الموضوع خطير تكفون

اخوي عبدالله الاخوان ماقصرو وهذي عادتهم جزاااهم الله خير

بس عندي اضافه الدود سهل حله وذكروه الاخوان والشري تراه طيب له

والبنسلين للجرح طيب بالحيل كل يوم عطها 30 سانتي

مشكووور أخي مناحي وحفظك الله
الدكتور يقول لاتزيد البنسلين عن 15 سم هل صحيح
وبعدين وش هو (الشري)
وكيف الطريقه

انا صارت معي هذه الحاله
وغسلت الجرح بماء وملح

وارشه بالعايدين البنفسجي
لمده شهرين وسلمت الناقه
وكانت تبرك على جنب والحين سليمه
وبدون ابر ولا انصح باللفاف لانه يعفن الجرح

مشكوور يانواف حفظك الله
ولكن الحاله اللي حصلت عندك هل هو شق الجلد حتى ترى العظم
انا عندي كذا وبمسافة حوالي 20 او 25 سم طول

الشري اخوي عبدالله عشبة ماياكلها الحلال وتنبت الحدج واضن من اسماها الحنضل
هو فعال في قتل الدود بس مدري يساعد في خياطة الجروح ولا ماعندي علم ومجربه انا شخصيا في خلفة كانت عندي مرسنها وغفلنا عنها ويوم فكينا الحبل الا هو مسوي فيها جروح تروع وكلها دود
لدرجة اني قلت الناقة ماعاد فيها طب وتوقعت انها تموت وكان عندنا شايب واخذ ورق الشري وحشى الجروح وعيت خير بعده

والمسمار ( العويدي ) تراه طيب لخياطة الجروح
اما بخصوص البنسلين اسئل الاخوان بيفيدونك اكثر بس تجاربي انا ماعمري عطيت المطية الكبيرة اقل من 25 سانتي ابد

سلام عليك اخوي عبدالله.... الربع ماقصرو وكل واحد على حسب علمه وخبرته واجتهاده ويعطيهم العافيه.
لكن انا العام عندي ناقه ذلول طيبه وقطع القيد يدها لدرجه انك تشوف العظم وحصلت فيها ذا الدود الابيض الصغير بكثره وغسلتها بالديتول ولامات الدود.
وبعد ذلك استعملت الطريقه التاليه:
1- قدح حطيت فيه ما وديتول وصبيت حاجه بسيطه جدا جدا من الجره (السم) فقط ريحه حتى يقتل الدود واسحب بابره وادفعه في الجرح حتى اضمن دخوله في الجرح اغسل الجرح صباح ومسا.
2- فوحت العويدي وخوا جوا في دهن وخليته يغلي وبردته وحطيته في قاروره (وكثرته حتى يكفي لمده طويله) وصبيته على الجرح فقط صباحا بعد الغسيل.
3- ايدين ازرق بعد الغسيل فقط مسا.
4- استعملت المضاد الحيوي في بدايه العلاج وقفته بعد ما خلصت الجرعه.
استمريت على العلاج شهرين حتى سلمت وجعل تسلم ناقتك.

مشكووور ياعلي حفظك الله
ايضا الشكر للجميع
انا لم اجد المره الا اليوم واشتريتها واخذت عويدي
وان شاء الله ابدأ اعالج بها اليوم

فيه بخاخ ازرق في البيطره تراه كفيل بتنظيف الجرح من الجراثيم

الاخوان كفو ووفو وبيض الله وجيههم
الزيت اللي بيخلط مع الدوا رايي انه يكون سمن الغنم

مشكورين جميع
انا بدأت بالعلاجات وان شاء الله فيه تحسن

السلام عليكم

انا عندي ناقه كان جرحها نوعا ما بسبب الوسوم عن الكعب ..

وعندي الوالده مسكت زجاجه ماي .. وحطت فيها ملح مع ديتول " اخضر للاستعمال الشخصي " .. وتمت تخلطه وتسوي ثقب في الزجاجه من فوق ... وتمينا نرش الناقه بماي وملح وديتول اخضر

مع البخاخ البنفسجي عن الجراثيم ..

وما شاء الله .. تم الجرح يبرى .. شوي شوي .. بس مثل ما قالوا الاخوان .. في الشتا صعب انه يبرى الجرح بسرعه

هذا بالنسبه للتطهير .. اما عن البرا او التءام الجرح يعداك الكذب .. ما عندي خبره فيه .. بس هذا بالنسبه للتطهير ..والله يقوم ناقتك على خير

مشكور اخي مبارك
واسأل الله ان يبارك لك وللجميع فى حلالهم

اخوي / عبدالله مع التحية
اسآل مجرب ولا تسأل طبيب
الاخوان ما قصروا لكن اقول من خلال تجربة
انثر على محل الدود (كرمع) ويدبغ الجرح بالمره !!!!
وتقبلوا مروري ...

هلا اخوي ناشي
مشكووور على التعاون
ابشرك ماعاد فيه دود
اما الجرح فلايزال كبير ويوميا نعطي علاجات واللي فيه خير يجيبه الله

اخوي عبدالله الدايزنون مبيد حشري فسفوري قد يزيد من حالة التسمم في الجرح المفتوح

انصحك بابرة البنسلين 20 سم لمده اربعة ايام

ومرهم الفيوسدين من الصيدلية البشرية ( يقتل البكتيريا والجراثيم بالجرح )

ولازم يكون البنسلين 20 سم اذا الناقة من جذعة وفوق 15 سم تكفي لعمر لقية فقط

واطحن المره وذرها في الجرح بدون لفه

والمره بتكون وتصير مثل قشرة الجرح وتسكره

واذا التعفن قوي وتخاف انه يصير غرغرينه

استخددم مع المره ثوم

وانتبة الثوم قوي جدا وياكل اللحم

يعني لو تربطة على الجرح يمشي وياكل اللحم

والثوم يحطونه ويربطونه اذا صار تعفن شديد على وشك غرغرينة

واتوقع ان شاء الله المره تنفع معك مع البنسلين

ولايقربها من معه طيب عشان ماتزيد حالة التسمم بالجرح


وحطها في مكان نظيف