الناقة ما لقحت نهائي

السلام عليكم ورحمة الله وبركاته مساكم/صبحكم الله بالخير ياالربع عندي ناقة من العام اظربها وما لقحت ويوم جاء نص وقت الهداد ما لقحت جبت لها دكتور بيطري مظبوط وفتشها ونظف رحمها واظربتها عقب التنظيف عدة مرات واخر اضراب لها العام عطيتها ابرة تثبيت اللقاح عقب ما اظربها البعير ومافادت معها الابرة.
اما السنة ذي اظربتها في اول الهداد مرة وما لقحت وجبت لها الدكتور البيطري ونظفها مرتين واظربتها عدة مرات والى الحين ما لقحت حتى مابين عليها علامات العشار.

* ملحوظة: الناقة العام عشرا يعني بنتها سنها حقة ذا الزمان.

# نطلب من اخواني الاعضاء وزوار منتدى مزاين من يكون لديه تجارب او خبرات او قد مرت عليه مثل هذه الحالة ان يشاركنا في الموضوع، ويقول الرسول - صلى الله عليه وسلم - (( من فرج على اخيه المسلم كربة فرج الله عليه كربة من كرب يوم القيامة ))، ونرجو من الله سبحانه وتعالى بأن يلقحها ويرزقنا عليها بالبكرة الفردية.

رد: الناقة ما لقحت نهائي

مسيك بالخير

والله يطعمك من الناقه انتاجن يسرك

والله وانا اخوك تاكد ان كان الدكتور مضبوط والا جب غيره يمكن يده مهيب مبروكه

وغير كذا غير البعير شف بعيرن غيره يمكن الله ماقسم لها عشار منه خيرتن لك

ودقها ابرة جسره وقطع صيدها لان الناقه لاضربت ولا عشرت ينبت الصيد من جديد فحاول تفتش

وقطع عقب مايقوم منها البعير

والله يرزقنا واياك ومن يقرى

رد: الناقة ما لقحت نهائي

الله يبارك لك فيها
اذكر شايب يقول لواحد اتعب النافه بالجري كم كيلو واعرضها للفحل مباشره .... جرب ونسأل الله ان يرزقك منها

رد: الناقة ما لقحت نهائي

تجربة مع الحيل انا اشريها والحمد لله تلقح لكن اهم شي الرحم لا يكون فيه شي اما الباقي والحمد لله مقدور عليه بإذن الله

تجربة
خل الناقة في شبك لحال ولا تعلف ابد لمدة يومين
بعدها عطها نصف حزمة برسيم فقط مع الماء
لا تخاف الناقة ما راح يصير له شي
لمدة عشرين يوم فقط بعدها اضرب الناقة ابرة تنشيط المبايض وبعد يومين .
اطرد الناقة طرد لمس عراقيب الناقة الصدام من الطرد خلها تفحم ثم على جوع الصبح بدري قنعها الفحل بإذن الله تلقح
هذه تجربة ونترك للزملاء المجال

رد: الناقة ما لقحت نهائي

تجربة مع الحيل انا اشريها والحمد لله تلقح لكن اهم شي الرحم لا يكون فيه شي اما الباقي والحمد لله مقدور عليه بإذن الله

تجربة
خل الناقة في شبك لحال ولا تعلف ابد لمدة يومين
بعدها عطها نصف حزمة برسيم فقط مع الماء
لا تخاف الناقة ما راح يصير له شي
لمدة عشرين يوم فقط بعدها اضرب الناقة ابرة تنشيط المبايض وبعد يومين .
اطرد الناقة طرد لمس عراقيب الناقة الصدام من الطرد خلها تفحم ثم على جوع الصبح بدري قنعها الفحل بإذن الله تلقح
هذه تجربة ونترك للزملاء المجال

اأخوي خالد وضح اكثر الله يعطيك العافية
وش نوع الأبرة ووقت الطرد السيارة في نفس وقت الضراب ولا ثاني يوم
فصل اكثر الله لا يحرمك الأجر

رد: الناقة ما لقحت نهائي

عطها إبرة استروميت وإبرة أستراديول

وبعد يومين أضربها وأثناء الاضراب عطها ابرة التثبيت

وإنتظر وكرر بعده إذا ما عشرت ولا تعطيها المرة الثانية إلا ابرة التثبيت

أحرص على نوعية العلف برسيم وشعير أو مكعب وإضافة فيتامينات وأهما فيتامين هـ - سيلينيوم


وعسى الله يبارك لك ويمنحك منها