 و 1 و 2 ميلادي

وكذلك القيظي وهو مايولد في القيظ (فصل الصيف) مابين شهر 6 و 7 و 8 ميلادي

ولك تحياتي

الاخوة الاعزاء جميعًا
الله لا يهينكم
وبيض الله وجيهكم
كفيتوا ووفيتوا ، والاخ مبارك
ختمها بالارقام ، الله لا يهينكم جميعًا
وشكرًا

***
ارحب يابو مطر
والله لا يهينك على سؤالك عني
وبخصوص الجامعه باقي لها سنه ، ومثل مايقول عطاالله ممدوح
هانت بعون الله وصارت تياسير * * * والحمل الاقشر قام يعلن نزوحه
مرت سنينه مقفيات ومدابير * * * كانت على نفسي سنينه شحوحه
والحمد لله ماحسبت المخاسير * * * سبحة في بحر ٍ شديد الملوحه
ووقفت في وجه الهواء والاعاصير * * * ولو ان قلبي يتعبنه جروحه
وحققت شي ٍ من طموحي مع الغير * * * ولا كل رجال ٍ يحقق طموحه
...الخ
وشكرًا