يهل الجنوب علوم هل الجنوب

السلام عليكم ورحمة الله وبركاته



ياهل الجنوب علوم الجنوب

هو جاه صيف ولا حكي

يقولون ان الشاه شبعت

والحاشي شبع والناقه سمحت

هو صدز ولا حكي قواله

رد: يهل الجنوب علوم هل الجنوب

الجنوب وين بالضبط ياليت تحدد ؟
هل تقصد جنوب نجـد ؟ من الحوميات وجنوب الايسري ليا قهب الطير ليا طرف الهضب ...؟
هذي عليها اسحبً سيليات متفرقه وبينهن ديوم من المطر الاول حسب ماسمعت وجاياها ديوم من التالي ..
,,
أما الجنوب رنيـه .. والطرف .. ليا طرف عرق سبيع من فوق يذكرون عليه امطار غزيره وارزاق .. والديره على ظهور . والقيض مقتفيهاا
والله يتّبع لها بخير

رد: يهل الجنوب علوم هل الجنوب

اي بالله نبي العلوووم

نسمع عن تثليث وورا شبع ناقه

ياليت مشاركه اهل الديره ولا اللي واصلها

رد: يهل الجنوب علوم هل الجنوب

يا ابو سعد


انا مثلك سمعنا وشفنا الحواله واجد الي قاطعين السريع وراحين جنوب

مدري على حيا او المزارع


ويذكرون الهضب انه زي ما قلت وهذا كلام
من بيجيب العلم يا الربع

رد: يهل الجنوب علوم هل الجنوب

مشعاب يشبع الحاشي فية ورا الصاقب ولاهي عريضة نبتها شتيل قبل اسبوعين

من هضبة المنخرة لين الصاقب جنوب الحوميات 100ك

تو شبع الحاشي قبل اسبوع

ويذكرون يم اذقانات البل تسمح الايام هاذي

والله يجيب الخير

رد: يهل الجنوب علوم هل الجنوب

شدوا من الرس اهل 5 ذيدان العقالية من مطير

21 شدة ولا قعد من الحيران اللي يومي ذنبه

والبل شباع يم نجران يقولون بينهم وبين نجران 50 كيلو

رد: يهل الجنوب علوم هل الجنوب

بأعطيكم علوم مابين بيشة وتثليث الأرض طيبة بعض الأماكن العلوية من الميثب تشبع الناقة ضحى
وباقي الأماكن تسمح على طول النهار وجاها ولي قبل يومين ونوّها حلو وأغلب الحول في الميثب
لاجا الليل راحت الصحراء مثل القرى من أنوار المرتبلات

بالنسبة لجهة نجران جاني رجّال يجيب العلم يقول صالحها حول إيدمة ودون إلى تثليث مالكم في طويل حاجة

زبدة الكلام الصيف الطيب على بيشة ورحبه جنوب للجبل

وسلامتكم

رد: يهل الجنوب علوم هل الجنوب

بيض الله وجيهكم

والله يجيب الحياا