افضل طريقه للعناية بالمفرود ؟؟؟؟

السلام عليكم كل (ن) بسمه
الله يسعد صباحكم ومساكم

شريت لي قعود مفرود عمره سنه و3 شهور
دعواتكم لي بالبركه وان شاء الله يصير فحل البل بعد 5 سنين

السوال : وش افضل طريقه متبعه في العناية به ؟
وهل هو صحيح ان الحليب افضل شي يعطاه ؟!

الله لا يحرمنا من اهل المعرفه والخبره والمشوره .

ننتظر منكم كل جديد لكي تعم الفائده
جعل الله ذلك في موازين اعمالكم

رد: افضل طريقه للعناية بالمفرود ؟؟؟؟

دام عمره مفرود مايحتاج للحليب لكن عليك بالبرسيم والشعير المجروش مع مكعب الصوامع إن لقيته
ولاصار حق علمه على القيد والرباط
والله يبارك لك فيه

رد: افضل طريقه للعناية بالمفرود ؟؟؟؟

الله يباركـ فيه
كفى وفا اخونا خالد
***

رد: افضل طريقه للعناية بالمفرود ؟؟؟؟

جزاك الله خير ياعبد العزيز على هالموضوع الطيب

والله يطرح لك البركه في القعود وفي حلالك

وعلى فكره القعود بعد ثلاث سنوات يضرب والله يريك منه مايسر خاطرك ويمنحك منه الابكار الغوالي

بالنسبه لسؤالك والله اني ادور له جواب وخاصه من اهل التجربه امثال اخونا الغالي عبدالمحسن المقاطي

وباقي الربع مراح يقصرون علينا باي توجيه ونصيحه ..

بالنسبه لي انا عندي قعود سنه مفرود و خمس اشهر عزلته من اماته في شبك حديد عرض 12متر و طوله مترونص

وقللت عليه العلف اعطيه في الصباح برسيم وفي العشئ برسيم و مكعب فقط لاغير علشان ماينتفخ بطنه ويردم شحم

بالنسبه للشعير انا اشوف انه ماله لزوم اذا صحت القعود طيبه وسنامه مرتفع لان الشعير يردم شحم ...

هذي وجهت نظري ولا استغني من اراء اخواننا لتعم الفايده

ابيض وجه ياعبدالعزيز على هالموضوع الطيب

رد: افضل طريقه للعناية بالمفرود ؟؟؟؟

السلام عليكم ورحمة الله وبركاته

الله يباركلك ياعبدالعزيز فيما اعطاك وجعلك تشوف منه الغوالي

مايمنع انك تعطيه حليب في طاسه يشربه تخصص وحده من الخلفات وكل يوم تحلب له إلا بينفعه وان ماعطيته

مامن ضرر إن شاء الله بس عليك بالبرسيم والشعير او مكعب الغدير لانه طيب

واود أن أشكر الاخ سيف القحطاني على ثقته

رد: افضل طريقه للعناية بالمفرود ؟؟؟؟

وعليكم السلام كل باسمة

مشكورين وبيض الله وجيهكم

اخوي خالد الحجي
أخوي سعدون بن نايف العتيبي
اخوي سيف القحطاني
اخوي عبدالمحسن المقاطي

الف شكر ومنكم نستفيد ونطور حلالنا ، الله لا يحرمنا منكم ومن جميع الاخوان في المنتدى
الذي اقف عاجزا عن شكرهم والثناء عليهم وذكر حسناتهم والفوائد التي يستفيد من دخل هذا الموقع وتصفح وتابع المواضيع اليوميه المطروحه

وانا على صدد ان اجمع وارتب وانقح ما ذكره الاخوان وسيذكره الاخوان فيما بعد كل ما يخص :ـ
(العناية بالمفورد حتى سن البلوغ) . وان شاء الله يكون قريب بإذن الله تعالى

كل الشكر للاستاذ/ سيف القحطاني والاستاذ/ عبدالمحسن المقاطي وبقيت الاخوان على دعواتكم (الله يقبل منكم) وتوجيهاتكم السديده النيره .

وننتظر المزيد من الخبرات والتجارب لعل الله ينفع بها من سمعها او قراءها

والسلام عليكم اخوكم / عبدالعزيز الفضلي

رد: افضل طريقه للعناية بالمفرود ؟؟؟؟

مساء الخير للجميع
الله يبارك فيه
الاخوان كفو وفو
بس نصيحة لا تخليه في الشبك فكه مع امهاته لان الشبك يدمر الحاشي

رد: افضل طريقه للعناية بالمفرود ؟؟؟؟

اخوي مشاري
الف شكر على مرورك ودعواتك
و النصيحه في محلها

رد: افضل طريقه للعناية بالمفرود ؟؟؟؟

السلام عليكم ورحمة الله وبركاته

عندي قعود عمره سنه وثلاثه شهور

اعلفه في الصباح برسيم والمساء اعطيه نخاله

في الليل احطه في شبك لحاله وياكل لحاله لأن البل تطرده ولا ياكل معها

وفي النهار افكه مع البل يسرح معها لأني سمعت نصائح كثيره تقول ان القعود اذا حبس في شبك ما يطول وعلى العكس اذا مشى كثير يزين حاله ويطول

وتقبل مروري

رد: افضل طريقه للعناية بالمفرود ؟؟؟؟

اخواني انا طرحت تجربه لي تحت هذا الرابط

http://www.mzayan.com/vb/showthread.php?t=38926

وهي مفيده جداً للعنايه بالمفرود

وحبيت افيد الاخ صاحب الموضوع فيها

والله يكتبلنا وياه الاجر

رد: افضل طريقه للعناية بالمفرود ؟؟؟؟

السلام عليكم
انا جربت الاعلاف اما للتسمين وتبي غذاء مفيد كثرته الحركه ماكو فايده وسعله الشبك ولا تخليه يسرح بعيد
وفي خلاطته نخلطله نجرش شعير وفول صويا وذره ولا تنقعه عنده زاود على ان مايزيد واجد والبرسيم خله ناقع عنده وسلامتك

رد: افضل طريقه للعناية بالمفرود ؟؟؟؟

السلام عليكم ورحمت الله وبركاته
بالنسبه للحليب مفيد للمفرود بس نصيحه لاتعطيه من يدك ولاتقرد القعود لانه يخرب طبعه
وعليك بالشعير المجروش والبرسيم وخله يسرح مع البل لين يصير لقي
ثم اشبكه وعلمه على القيد والهجار ولاتربطه لين يتعدى جذع
لان الربط قبل يجذع يسبب له دنه

رد: افضل طريقه للعناية بالمفرود ؟؟؟؟

عليك بــــ مكعب الوافي و البرسيم


و الله يوفقك



و شكرًا

رد: افضل طريقه للعناية بالمفرود ؟؟؟؟

1] خله يسرح مع البل حتى تنطلق اعظامه ويرتفع فوق اهم شئ .
2] اطعمه لحاله حتى يشبع في المساء والصباح ولاتخصص شئ يمكن ينقطع عنه بعد فتره .
3] اذا صار حق علمه على القيد .
هذا على عجاله

رد: افضل طريقه للعناية بالمفرود ؟؟؟؟

الله يبارك لك فيما أعطاك يا بو إبراهيم

للعناية بالقعود
عليك وضعه بشبك نظيف .. وأحرص على نظافته دائماً
جلل القعود وحاول كل ثلاثة أيام إلى خمسة أيام تفك الجلال وتنظف القعود ثم تعيد الجلال
أعطه إبرة الجرب (( دكتوماكس )) الزرقاء بمقدار 12 مل وأعيد عليه الجرعة بعد 14 يوم
أكرمه بالبرسيم وخله دايم ناقع في الحوض
العشاء .. عليك بمكعب الصوامع وإذا كان غير متوفر عليك بالشعير الحب.
وعقبه طبعا البرسيم.
الضلال وخصوصا في أوقات القيض أمر مهم.
خله قريب من البل ولا تشبك عليه على طول حاول أنك تفكه يسرح مع البل كل ما خذيت
إذا حقق القعود علمه على القيد ولا ترصغه .. المرصاغه تخرب طبعه
إذا نويت تقيده .. طول القيد عشان يتعلم على القومه لأن القيد القصير راح يضره في بداية الأمر
دائما أحرص أن يكون مكانه نظيف من القردان
ورش محله بالجره كل أسبوع
وحاول أنك تغيير محله كل ما خذيت ويكون في أرض صلبه نوعا ماء حتى ما ترتخي يده لا سمح الله

هذا ما لدي في الوقت الحالي

وسلامتك