ابي نصيحه يالربع بسرعه تكفون

السلام عليكم

اخواني انا ابي اسألكم

انا لقيت لي خلفه حدرها قعود

لكن الخلفه ناشفه مره صايره كنها عود

وحوارها بين عليه النحف والضعف

المهم ان الخلفه خلفها كنه خلف عشرا مافيه حليب مره

جيت وحلبت نزل شي بسيط مره

سألت راعيها يقولي

انه مشتري الناقه مع جملة نياق والناقه هذي كانت ضايعه من راعيها في الرملاء

وانتم تخبرون الرملا مافيها ذاك العشب ولا المرعاء

فعلشان كذا الناقه ضعيفه مره ولا فيها حليب دامها ماتأكل

ويقول البارح انا مشتريها وفكيت شمالتها ولا عطفت ولا جفيها حليب ومن شراها الرجال البارح

حط لها برسيم ويقول اليوم عطفت اليوم مرتين بس حليبها مهوب الي انت تبي

يدوب تعطف

محالبها هشه والناقه هديه وسمحه وعليها رقبه وراس وعليها عمر طول مهوب بسيط لكن مستشك في ضعفها وحليبها

وش تنصحوني فيه والي مرغبني فيها قيمتها

طال عمرك فيه فرق بين الضعف والمرض انكان الناقه مشكلتها ضعف فقط يعني مالاحظت عليها علامة مرض يعني اكلها زين ولا تكح

ولا فيها نفاخ فاشترها لان اللبن مشكلته بسيطه وراح ترتد اللبن بسرعه اذا ماهي بغارز اصلآ والله يوفقك للي فيه الخير.

لا اخوي الناقه مابين عليها شي بخصوص المرض

ولا ادري ان كانها غرزت الناقه ولا لا


لكن ماتوقع حوارها مهوب كبير واتوقع انه يتنهجها

لكن مايلقى حليب

وانا بركز على هالنقطه الله يجزاك خير

وعليكم السلام والرحمة

بداية أخوي ابسألك عن أكل الخلفة عادي والا أقل من ذلك من خلال اللي عرفته من صاحبها وهل استخدم لها اي علاج .
وأرجو منك الإجابة لنتمكن من افادتك بإذن الله تعالى .

تقبل تحياتي
أخوكم
عبدالعزيز العبدالله

مع عبد العزيز العبدالله

وعليك السلام ورحمةالله وبركاته

وبعد أخوي

أبيك تجيب لها الدكتور يعطيها جميع الحقن المضاده للأمراض المعديه

لأن الناقه الضعيف ما تتحمل الأمراض المعديه

وبعد ذلك أرهي عليها بالطعام

ودمت بخير

أخوك / أبو حمد

السلام عليكم

مشكورين اخواني على تجاوبكم السريع

بخصوص ان الناقه غرزت او لا

الناقه للحين ماغرزت وعطفت لحوارها اليوم لكن حليبها قليل جداً

واما بخصوص أكل الناقه

الناقه على حسب كلام راعيها كان يقول انها ضايعه وتوه لقاها ولا لقت طعام يومها غاديه ذبحها الجوع

ومن جابها لها يومين الناقه مغير تبي الاكل

وانا اتوقع انها بتزين وبيجي حليبها

واكيد اني اذا شريتها بجيب لها البيطري يشوفها

وش تنصحوني فيه اخواني اشتريها لاني اشوفها فرصه

ناقه في طولها وعليها رقبه وراس وخشم

كل مافيها زين

لكن ابي شوركم

اخوي عبدالمحسن كل الشباب مركزين على قضية المرض فاذا كنت متاكد ان الناقه صاحيه فشترها لان الضعف ماهو عيب كذلك لا

تصدق كل ما يقولونه الشريطيه اما من ناحية انك تشوفها فرصه فالمثل يقول ( اللي ما يغامر ما يجيب البل).

سلام عليكم

ابشركم شريت الخلفه بمبلغ حلو مره

واليوم بطلع لها دكتور بيطري يشوفها من ناحية المرض واذا كانت تحتاج ابر ولا حبوب يعطيها

وبدق لها شبك لحالها وبكرمها من العلف

وماقصرتو كلكم بردودكم ونصايحكم

جزاكم الله خير وكثر الله من امثالكم

مبروووووك

وعسى الله يمنحك منها وتجيب لك البكار الطيبه والبل مشتراها ناموس وفالك الناموس

مبروووووك

وعسى الله يمنحك منها وتجيب لك البكار الطيبه والبل مشتراها ناموس وفالك الناموس

ويشهد الله اني دخلت أبي أسألك عن لونها وسعرها(كنت ناوي أغامر أن كانها رخيصه وأشريها)
ولكن دامها عندك عسى الله يبارك لك بها
وعقبال مانشوف الحوار الي يسوم بملايين عليها
ولا مانع من انك تذكر السعر واللون
وأرجع أقول علها مبروكة أن شاء الله
وشكرًا

السلام عليكم ورحمة الله وبركاته

اسمع ان كان الحواره صغيره ضير عليها

ان كانها كبيره اعزلها عن امها

وعطها علاج الدود وتوكل على الله

واشتر

الله يبارك لك
ان كان الحوار عادي في الزين وياكل العلف اعزله عنها واكرمها ولا تنسى حبوب الدود والغسيل بالجاره

^^^^^^^^^^^^^^^^^^

الموضوع له ثلاث سنوات

يعني القعود لقي اذا ماراح قصب

انتبهوا للمواضيع القديمه