سنام القعود ما طلع !!

[align=center]السلام عليكم ورحمه الله وبركاته

أسعد الله جميع أوقاتكم بكل خير يالغالين
أنا عندي استفسار بسيط

وان شاء الله انكم تدلوني وتشورون بالشور الطيب
واللي عنده نظر أو خبره لا يبخل علينا

قعودي طالت أعماركم على الطاعه ان شاء الله
لي سنه شاريه والحين صار عمره لقي
وسنامه ما طلع وارتفع
علمـاً بأنه يشبع عندي وله شبك بلحاله ومعلف خاص به
وعلفته الوافي والبرسيم وهالأيام صرت أعطيه طاستين في الصبح أو في المغرب

هذا علم القعــود وباقيها عفاكم[/align]

يفيدووونك النشاما

طيووور شلوى اهل البل

وعليكم السلام ورحمة الله وبركاااته

وعلى حد علمي المتواضع

ان بعض الحلال لو تكرمه ليل مع نهار مايظهر سنامه خلقه من الله

ويسمونها اهل البل (العرااا)

خل البرسيم قار عنده بالمعلف شهرين وبتشوف الفرق .....

اكرم القعود بالبرسيم بالذات ...

الخبز اليابس

القعود حسب الاعراض اللي ذكرتها ان فيه دود

وطريقة العلاج:
حبوب لدود من الصيدليه ، حط له ثلاث حبات في خبزه وعطها القعود مع الصبح
وبعد سبوع كذالك نفس الحاجه


حتى يقضى العلاج على الدود بشكل نهائي .



ملاحظة: الحبوب مالها اعراض جانبيه ومن المستحسن انك تعطيه كورس اما نفعته ولا ماهي بضارته

انا مع اخوي حمد في كلامه ولاتخسر في طعامه قبل تنظف بطنه

اذا قعودك مافيه ديدان وانا انصحك تجرب الحبوب مثل ماقال اخونا حمد لانها فعلا ماتضر

جرب تعطيه حلبه + حبه سوداء لها مفعول طيب جدا

الاخ سعد الشمراني

مشكلتك هذه عانيت منها لدرجه انهم قالو لي بعيرك(( اعر )) يعني خلقيا ما يطلع له سنام

وسألت ودرست الموضوع وتأملت والحمد لله وجدت الحل وفي 50 يوم سنام البعير صار
طوله نص متر اطول ما فيه سنامه

اقطع الوافي والمركز والشوار ممنوع ياكلهم البعير

فقط شعير ويفضل تنقع الشعير ساعه وكل ما يخلص الشعير
تعطيه على طول شعير والمغرب تعطيه برسيم
ولا تعطيه وافي ولا شي
وسوف يمتنع عن الشعير ضع قليل من الملح مع الشعير
ملاحظه الشعير على طول اليوم مدار الساعه
وسوف تلاحظ الفرق بعد عشرين يوم راح يتغير عليك البعير

اخوي عط القعود ابره جرب وبعد اسبوعين اعدها عليه وعطه بالصباح لبنه برسيم وبالمساء عطه شعير مضغوط وباذن الله بيتغير عليك القعود .

تمنياتي لك بالتوفيق ...

نعم انا مع نواف العازمي ... صحيح كلامه

ارخ عليه الشعير المجروش ... وامنعه من المكعب لانه يزوده لحم ويروحه في عرض

لكن الشعير يزيد شحمه ويزرق عظمه ... (فااللي بيقني يعلف شعير واللي يسمن يعلف مكعب)

بيض الله وجيه كل من رد وشاركني واهتم من موضوعي :

الأخـــوان الأعزاء الأفاضل:

قاسم ابن صنيتان
لا هنت على المرور

نادر العتيبي
مشكور على مداخلتك

بدر الذيابي
لا هنت يا ذيبان ومعلفه كما ذكرت
البرسيم ما يفارقه

محمد سالم اليامي
إن شاء الله اني أجرب الخبز اليابس

حمد بن دخيل
بيض الله وجهك على النصيحه
وأنا كلمت الدكتور البيطري
وأيد الفكره جداً وانا منسق معه يصرف لي هالحبوب
وبأروح ان شاء الله آخذها
ورايتك بيضاء يالغالي

بخيت البريدي
لا هنت يالغالي على المرور والمشاركه

مناحي العتيبي
جربت الحلبه وكان لها مفعول طيب في غير السنام

نواف بن جندل العازمي
الله يعطيك العافيه ويبارك لك في حلالك ومالك
عزا الله انك ماقصرت يا بعدي
وإن شاء الله سوف أقوم بنقل تجربتك على قعودي
والله يكتب اللي فيه الخير
ورايتك بيضاء يالغالي

عبدالله العلي
لا هنت يالغالي ومشكور على مرورك
وعلى نصيحتك ورأيك

سعد فهيد الجبري
بيض الله وجهك انت ونواف
مشكور على المرور والنصيحه
رايتك بيضاء يالغالي