الرجاء من الاخوه الى عندهم معلومه يفيدونا

عندي ناقه وهي الان لقحه والناقة طيبه بس فيها عذروب اذا ولدت انسل حالها والناقه فيها حليب واجد وان خليتها عاب ديدها وان خليت ولدها يرضعها بيذبحه الحليب بالذراق حليبها واجد ما شاء الله عليها ابي رايكم وش الحل في هالضعف تنقطع تغدي جلد وعضم وبعدين وش رايكم لو اعلفها مخلوط ( المخلوط علف يعطونه اهل الخيل وهو للتسمين وجبر العظم فهل يساعدها علي انها تمسك حالها او تزيد وهل له ظرر في الحليب )
افيدوني جزاكم الله خير

رد: الرجاء من الاخوه الى عندهم معلومه يفيدونا

اكرمها بالشعير او المكعب
وخل البرسيم ناقع عندها

رد: الرجاء من الاخوه الى عندهم معلومه يفيدونا

كيف حالك ياسعود
بعض الابل الكبار بالعمر يجيها الضعف لاصارت خلفه ولايفيد فيها الطعام مهما كان
اولا الناقه اتوقع الان انها عشراء حاول ماتبهلها الا تالي عصير وأشملها الصباح الباكر
اكرمها هي وولدها بالبرسيم والشعير
حبوب الدود على جرعتين الجرعه الثانيه بعد أسبوعين
واذا ولدها كبير وعمره زين لزوم تغرز الناقه وتجهزها للفحل

رد: الرجاء من الاخوه الى عندهم معلومه يفيدونا

يامرحبا

المخلوط مافيه ظرر طيب عطها ذره ومكعب الوافي ولاتعطيه خير شر البرسم لي انه يزيد من حليب الناقه ويذرق الحوار تكرمون

وخله يرضع الصباح والظهر تشملها وتحطه في شبك ويكون في مظله لي ان رضاع الظهر يجيب الذراق تكرمون والعصر تخليه يرضع ولاعطفت خل الراعي ينظف الديد من الحليب والحوار يرضع ثنين والراعي ينظف ثنين فالعصر عشان ديد الناقه مايعيب والحوار يذرق من كثرة الحليب تكرمون وينظفها في الصباح والعصر مع العطفه ثنين للحوار وثنين ينظفها

رد: الرجاء من الاخوه الى عندهم معلومه يفيدونا

انا اقول مدامها لقحه عطها حبوب دود او ابره جرب ديكتوماكس الزرقاء على جرعتين ماتضر ان شاء الله اللقحه
سمن واكرم الناقه في الوقت الحالي وهي لقحه وخلها تردم لأن اللقحة تسمن بسرعه ولا تنسى الفيتامينات بالماء تنفع حتى اللي في بطنها
لاولدت مدام حليبها واجد وخايف على حوارها خلها على رودس او تبن بوجه العدو او ذره وبس 15 يوم مع تنظيف الديد الحوار بهالعمر يرويه ديد واحد
بعد 15 يوم ابدى علفها بالتدريج
وشمل الناقه زين وخل ولدها يرضعها 3 مرات باليوم ومثل ماقال الاخ فيصل الحوار يرضع اثنين والراعي يحلب اثنين وقت العطفه والتشميل على شان مايلعب فيها الحوار كل شوي معطفها ولا يشرب الحليب واذا انه من النوع اللي يعطف امه من وراء الشماله ماله الا شبك ترى مايضعف الناقه الا كثر الحلب سواء من راعيها او من تعطيف ولدها .
اهم شي السرحه والمشي لا كثرت العلف على شان تسلم من الخباش
وانا رايي ان الوافي لا اجتمع مع البرسيم بيتعبك بالحليب لان كل منهما يزيد الحليب فاختار البرسيم افضل .
بالنسبة للمخلوط حق الخيل ما جربته ولا اعلم هل هو مناسب من عدمه .
لكن ان حصل لك شعير منقع بماء ونخاله (شوار) تخلطها مع بعض مسمن 100%

رد: الرجاء من الاخوه الى عندهم معلومه يفيدونا

الاخ / سعود العوني
الاخ / محمد التميمي
الاخ /فيصل الخييلي
الاخ / بندر الراوي

اشكركم علي المرور واعطاء الراي والله لايحرمكم الاجر ونتمني مواضع تنفع الجميع