عـطــونا علوووم الحيااء

السلام عليكم

يذكرون حياء يم وادي طلال وسواحيق وثرب وشمال عفيف

الماء على كبد الارض والعشب على اول

والعربان تمشي مع خط البيب يمها

من يعطينا العلوووم احد وصل الديار هاذي وش علووومها

والصمان عطونا علووومة احد وصلة


يالله يكريم

رد: عـطــونا علوووم الحيااء

السلام عليكم ورحمة الله وبركاته ،،،

علوم الصمان طال عمرك قبل أسبوع رحت يم الصمان من جهة الصرار ودخلت قطوع وجيت فيضة العمياء وفيضة ام المصران والشملول وام عقلاء وشوية وسحمة وعودت على التريبي وعلى الرفيعه ومن ثم اللهابه وعلى فيضة الحصبيات وفيضة العودة ومناخ ومن ثم على الدبية ومسطت القار معود ...

علومها مامن شي يثلج الصدر غير فيضة ماهي عريضة ونبتها خفيف حول الحصبيات وباقي الفياض مافيها غير العجاج وفيضة العودة مليانة ماء ومسكرة من الحكومة بشبك محد يدخلها ..


وباقي علوم الشمال بوافيكم فيها بموضوع ثاني يطيب خاطركم

رد: عـطــونا علوووم الحيااء

لاهنت يابدر

رد: عـطــونا علوووم الحيااء

انا مشيت قبل يومين وادي العجمان
فرقت قطوع من الفهده على الجيان جو كمعان و كسرت يسار على سحمه وعلى الشملول ثم كسرت الين ركبت الخط من عند مشله
والله ما تشوف الماء الناقع الله يجيب الخير
ثم من يوم مشيت الرفيعه و على العاذريه وعلى الشيحيه وعلى الشاميه وعلى الفريديه وعلى اللهابه وعلى جو مناخ ثم كسرت يسار على القرعاء وامساني اللي باللصافه ثم امرحت ويوم اصبحت وانا امشي من اللصافه الين جيت قطووع ام رقيبه اختصار
لا تنشد عن المطر الماء على تسبد الارض والفياض مليانه ونواة الارض تبشر من بعد الله بالخيرتشوف دبق والماء ناقع
ومن ناحية فرع رحت يم عمي لحقتهم من عند خط البيب شادين مخلين افقره والفقاره ومعطين البيب يذكرون وانا والله ما جيتها وادي الجرير وقدمه لا تنشد عن المطر سيل وان العربان اللي فيه مخضرين وان الغنم فيها وغير سلامتكم هذا حد ما علمت عنه ومشيته و ندعو الله عز وجل ان يرزق هالبهايم المخضار وتغسل تسبودها عن الشعير الها سنتين وعليها وهي تاكل من الشعير وتعود على دمنها لكن الله كريم الله كريم

رد: عـطــونا علوووم الحيااء

زانت علومك ولا تعبت على المشوار ياالعساس وعقبال ما تجيب علوم الربيع
شكرا"

رد: عـطــونا علوووم الحيااء

السلام عليكم

يذكرون حياء يم وادي طلال وسواحيق وثرب وشمال عفيف

الماء على كبد الارض والعشب على اول

والعربان تمشي مع خط البيب يمها

من يعطينا العلوووم احد وصل الديار هاذي وش علووومها

والصمان عطونا علووومة احد وصلة


يالله يكريم

وعليكم السلام
بالنسبه لطلال ومريحه ووادي الجرير والاكوام والنجج
مليانه من العربان بكثره ماتلقي محل تنزل فيه ولارض كانت طيبه وجهتها ومسيوله والبل بكثره الذوذ علي الذود
فلاكن امتلت من اهل الغنم وخاصة النعيم ودقة الارض وينزلون ليل ونهار الله ياصلنا وياهم ويرزقنا
وشدان منها غربي الحسو بارض فيه رمث وهي برقه من الحيا وتفرقم اهل البل اللي فيها اللي اجنب واللي غرب
وسلامتكم