س/ 3 سنين لقاح متوالي . هل يضر ؟

ناقة لاقح في خلال 3 سنين ونص بمعنى تلقح سنة وترضع شهر أو شهرين ثم يضرب عليها ويكون محصلة ما أنتجته خلال 3 سنين ونص 3 حيران خلافا للقاعدة 6 سنوات بمعنى تلقح سنة وترضع سنة

وخلافا للمعروف لا تضرب بعد التكسيب

فهل سمعتم بهذا وهل يضر توالي اللقاح على الناقة في 3 سنين أو حتى 4 سنين

ولكم جزيل الشكر

رد: س/ 3 سنين لقاح متوالي . هل يضر ؟

اللي اعرفة ان ولد الكساب سواء كان بكرة او قعود يجي حجمة اصغر

يعني عندك ناقة خلفة وكسبتها وناقة حايل ولقحة بعد سنة تشوف ان ولد الحايل اكبر واجبر عظم وهيكل من ولد الكساب

اتمنى اني وصلت لك الصورة

وهذا اللي اعرفة

ان اصبت فمن الله وان اخطيت فمن الشيطان

رد: س/ 3 سنين لقاح متوالي . هل يضر ؟

الاكساب يختصر عليك وقت طويل
ولاكن ياخذ منك النتاج الزين اذا تبحث عن زين الانتاج(مزاين)
في اول الزمان يقال اذا البل كثرت يقولون شيبانهم اكسبو بالبل (لان سبحان اللة تقل بركتها) بسبب المراعي
اما في هذا الزمان البرسيم عند خشم الناقة ولا عليها قاصر ورادم شحم تستطيع ان تغذي الي تحتها والي في بطنها
وهو فية نقطه ياخذ من الحوار جمالة و زينة فقط

رد: س/ 3 سنين لقاح متوالي . هل يضر ؟

كلام الأخ بدرلاعطاوي صحيح

و هذا حصل معي من واقع التجربه

والسلام

رد: س/ 3 سنين لقاح متوالي . هل يضر ؟

اللي اعرفة ان ولد الكساب سواء كان بكرة او قعود يجي حجمة اصغر

يعني عندك ناقة خلفة وكسبتها وناقة حايل ولقحة بعد سنة تشوف ان ولد الحايل اكبر واجبر عظم وهيكل من ولد الكساب

اتمنى اني وصلت لك الصورة

وهذا اللي اعرفة

ان اصبت فمن الله وان اخطيت فمن الشيطان

الأخ بدر بارك الله فيك

لا هنت وضح لي أكثر إللي باللون الأحمر لأني ما فهمت قصدك ، وش لون جت ناقة حايل ولقحة ، الناقة إما حايل وإما لقحة هذا إللي أعرفه

والكلمة الأخرى ولد الحايل الحايل ما يكون لها ولد إلا ضيار وأنا لم أقصد هذا

على العموم السؤال إحتمل شقين الشق الأول وهو ضرر لقاح الكساب على حيرانها وهذا أجبت عنه أنت بارك الله فيك

والشق الآخر وهو الذي لم تجب عنه وهو الذي أريده أنا بالتحديد الإجابة عنه

هل لقاح التكسيب في عاميـــــ2ـــــن متواليين يضر بالناقة

بمعنى تلقح وتنتج وترضع شهر ، ثم تكسب وتنتج وترضع شهر ، ثم تكسب مرة أخرى وتنتج وترضع سنة

** مربط الفرس / هل يضر هذا اللقاح المتوالي ثلاث سنين ورا بعض على الناقة أم لا ؟

هل سمعت هل أحد جرب هل يضر

السؤال أرجوا أن يكون واضحا لبدر ولغيره

ومشكور ياأخ بدر والله يعطيك العافية

رد: س/ 3 سنين لقاح متوالي . هل يضر ؟

الاكساب يختصر عليك وقت طويل
ولاكن ياخذ منك النتاج الزين اذا تبحث عن زين الانتاج(مزاين)
في اول الزمان يقال اذا البل كثرت يقولون شيبانهم اكسبو بالبل (لان سبحان اللة تقل بركتها) بسبب المراعي
اما في هذا الزمان البرسيم عند خشم الناقة ولا عليها قاصر ورادم شحم تستطيع ان تغذي الي تحتها والي في بطنها
وهو فية نقطه ياخذ من الحوار جمالة و زينة فقط

مرحبا بفواز

أفهم من كلامك طال عمرك إن الناقة ما يضرها إذا لقحت ثم كسبت مرتين أي أنها تلقح في ثلاث سنين متوالية

ويعطيك العافية

رد: س/ 3 سنين لقاح متوالي . هل يضر ؟

كلام الأخ بدرلاعطاوي صحيح

و هذا حصل معي من واقع التجربه

والسلام

بن جليغم شاكر لك جزيل الشكر على المشاركة


تحياتي

رد: س/ 3 سنين لقاح متوالي . هل يضر ؟

فيه أحد الزملاء عنده أبل عددها يتراوح مابين الثلاثين إلى الاربعين ، وله في البل سبع سنوات ونظامه اللي هو ماشي عليه تكسيب الناقه بعد شهر ونصف أو شهرين وحيرانه ماشاء الله زينها ماراح وأنا أمس عنده وشبك الحقايق واللقايا وحتى المفاريد بصراحه مزاين مافيها الشين ولا الوسط حتى .
لكن الملاحظه اللي شفتها عنده وحتى سألته عنها وقعد يضحك وهي ( مافيه ناقه عنده ديسها يوسع الصدر وشكله مثل الناقه اللي ماتكسب ) يعني تلاحظ ديوس نياقه مجلوده جلد ماشاء الله ماتفصل ،، بمعنى شكل الديد ذابل وخلوف بعضها كبير يعني مكدود كد بمعنى مهوب نظر . مع أن البل تسرح يوميا من الصبح إلين العصر .
هذا شي شفته أمس القريب .
أما ضرر الناقه ماهقيت أن فيه ضرر .

رد: س/ 3 سنين لقاح متوالي . هل يضر ؟

فيه أحد الزملاء عنده أبل عددها يتراوح مابين الثلاثين إلى الاربعين ، وله في البل سبع سنوات ونظامه اللي هو ماشي عليه تكسيب الناقه بعد شهر ونصف أو شهرين وحيرانه ماشاء الله زينها ماراح وأنا أمس عنده وشبك الحقايق واللقايا وحتى المفاريد بصراحه مزاين مافيها الشين ولا الوسط حتى .
لكن الملاحظه اللي شفتها عنده وحتى سألته عنها وقعد يضحك وهي ( مافيه ناقه عنده ديسها يوسع الصدر وشكله مثل الناقه اللي ماتكسب ) يعني تلاحظ ديوس نياقه مجلوده جلد ماشاء الله ماتفصل ،، بمعنى شكل الديد ذابل وخلوف بعضها كبير يعني مكدود كد بمعنى مهوب نظر . مع أن البل تسرح يوميا من الصبح إلين العصر .
هذا شي شفته أمس القريب .
أما ضرر الناقه ماهقيت أن فيه ضرر .

أشكرك على المشاركة يا سلمان ومشاركتك مختلفة عن الإخوان المتقدمين من ناحية ان الحيران ما تتردى للشين بناء على شوفك ومشاهدتك على ما تقول (( بالأمس القريب ))

لكن تقول ليس هناك ضرر على الناقة بتكسيبها ..................... هذا إن كان تكسيبها ( عام واحد )

وأنا قلت هل هناك ضرر على الناقة بتكسيبها عامــــــين أو حتى تكسيبها ثلاثة أعوام متتالية ؟

لا أدري هل سؤالي غامض أم ليس بمفهوم

على كلن أشكركم جميعا الشكر الجزيل وبإنتظار من يصيب الهدف

رد: س/ 3 سنين لقاح متوالي . هل يضر ؟

أنا جاوبت على حسب فهمي لسؤالك .
بمعنى ( أن البعير يضرب الناقه وحوارها أبو شهرين مثلاً وتلقح الناقه ثم لا صار عمر حوارها 8 شهور تقريبا فرتدوا حوارها منها إذا هي مانفرته ثم قعدت شهرين ماشاء الله وولدت ثانيه ثم يوم صار عمر حوارها شهرين ضربها البعير مره ثانيه وهلم جر لمدة ثلاث سنوات مثل ماذكرت في سؤالك ) هذا اللي أنا فهمته من سؤالك ،،، ورفيقي هذا نظامه في نياقه الناقه ماتفصل من اللقاح والولاد يعني تريح شهرين أو ثلاثة والرجال له سبع سنوات والبل ماعليها إلا الملاحظة اللي ذكرت في ردي السابق .
وسلامتك وعساني أصبت في فهمي .

رد: س/ 3 سنين لقاح متوالي . هل يضر ؟

السلام عليكم

عندك ناقة خلفة وكسبتها وناقة حايل ولقحة بعد سنة تشوف ان ولد الحايل

انا اقول ان عندك ناقتين وحدة خلفة والثانية حايل او بمعنى اصح عشراء , بعد سنه تشوف الفرق بين ولد العشراء وولد المكسبة بان ولد العشراء

اكبر ......

السوال الثاني اللي اهو الكساب يتعب الناقة ؟ هو لاشك بانة يتعب الناقة

ولكن بنسبة لنا حنا ما نكسب الا اذا اموتت الناقة ( مات ولدها ) والا اذا كان ولدها قعود ولاهوب اللي انت تبي كسبناها

والا اذا كانت والدة بدري يعني في رمضان وجاء شهر واحد والا 2 هذاك الوقت نكسب الناقة

لان بنتها او ولدها كبر وصار ماعلية من الحليب

علما بأن فية ناس يكسبون الناقة كل سنة وابلهم ما عليها وكلا على راحتة في حلالة

ولكن اللي لاحظتة في ابلهم ان احجامها صغار

اتمنى اني وفقت في مساعدتك

رد: س/ 3 سنين لقاح متوالي . هل يضر ؟

السلام عليكم ورحمة الله وبركاته


أغلب أبله كبار أم ثالث ورابع وخامس والفاطر وأذكر بعضها من قبل خمس سنوات ولحد الآن وهي عنده وبعضها موت يوم سألته عنها . وبنات أبله فيها الجذعه وفيها الحقه وفيها اللقيه وفيها المفروده وأمهاتها موجودة .
وعددها ذاك الحين قريب من عددها الآن .
لكن كم بدا به ما أدري ولاسألته والله .

رد: س/ 3 سنين لقاح متوالي . هل يضر ؟

بسم الله الرحمن الرحيم

بخصوص سؤالك

شريت ناقة قبل 4 سنين تقريبا
خلفه مصغر ( ام ثاني ) وسنها رباع

المهم يوم شريتها ولدها جادل يمكن له شهر اربعين يوم بالكثير

واحلبها طال عمرك ولا دريت انها معشر الا بعد 8 شهور شفت نفسها شانت وطبعها تغير
وولدت عندي شهر 12 وانا شاريها شهر واحد يعني مضربها البعير بعد ولادتها مباشرة
وجابت بكرة وضربتها بعد ولادتها بشهر ونص وولدت عندي شهر 2 وجابت قعود موجود مع الابل الحين ثم اضربها البعير شهر 4 وولدها حدرها الحين

يعني اربع سنين كل سنه تلد ولله الحمد

اعتقد ان الكساب مايضر الناقة التامة خصوصا اذا كان حالها طيب والله اعلم

بس فيه ملاحظة : طبع ناقتي تغير نوعا ما وحليبها اعتقد انه نقص مقارنة بها اول سنة

رد: س/ 3 سنين لقاح متوالي . هل يضر ؟

حسب معلوماتي المتواضعه ان الكساب المتكرر مايضر الناقه المكرمه الا في شيئين:
1- يفتق ديدها بحيث يوم تلد وحليبها اقل من اول
2- يفزر ظهرها اذا تكرر يعني فقارها يشين
تقبل تحياتي

رد: س/ 3 سنين لقاح متوالي . هل يضر ؟

الأخوان





سلمان بن حمد الدوسري

بدر العطـــــــــــــــــاوي

وافي بن مليح بن موطان

حاتــــــم العمـــــــــــاري

بارك الله فيكم جميع ، بارك الله فيكم جميع ، بارك الله فيكم جميع ويا عساكم بالجنة

ردودكم وافية وتجاوب طيب وأنتم ما قصرتوا وبيض الله وجيهكم وزاد الله بعلمكم وبـــشين تملكونه

تحياتي للجميع والسلام