البعير ماهاج؟ ويالله يشيل كرشه!

السلام عليكم ورحة الله وبركاته
اخوني مرتادي منتدى مزاين بعد التحايا
باختصار البعير سنه رباع ولاهب كرشه يالله يشيلها
بداية الموسم هب هبه بسيطه وتعاشر عليه بعض البل
وفكيته يوم الخميس يبرك ويرده كرشه والبعير مهوب هايج
عكس السنه الماضيه
وياليت تستبعد الابر حقت الهياج ابي حلول شعبيه

والكل يقول تجربته
اخوكم محمد التميمي

تو الوقت اخوي محمد بعض اللبعارين للحين ماعصب وانصحك لا تهده ابد وبطنه كبير قد يضر البعير وينبعج

من الحلول الطيبة ولها مفعول ملموس خل الرعيان يروشونه الصبح بدري ومع المغرب لمدة اسبوع او عشرة ايام ويخلونه مربوط عن امهاته واذا برد ضهره بيعصب باذن لله

مثل ما قال اخوي مناحي بعض الركاب ما قفل وانا اقترح عليك ان يسرح مع اماته بقيده اما الرش بالماء في هذه الايام قد يسبب النحاز

اربطة ولايطلع مع امهاتة وقطع عنه البرسيم والحشايش وعطة شعير قليل في المساء فقط وابعد الماء عنه واذا في فحل قريب اربطة عندة وهدة مع الابل وانشاالله تشوف انتيجة

يامحمد اذا عندك قعود ثاني حق او لقي فكه مع البل يومين او ثلاثه وخل البعير مربوط وبتشوف كيف يتغير وبيقفل ان شاءالله ؟؟

اربط بعير قريب منة وخفف العلف عنة وعطة بس شعير قليل

البعير ماهاج

الاخ محمد بعد التحية بالنسبة لاهيجان البعير اذهوهرش طبيعي يتاخرواذ هوشبب اربط قريب منة بعير ثاني

اويد ماقاله الاخ مناحي

بالاضافه الى اذا كان فيه هياج اظربه على المبرك وعطه شعير بدل البرسيم

ودخل عليه البل اللي تعرف انها مياسير داخل شبكه وهو مربوط

وفي الاخير بعض الركاب قروه متاخر اي انه مايعصب الا في اخر الوقت

ياخوي فيه بعض البعارين شتوية وهي اللي تهيج اول الصفري
وفيه الصيفية اللي تهيج عقب المربعانية ولاكن احذر احذر احذر تظلم البعير
وتهده وهو مهوب هايج تجيه الظليمه ومايلقح يضرب ولا يلقح عليه شيء
وعلاجها تروشه بالماء ويسلم ان شاء الله .

الحين كل اللي عليك تدقه بالمجول جنب شبك الابل وتفك عند الابل قعودن لقي يتكرف الابل ويهدر عندها
والبعير مايهيج الا ان كان عنده ابل مهوب ناقة ولا ناقتين