استفسار عن فحل اوضح كان لسهل الحداري

السلام عليكم ... الاخوه الاعزاء اود الاستفسار عن فحل اوضح تم شرائه من سهل الحداري العتيبي من قبل احد الامراء وسنه ثني بقيمه غاليه
غاليه وارغب في معرفة اصله وانتاجه اذا كان له انتاج .. وشكرا للجميع

هلا ياخوي فهد العجمي وبذن الله الربع بيفيدونك عنه

الاخوان ان شاءالله عندهم العلم ويعلمونك

المعلومه اللي عندي ان البعير تم شراءه اخر وقت الهداد

رد: استفسار عن فحل اوضح كان لسهل الحداري

هلا اخوي فهد العجمي بخصوص الاستفسار عن فحل سهل الحداري هوه
مشري من صنهات بن مجيهير العتيبي وكان حوار بمبلغ 300000الف ريال وكان الموضوع هذا بعد مزاين عتيبه وأصل بعير ابن مجيهير من اباعر صاحب السمو الامير شقران الكبير

رد: استفسار عن فحل اوضح كان لسهل الحداري

مرحبا اخوي فهد

الفحل مشري حوار من صنهات بن مجيهير الشيباني

وتوه مانتج اول انتاجه السنه هاذي

رد: استفسار عن فحل اوضح كان لسهل الحداري

مرحبا أخوي
الفحل شفته ع الطبيعة عليه راس وعرنون ووجه وسبال خصم والرقبة لك عليها ولكن راسه طفاح والبعير ولد الهرش فحل بن مجيهير واضربه ولد خالي ناقة شقحا موجهه وجاله بكره شقحا موجهه وباعه ان صح الكلام ب اربعة مليون وخمسين ناقة من ابل الامير فهد العبدالله ولاني متاكد .
وشفت له قعود مفرود له عرنون بسيط والباقي مافيه زود.
هذا ماعندي

رد: استفسار عن فحل اوضح كان لسهل الحداري

ارحب يافهد تراحيب المطر

بالنسبه لسوالك عن بعير سهل الحداري

نعم البعير بيع ٤ ملايين

واصل البعير على بعير بن مجيهير ومشري بعد مزاين عتيبه

وامه تعد من نوادر منقيه بن مجيهير

واخته فالبطنه اللي قبله بنفس الابو والام عليها سوم ٦ مليون

وراح انزل لها صوره عن قريب

وارجو اني اكون وصلت لك ما كان يخفاك

رد: استفسار عن فحل اوضح كان لسهل الحداري

صحح معلوماتك البعير أبوه شاريه بن مجيهر من عويس بن غفر الغييثات

رد: استفسار عن فحل اوضح كان لسهل الحداري

هلا اخوي احمد بعير عويس الهرش عليه وسم الشيوخ لصاحب السمو الامير شقران وليس اصلة من الغييثات

لتصحيح معلوماتك وتقبل ردي واحترامي

رد: استفسار عن فحل اوضح كان لسهل الحداري

السلام عليكم .. احب اعلق على سؤالي الي سئلته قبل ست سنوات ... الفحل المذكور الي انا ابحث عنه هو الان عند صاحب السمو الملكي الامير خالد بن بدر بن عبدالعزيز واسمه طوفان وساسه من ركاب ابن جعوان وماشاء الله على انتاجه . انا شفته وشفت انتاجه فاخر جدآ . وحسب ما ذكر لي احد الاخوان الي ضرب عند الامير انه باع بكره بمليون وميتين ووحده بثمانمائة الف ريال لقايا وذكر لي بيعات اخرى لناس ضربوا من الفحل باقيام زينه وعليه ثني هالزمان انتج الى الحين قعودين واربع بكار عند الامير فاخره.. وله قعدان طيبه عند الامير تسام باسوام زينه ... والله يعطيكم العافيه انا وصلتني المعلومه وحبيت احطها مكان ما ابتديت انا بالسؤال

رد: استفسار عن فحل اوضح كان لسهل الحداري

بيض الله وجهم يا فهد ويرزقنا واياك من واسع فضله

رد: استفسار عن فحل اوضح كان لسهل الحداري

مرحبا
فهد العجمي
وين محل أبل الامير خالد بن بدر
الله يجزاك خير