من اللي بيفيدنا ويشور علينا

بسم الله الرحمن الرحيم
السلام عليكم ورحمة الله وبركاته
يالربع ودي باللي يفيدني عن وحدة من النياق عندي فيها زي الانتفاخ او الورم قدام ديوسها
وش الدبره معها ووش اللي فيها بالضبط
والشي الثاني بعض النياق تستنكر عيشتها وسرحتها مقارنة بالابل الاخرى هل لها حل
ولكم جزيل الشكر ........

مرحبا يا خالد

1- الورم هل مثل الوريد في البطن كامل جزء صغير
2-بالنسبة للناقة هذا شي طبيعي وعادي جداافي السرحه او غيرة

[align=center]
هلا بك اخوي جابر واشكرك على تفاعلك وسرعه تجاوبك

وبالنسبة للورم هو قدام الديوس زي ماذكرت من قبل وهو بكبر كف اليد تقريبا

واعيد واكرر شكري لك وللجميع
[/align]

إذا تحس إن شهيتها للأكل متغيره وحالها متغير حاول تعطيها إبرة هيام الفرنسيه ضروري ولمدة ثلاث ايام بنسيلين ضروري

[align=center]
اشكر اخواني اللي تفاعلوا معي والله يجزاهم خير
لكن يالربع محد افادني بالضبط وش وضع ذا الورم هل منه خطر او وشو بالضبط
[/align]

اذكان الانتفاخ في بكراول ولده لها فانه طبيعي ان شاء الله ولامنه خوف

الأخ العزيز خالد

مثل ما قالك الأخ بندر

إن كان الناقة بكر .. فهذا أمر طبيعي جداً
وما عليها شر.

وسلامتك

اذكان الانتفاخ في بكراول ولده لها فانه طبيعي ان شاء الله ولامنه خوف

[align=center]
الله يعطيكم العافية
وبالنسبة للناقة ليست بكر وسنها سديس
[/align]

اسمع ياخالد هناك حالتين للانتفاخ امام الديس :
1_ ان يكون الديس متورم بالاصل نتيجة التهاب اوقرصه او انها باركه على نجاسه وهذا حله بسيط اغسله بالما البارد الصبح والمغرب كم يوم ويروح او هناك مرهم فالصيدليه يعالج هذي الحاله
2_ الهياممممممممممممممممممممممممممممممممممممممممممممم مممممممممممممممممم
وهو انك تشوف وريم الديس يزود والورم ياصل الى سر الناقه والى زورها والى نحرها والبطن منتفخ والله يعينك عليه

[align=center]

يابو رشيد
والله اني ما اشوف بين عيوني الا الهيام وذال انه يصير هو اللي بها
وابي احد بس يكذبني ويقول ما بها الا السهالات وهي انشاء الله كذلك

بس اللي مريحني ان الورم من فترة وهو بنفس المكان وماجد فيه اي جديد ولا تعدى محله
[/align]

عليك بالما البارد ايام وشف وانشاالله ماعليها الا العافيه

[align=center]
الله يجزاك بالخير يابو رشيد
ولا يريك مكروه في حلالك ومالك وعيالك
[/align]

السلام عليكم ورحمة الله وبركاته

اخوي اذا كانت الناقه لقحه عادي يحصل في بعض الابل والورم خفيف يجي قدام الديس شوي فقط واذا كانت الناقه خلفه هذا انها جالسها على مكان نجس او قرصه او دود ممكن وهل انت شاري الناقه جديده عندك او الناقه قديمه عندك ؟؟ وممكن يكون بدايه هيام والله هو اعلم ولابد استشاره دكتور في الابل فاهم شي يشوفها دكتور على الطبيعه افضل لك اخوي ,,

[align=center]
الله يحفظك ويجزاك بالخير ياعبدالله
وبالنسبة للناقه فتوني شاريها من فترة وهي خفوت على اول الشتاء على كلام راعيها
[/align]