بعير ما يسمن ويصرصر سنونه

السلام عليكم ورحمة الله وبركاته
اخواني انا عندي بعير مزاين شريته من 6 شهور البعير اول ما اخذته ضعيف جدا وخذ ثلاث شهور تحسن شوي
وبعدين عطيته حبوب السمال وبر جرب وفتيمنات وملح والبعير تحسن شوي زانت شعرته لاكن مايزود حاله يضعف ويرجع
ويصرصر سنونه يالت تساعدوني على علاج او اسم دكتور بزودكم بصورته

رد: بعير ما يسمن ويصرصر سنونه

مرحبا بك

وش شعرة البعير قايله ؟ وش شكل دمنه ؟ أكرمك الله

واتمنى ان تفحص البعير من السلاق لان المرض خطير ومعدي وقاتل مع الوقت

ولم يصل له الطب علاج حتى الان

ويتم فحص البعير من السلاق بأخذ دمنه من المدمن مباشرة ووضعه في علبه التحليل

او أي كيس عادي واعطائها الزراعه للتحليل مجانا أو ارسالها لأحد المختبرات الخاصة

حيث يتم تحليلها بسعر في حدود ال 150 ريال

ودمت في حفظ الله ورعايته

رد: بعير ما يسمن ويصرصر سنونه

شف فم البعير عن الهدب

رد: بعير ما يسمن ويصرصر سنونه

مساء الخير
انا جبت لكم صورة البعير
البعير هذا اخر حد وقف عليه من السمنه احيانا ينقص

رد: بعير ما يسمن ويصرصر سنونه

واضح من الصورة بدنة القعود ما فيه الا العافية ولايحتاج تحليل سلاق ولا غيره

وافضل شيء تعطيه شراب الدود في الفم وتعيد الجرعه بعد اسبوع

واكرمه بالبرسيم والشعير او المكعب وتشوف ما يسرك بإذن الله

ملاحظة : أرجو التدرج في كمية المكعب او الشعير حتى ما تتخم القعود ويموت

رد: بعير ما يسمن ويصرصر سنونه

الله يعافيك ماقصرت
اما بنسبه للربسيم والشعير متو فر
بس ما ياكل واجد

رد: بعير ما يسمن ويصرصر سنونه

السلام عليكم ورحمة الله و بركاته،،،
الله يشفى بعيرك
و أنا مع رأى أخونا صالح المحمدي

شف فم البعير عن الهدب

رد: بعير ما يسمن ويصرصر سنونه

وافضل شيء تعطيه شراب الدود في الفم وتعيد الجرعه بعد اسبوع

^^^^^^^^^

معك يا مسعود

وزود على كلام مسعود في حبوب الدود

بالنسبة لصورة البعير مافيه شي انشا الله غير الضعف

انا عندي بعير نفس الحاله ونفس ضعف بعيرك عطيته يا طويل العمر حبتين دود بس كل حبه لازم تكسرها نصين وتعطيها البعير

في عجين بحيث يكون العجين خفيف لا تثقله عشان ما يضره الين تشوف البعير تحسن ,,, والله اعلم

والله يشفي بعيرك انشا الله

رد: بعير ما يسمن ويصرصر سنونه

السلام عليكم ورحمة الله وبركاته
انا اشكر جميع الشباب على تعاونهم ما قصرتو وبيض الله وجيهكم
من اداره ومشرفين واعضاء
انا انشاء الله بعيد عليه حبوب الدود

رد: بعير ما يسمن ويصرصر سنونه

اخي اخشى ان يكون بعيرك ( اعر )

رد: بعير ما يسمن ويصرصر سنونه

عطه حبوب دود

رد: بعير ما يسمن ويصرصر سنونه

وعليكم السلام ورحمة الله وبركاته

زيادة على كلام الاخوان

اذا البعير يحط راسه في الحلف بعدين يرفعه بشكل متواصل او شبه متواصل

افتح فمه وشوف اذا فيه هدب او حمام في اعلى سقف الفم

والله اعلى واعلم