رايكم ياجماعة من عنده خبرة لا يبخل علي تكفون

السلام عليكم ورحمة الله وبركاته
الموضوع سلمكم الله البل عندي بدى يظهر بها خراريج شيء بالديد وشيء حول النحر وكل يومين اشوف لي وحده جديدة ظاهر به المرض
علما ان اكلهم مكعب الصوامع وتبن اعزكم الله وتسرح بالبر ومن سنين ماتغير أكلهم برايكم وش يكون السبب وبأيش تنصحوني لعلاج المصابات ووقاية الي ماجاه شيء لها الحين
علما اني سبق وجربت انظف الخراريج بماء اكسجين وطقيت بنسلين طويل المفعول لمدة اسبوع وماجاب نتيجة افزعوا لي يالربع بأفكاركم وخبراتكم واسف على الإطالة.

وش دعوى يالربع عسى ماني مزعل احد الى هالحين ولا رد على الأقل لومجاملة!!!!!!!

اخوي عبدالله غير العلف معروف المكعبات اذا طولت عليها البل تجيب الخواريج
بدلهاى بعلف ثاني وجرب

الله يشفيها يا أبو عبدالعزيز والله لايجيب الزعل يا أخوي حنا كلنا بالمنتدى أخوان ولكن بعض الأعضاء ممكن مايكون عنده خبره ويطلع عالموضوع ولايرد ومثل ماتعرف الايام هذي أيام الكشتات والمزاين وأكثر الاخوان مايكون متواجد بالمنتدى
وخلك شمالي(وسع صدرك) سم طال عمرك

الخواريج من المكعب وخااااااااااااااااااااصه الوافي <<<<< والله لحاربهم دامني حي لعب في ابلي والى الحين وانا اعاني من هالمشكله مع اني قاطعه فتره طويله
الحل ياطويل العمر يبي له عصبة راس
ان كان الخراج يطلع صديد فأنتظره لين ينفقع من نفسه او انت بالموس أفتحه ونظفه زين بالماء والملح ولا يبقى منه شي وأحشه بالعويدي والملح وبخه بالبخاخ الأزرق بخفيف عشان مايطلع اللي انت تعبت فيه واللي انت طلعته من الخراج ابعده عن المراح لأنه يعدي
انا جربت هالطريقه وانجحت معي ميه في الميه
وأي استفسار انا حاظر

أقطع المكعبات وغير العلف وعط الابل كبرت أصفر الملح

السلام عليكم
من واقع تجربه انا وجاري نطعم مكعب اول الوافي والحين الصوامع من حوالي 8 شهور
انا احط لكل 15 ناقه كيس يعني 30 كيسين
وقصيري يحط لكل 10 كيس يعني 30 ثلاثه اكياس
والا ن يشتكي من الخرجان يقول كثرت بالبل وكل يوم تزيد
وانا والحمد لله ماطلع عندي شي نهائيا ولا شفتها
فانا اتوقع ان سبب ضهورها هو زيادت كمية المكعب على الابل

والله اعلم

اقطع الوافى اقطع الوافى اقطع الوافى عزالله ماهو بوافى مرت عليه نفس المشكله وقطعت الوافى وعينت خير وبالنسبه للخراج انتظر لين يطلع الراس وبعدين نظفه ورشه ملح والبخاخ الازرق وبأذن الله ماتشوف الا العافيه ولا تنسى الوافى ترا اسمه الجديد( خراج صافى )

اشكر كل من تجاوب ورد على واقول بس يا اخواني بارك الله فيكم لي اكثر من سنتين ما عطيتهم وافي انا اعلفهم مكعب صوامع مع التبن وانتم بالكرامه متوفر على طول وتسرح البل في البر

[منذر الدوسري]

مكعب الصوامع والا اي مكعب
لا يقرب البل غير العلف والشعير
تراه المكعبات كلها بلاوي وامراض مالعب بالبل الا الأكل والوقايه خير من العلاج
لآنك تعرف طريقه تصنيع المكعبات يدخل فيها مواد كيمائيه وبعض مخلفات وبقايا الحيوانات مثل
الأشياء الغير مرغوبه من بقايا الدجاج وغيرها كما يتم إضافه اليوريا لزيادة البروتين

يعني ابعد عنها وخلك بالشعير افضل 100 مره
ولا تكثر الشعير يجيب المالطيه

عسى الله يبارك للجميع في حلالهم
لي خبرة طويلة في علاج الخرجان وأفضل علاج لها خصوصا المطولة منها توسم راس الخراج أو الناجمة برزة عريضة شوي (1سم×1سم) وتكون حامية حيل (حمرا) وتكبر الوسم أذا الخراج كبير وتصبر على الوسم لين ينفتح وبعدها تنظف بماء اكسجين وترش بعدة بالفليت الازرق المصري اللي لة أنبوب يتركب في البخاخ مرة في اليوم لغاية ماتختفي