اخوكم محتاج المشوره في حواره غاليه وذارق

عندي حواره عمرها اسبوعين واليوم العصر شفت منها ذراق وش الحل يالربع هل طبيعي لانها رضعت واجد البارح ؟
وعلمت العامل يحلب امها مع طلوع الشمس ويشملها ويرجع ينظفها الساعة 10 ويشملها ويحلبها المغرب وينظفها ويخلي بنتها ترضع شوي ويشملها ويرجع لها الساعة 9 ينظفها ويخلي الحواره مع امها بدون تشميل لطلوع الشمس اليوم الثاني

هل فعلي هذا صحيح ومتى يتوقع يوقف الذراق تكرمون واذا ماتوقف وش الحل ؟

رد: اخوكم محتاج المشوره في حواره غاليه وذارق

مرحبابك
الله العالم ان الذراق من كثره الحليب ولايكون تطعم الناقه برسيم الا بعد شهر من الولاده
خف الحليب وبه علاج عند الصيدليه للذراق يومين وان شاءالله ينتهي الذراق
والله يبارك لك في حلالك

رد: اخوكم محتاج المشوره في حواره غاليه وذارق

جزاك الله خير اخوي محمد

بس لو استمر اليوم وش علاجها

رد: اخوكم محتاج المشوره في حواره غاليه وذارق

في عصار في الصيدليه وفعال جدا وعطها الماء البارد كل يوم ولا تخليها ترضع كل شوي واحلب امها علشان يجيها اللبن حلو والله يستر عليها

رد: اخوكم محتاج المشوره في حواره غاليه وذارق

مساك الله بالخير .

راجع كتابات عيد المنصوري اللي جمعها الاخ فلاح وموضوعها مثبـت فالقسم .

وبتجد مايفيدك بإذن اللـه ...

..

رد: اخوكم محتاج المشوره في حواره غاليه وذارق

كمون مطحون ولبن من البقاله واخلطه بشي بسيط من البخاخ حق الذراق الله يكرمك
اذا كان عندك اللي لونه حليبي وخل الاصفر عنك
وعطها منه على شكل جرعات اذا كان الخلطه واجد
وان شاء الله ماتشوف شر

رد: اخوكم محتاج المشوره في حواره غاليه وذارق

الماء كافي لوحده

او

ماء مغلي مع ورق شاهي يصفى ويبرد ويعطى للحوار

رد: اخوكم محتاج المشوره في حواره غاليه وذارق

مع البخاخ ( لونه حليبي ) واسمه سكوروبان

عشر ضغطات صباح ومساء كافيه إن شاء الله

رد: اخوكم محتاج المشوره في حواره غاليه وذارق

زي ما ذكرر أخوي / مسعود العماري ،،

بادرر بالعلاج وأطلعنا على آخر النتائــــــــــــج ،،

رد: اخوكم محتاج المشوره في حواره غاليه وذارق

عطه علاج ابو رمح 5 سم وبأذن الله بتشوف الفرق بيوم

رد: اخوكم محتاج المشوره في حواره غاليه وذارق

مثل ما قال اخوي مسعود

ولا يهون باقي الاخوان

وعليك بالمكان اللي فيه ذرا

مجرب وفعال

رد: اخوكم محتاج المشوره في حواره غاليه وذارق

ما قصرا الاخوان لكن لا تكثر من الضغاط 3_4 ضغطات بالصبح يكفي لما ينقطع وقفه والحوار شارب حليب واجد 100%

رد: اخوكم محتاج المشوره في حواره غاليه وذارق

ياسعد الماء زين واهم شي انك تحلب امها ولايبقى فيها حليب زايد واسال الله لك التوفيق

رد: اخوكم محتاج المشوره في حواره غاليه وذارق

جزاكم الله خير جميع وبارك الله فيكم وفي حلالكم

الحوار الحمدالله نشيط ويرضع بس مازال فيه اثر ذراق يوم مانشوف منه ويوم يذرق تكرمون والبلا في العامل ان كان انشغلنا هملها وان كان كنا حوله تابعها

وشريت امس ضغاط الذراق حليبي وعطيتها ١٠ المساء وبنشوفها اليوم ان شاءالله وعمر الحواره الحين ١٩ يوم والله يستر من البرد لا يضرها

وصرنا نحلب الام ٤ مرات في اليوم واكلها رودس وبأذن الله بنتابع معكم ونعطيكم النتايج واللي استخدمته كله

وعاجز الواحد عن شكركم يالنشاما

رد: اخوكم محتاج المشوره في حواره غاليه وذارق

10 ضغطات بالمساء وااااااااااااااجد انتبه لا تكتم الحوارة وتدخل في مشكله ثانيه