$$ لها يومين ما سلت $$

اسعد الله اوقاتكم بكل خير

يا أخوان أرجو الافادة لمن سبق وصارت عنده هالحاله ... ولدت عندي ناقه قبل يومين اي يوم الثلاثاء الساعه 10 الصباح واليوم الخميس كملت 48 ساعه والله يكرمكم ما نزل السلا( المشيمه ) نزل شئ بسيط وانقطع ...أمس عطيتها بنسلين 30 سم وابرة السلا وما فاد وش الحل يا جماعة الخير افيدوني

رد: $$ لها يومين ما سلت $$

ابو سعود السلا باقي شي منه برا ولا رجع داخل

رد: $$ لها يومين ما سلت $$

يا عبدالعزيز الامر عادي تصير وصارت عندي العام السابق اذا باقي شى من السلا اربط فيه ثقل

شوف لك دلاغ وضع فيه رمل قبضت يد مرتين او ثلاث واربطة في الباقي من

السلا ويتسهل الامر ان شاء الله

رد: $$ لها يومين ما سلت $$

المشكلة حلها ابرة السلا

واتمنى انها قد اسلت قبل اضيف ردي هذا
والممشى حل مساعد للابرة

رد: $$ لها يومين ما سلت $$

الله لا يهينكم على الردود

السلا ما ظهر منه الا شئ بسيط وانقطع والآن كله في بطنها

والى الآن ما طاح السلا

وبظيف شئ آخر حوارها سره عقب الولاده ينثر دم وربطه والان متحجر الدم في اول سره وش السواة معه ومع أمه ؟


وجعلكم ما تشوفون مكروه

رد: $$ لها يومين ما سلت $$

يا جماعة الخير اليوم كملت ثالث وزدات عليه وش العلم

رد: $$ لها يومين ما سلت $$

بالنسبة للسلا اذا ماطاح خذ معك بيطري يدخل على الناقة ويظهره وينظف عن الناقة لاتخليها ماراح ينفع معها لا ابر ولا شيء غير التنظيف

أما الحوار يفيدونك الشباب

رد: $$ لها يومين ما سلت $$

اخوي نصيحه لا تطولها وهيه قصيره .. جيب لك دكتور خبير للحوار لانه خطير انه السره منفتقه .. ونحنا صارت عندنا نفس حاله حوارك .. ومنه واليه العوض يفداك راح


الحين لا تطول .. كلم لك دكتور خله ايي ويخيط السره قبل لا يموت هالمسكين بعد

رد: $$ لها يومين ما سلت $$

أعطها أبرة (( أكس توسين )) 10 مل باللحم
وبإذن الله خلال ساعة راح تسلي
وسلامتك

رد: $$ لها يومين ما سلت $$

ابشركم ولله الحمد الناقه سلت حالها زين والحوار ايضا

والله يجزاكم خير جميعا ً وجعل الباس معاديكم

رد: $$ لها يومين ما سلت $$

حذفت بالشر جعله مايجينا ولا يجيكم

رد: $$ لها يومين ما سلت $$

الله يبشرك بالخير

ونبي تجربتك وطريقتك اللي كانت سبب لعلاج الناقه بعد توفيق الله

في موضوع جديد واقترح ان يكون هناك قسم صغير في عيادة مزاين البيطريه خاص بتجارب الاعضاء اللتي تكللت بالنجاح

لكي يستفيدون منها اخوانهم ويسكبون منها الاجر الكثير ان شاء الله

رد: $$ لها يومين ما سلت $$

الله يبشرك بالخير

ونبي تجربتك وطريقتك اللي كانت سبب لعلاج الناقه بعد توفيق الله

في موضوع جديد واقترح ان يكون هناك قسم صغير في عيادة مزاين البيطريه خاص بتجارب الاعضاء اللتي تكللت بالنجاح

لكي يستفيدون منها اخوانهم ويسكبون منها الاجر الكثير ان شاء الله

بعد مرور 24 ساعه على الولادة اعطيتها ابره السلا واتسللت الناقه لكن ما نفع معها

اليوم الثالث بعد 72 ساعه تقريبا ركبت الحوار على ظهر الموتر ومشيت الناقه مسافة 2كيلوتقريبا ومرتن اشد على الموتر والف يمين ويسار الين انخض بطنها

نزلت الحوار وخليتها بعد حوالي ساعه وبفضل الله وتوفيقه سلت الناقه .

وامس واليوم عطيتها تمر ورشاد والتمر وسلامتكم

ملاحظه البنسلين عطيتها اليوم الثاني والثالث 25 كل مره في اللحم .

رد: $$ لها يومين ما سلت $$

عطها لقمه تمر فيها رماد