ناقتي ظربت اليوم هل أحلبهاأم أتركها؟

ناقتي ضربت اليوم 24/7/1431 وفيه ناس يقولون لا تحلب ابدا لأن الحليب يؤثر في التلقيح (ما يخليها تلقح )
وفيه ناس يقولون أحلب ما عليك ما له تأثير
ماأدري من أصدق أفيدوني واكن لكم من الشاكرين

الاخ سعود شمل الناقه النهار كله وفكها ساعتان ورجع شملها اليل كلة ومع الصبح افواق لمدة اثني عشر يوم

حسب علمي مايضرها الحليب ابد والله يرزقك الخير ان شاء الله

عندي ناقه ولدت واحلبها واشرب حليبها وبعد 18 يوم ضربتها ولله الحمد عشرت واحلبها ولكن اكرمها وادخلها الشبك قبل البل واخليها تاكل على راحتها

وبعدين بعت ولدها يوم صار عمره ثلاث اربع شهور علشان ما يتعبها وللعلم سنامها خف ونشف بشكل سريع ولهذا بعت ولدها

هلابك .. احلب واشرب ولا عليك ان شاء الله .. بس بشرط أنك تكرم الناقه ولاتقصر عنها العلف .. واذا عشرت لكل حادث حديث .

انشاء الله مايضرها

بس وانا اخوك مهوب بدري الضراب هالوقت

حنى في الصيف وولادها ان كان الله كتب لها عشار

في القيض السنه الجايه في هالحر بيضر الحوار وامه

عموماً الله يكتب لك الي فيه الخير ويرزقك من واسع رزقه

حلب الناقة مايضرها حتى ولو بعد العشار ولو كان ذلك صحيح ماكان لقيت ابل مكسبة وبعضها يقعد حوارها يرضعها 6 شهور وهي لقحة

ولكن اهل البل ذا الايام كل منهم يطلع بعلوم جديدة ماقد سمعناها من قبل

واضم كلامي لكلام عبدالمحسن فالقاح في مثل هذا الوقت غير مرغوب فيه عند هل الابل لشدة الحر وتأثيره على الحوار

أشكر لكم تفاعلكم والله يوفقكم جميعا
والشكر موصول للقائمين على هذا المنتدى الرائع