بخصوص تفحيل القعدان

يالربع الرجل يقصد ساسه دون من بعيد ما هي أم القعود مباشرة أنها هي رديه







أنا مع اخوي علي ال مرعي

افحل الي ابوه منتج وامة طيبة ولاعلي من شكلة )افحلة وانا مغمض( محطات بيع الأبل امتلة من الفحول الي اشكالها صور لاكن بدون فايدة .
انا اعرف واحد عندة جمل احمر هادة في وضح ابوة اوضح هدة في الأبل ولقحة الأبل علية وخصاة وخلاه رحوك للأبل جاء انتاجة مثل ابو الفحل ( فاخر )

السلام عليكم ورحمة الله وبركاته

الله يعطيك العافيه يا ابو عبداللطيف على السؤال

سبق التطرق لهذا الموضوع قبل هذه المره بمواضيع مختلفه واعتقد ان الفحول تهد على ساسها وليس على اشكالها لمن لا يريد ان يخاطر يعني اللي يبي يشتري قعود وغالي يجب ان يعرف جميع عائلته ( الاب والام ، الاخوات، الجد والجده للاب وللام) فهو سيكون حامل لجميع الجينات والصفات الوراثية الخاصة بالعائله
اما السؤال هل اذا كان القعود من انتاج البعير المشهور الفلاني اشتريه واهده وانا مستريح فا اعتقد انه من الخطاء بمكان فعل ذلك، فهناك على سبيل المثال احد الفحول التي غطاء صيتها جميع البلاد وبدون ان نذكر الاسماء وله من الانتاج الكثير لم اشاهد احد من ابنائه انتج شيء يفوق الوصف او افضل من ابوه او حتى مثل ابوه

ونرجع لسابق ما ذكرنا وهو ان اردت التفحيل فابحث عن الابل ذات الساس من عند ملاكها والتي اعتقد انهم اصبحوا قلة هذه الايام حيث توزعت ابلهم بين الناس باسباب الشراء والبيع

وتقبلوا تحياتي

الأخ نواف الرافد/ جزاك الله خير على المشاركة وحنا متفقين على طيب الأب بس الكلام على الأم
الأخ ماجد الشيباني / جزاك الله خير على التفاعل واللي فهمت من كلامك لا تتعب على القعود حتى لو كان طيب جداً طالما أن امه ردية أو عاديو
الأخ هادي / جزاك الله خير على المشاركة المختصرة المفيدة ومعنى كلامك نفس معنى كلام ماجد الشيباني
الأخ خالد الحجي / جزاك الله خير على التفاعل ونفس المعنى السابق . (ان الله كتب مريتك بعد كم يوم)
الأخ بدر العازمي / الله يطيب فالك يابدر والشباب ماقصروا عطونا الاجابة
الأخ فهد الخالدي / مالك لوا يالسمي أنا اقصد أم القعود مباشرة ورداها في الشكل والا البطن طيب
الأخ مبارك الرمالي /جزاك الله خير على التفاعل ومعنى مشاركتك ان تردى الأصل لا يهمك الشكل
الأخ عبدالرحمن عبدالعزيز / وعليكم السلام ورحمة الله وبركاته,,,
الله يعافيك يابو خالد وبعض المواضيع متجددة ولا تغيب عن الساحة وهذا منها
وكلامك يابو خالد تأكيد لكلام الاخوان السابق مع توسيع رقعة الدائرة لتشمل الجد والجده من الجهتين وأنا اشوف ان الفحل اذا كان مشهور بالاننتاج فما علي من ابوه وجده

الحقيقة اشكر جميع الاخوان على التفاعل الطيب وكما توقعت لا جديد في الموضوع فالتركيز على الأصل هو القاعدة
لم يريد التفحيل أي ان الساس قبل الراس وإن اجتمع الاثنين فاجتمع العنبر ودهن العود , وان طاب الراس وخاب الساس فلا تغامر فهذا مصيره الفشل .

طيب ياخوان فيه سؤال بسيط يطرح نفسه : ان كنا متفقين على أن الاصل هو الأساس والشكل مثل ما يقولون سموحة خاطر , لماذا ينطبق هذا الكلام على القعدان دون البكار بمعنى أن بعض البكار أمها ردية جداً والبكرة طيبة جداً وتشترى بأغلى الأثمان والشواهد كثيرة

طيب....البكرة هذي بتصير ناقة وتضرب من بعير طيب وتجيب قعود طيب..... هذا القعود يفحل وإلا لا؟ ابوه طيب وأمه طيبة وهو طيب.....
إن قلنا الأصل فجدته ردية واخوان أمه ما فحلوا , وان قلنا الشكل ( هاد روحه) هدمنا كلامنا الأول ...

آسف يالربع طولت عليكم لكن هذي خاطرة حبيت تشاركوني فيها... وسلامتكم .

حياك الله يافهد وملاحظتك الاخيره في محلها وفيه فحل من ازين فحول الجزيره وامه من اطيب البل وابوه كذلك وانتاجه طلع متوسط والسبب كما ذكرت الساس وليس الام فقط لذلك ودك بالقعود اللي من ابل مقيمه وطيبه.

طيب....البكرة هذي بتصير ناقة وتضرب من بعير طيب وتجيب قعود طيب..... هذا القعود يفحل وإلا لا؟ ابوه طيب وأمه طيبة وهو طيب.....
إن قلنا الأصل فجدته ردية واخوان أمه ما فحلوا , وان قلنا الشكل ( هاد روحه) هدمنا كلامنا الأول ...

آسف يالربع طولت عليكم لكن هذي خاطرة حبيت تشاركوني فيها... وسلامتكم

الاخ فهد بن عبدالطيف
1 صحيح تلقى بكرا طيبه وامها رديه وتنباع بقيمه عالية والسبب التنافس في المزاين اما القعود لاصارت امه ردية ماللك حاجة فية

2القعود اذا صار ابوه منتج وامة طيبه الشكل والساس وجدته من امه رديه فحلة وتوفيق من اللة

الأخ عناد / الله لا يهينك على المشاركة وملاحظتك الأولى في محلها وهي ـ من وجهة نظري ـ اللي تفسر وجود وجود ذود من المزايين ومقهوره اكثر من ثلاثة ارباعه من المتوسط وتحت

وعليك السلام ورحمة اللة وبركاتة

اخوي فهد الولد والقعود مخلفين العهود

اذا تبي تفحل قعود لازم يكون ابوة منتج وامة طيبة وساسة طيب وتوفيق من اللة سبحانة وماهوشرط يجي انتاجة طيب
لن يعتمد على البل اللي بتفكه فيها

مثال تمام وعيالة

غريب ولد تمام اللي كان يملكة زايد بن هجرس ونتقلت ملكيتة لبا اروس العنزي انتج انتاج ازين من انتاج اخوانه اللي يفوقونة جمالن

مثال اخر

يجيك فحل شكلة عادي وبناتة طيبات ولدة عادي وانتاج ولده مثل ابوه في فحول واجد يجيك انتجها طيب بس في البكار والقعدان وسط
وفي فحول يجيك انتاجها طيب بس في القعدان وفي فحول جامعة طيب البكار والقعدان

ماهو شرط ان الفحل يكون شكلة طيب لن الفحل اغلب انتاجة يشبة امة وخواته

معك اخوي عناد العتيبي

تفحيل القعدان له قواعد وطبعا لكل قاعده شواذ ومن القواعد اللي يعتمدون البدو عليها
1-البل هد اسرارها بمعنى حتى لو كان الفحل شكله دون يمكن يفحل اذا صارت امه طيبه وهذا اهم شي ويكون ابوه طيب وتكون خواته من الفحل طيبه

2-القاعده الثانيه الفحل هاد روحه وهو القعود اللي يجبرك زينه على تفحيله حتى لوكانت اسراره دون.

3- اما ان اجتمع الزين والاسرار الطيبه اى العموق الطيبه فهذا هو المطلوب اما الانتاج ماتقدر تحكم عليه حتى لو جمع الزين والاصل والتجارب كثيره .-

كلامك 100%
ياابوحسين

أررررحب يا فهـــد ..


أول وأهم شي في القعود اللي بتفحله شف إمــه إن كانها طيبه وساسها أطيب هده ثمن عاد أبوه له نسبه لكن أقل من الام .....


تقبل شكر واحترامـ

مح ــبك
تركي الكبرى

[align=center]أنا أحب أضيف شيئ بسيط

وهو أن فيه ناقه يسمونها البدو أم الفحول إذا جابت قعود من بعير طيب فحلوه بغض النظر عن زين ولدها

ويقولون هذا ولد فلانه من البعير الفلاني

والله اعلم[/align]

رغم التأخر في المشااااركة
الا ان فيه قاعدة مهمة في ساس الفحل وهي معلومة لدى اصحاب الابل وهي انك ماتهد ولد البكر حتى لو كانت طيبة وابوه طيب وشكله طيب 0 والله اعلم


تحيـــــــــــــــــــــــــاتي

يابو شديد
السلام عليكم ورحمه الله وبركاته
اولا الانتاج بتوفيق الله وثانيا ساس القعود
واذا كنت ظربت على القعود فخبر اليوم بقروش بكرة ببلاش
اصبر وش الانتاج ورب البيت كريم

الله يجزاكم خير على هالكلام المفيد

السلام عليكم
وما اتعدا عليكم بس اسرار
القعود من صوب امه وابوه
تلعب دور كبير وزبده على المنتوج
ولاهنت على الموضوع اطيب
تقبلو مروري