البكره معشر وتعبث في الابل !!!!!!

السلام عليكم
البكره رباع واول عشارها جذعه وخذت لها تقريبا شهر وعقب كسرت عشارها وعاما ثنيه ولا الله قسم لها عشار وذا الزمان الله قسم لها العشار ولها تقريباً شهر من عشارها لكن الغريب انها تعبث في الابل وتلعب مع البكار واذا شافت البعير ولا انسان شالت

من لديه علم مما اعلمه الله يخبرنا جزاه الله خير

ملاحظه : البكره معشر وكاد بعد ان قطعنا منها الحميّره
و الله تعالى اعلم

رد: البكره معشر وتعبث في الابل !!!!!!

قيد إياديها
منها تريح البل منها وتسلم بكرتك من التفييخ إن شاء الله
وهذا حال العشار في بعض البل
تحياتي

رد: البكره معشر وتعبث في الابل !!!!!!

عادي جدا الناقه أذا عشرت بعد حيال هذي طريقتها حتى وهي لقحه بتضرب البل
وتبي تلعب
لكن أصبر عليها شهرين ون ماهدت قيدها
والله يرزقك منها بما يسرك

رد: البكره معشر وتعبث في الابل !!!!!!

الاخوة الافاضل

مشبب بن حماد

ساجر بن عدوان

جزاكم الله خير

رد: البكره معشر وتعبث في الابل !!!!!!

حط في حياها ملح وتركد باذن الله

رد: البكره معشر وتعبث في الابل !!!!!!

شلونك ياوطبان
ياليت تتابع عشارها بشكل أسبوعي
وانا اتمنى ان تأكدك في محله من عشارها
على العموم المتابعه مطلوبة منك
وعطنا علومها الايام الجايه

رد: البكره معشر وتعبث في الابل !!!!!!

معي بكره لقيـه وعمرها عمر ثنيـه واضربها القعـود وعشرت
وبعد عشرت أذت البل وتهادر وتطرد الحشوان .. مثل بكرتك .
والله ماسويت بها اي شي .. والحمد لله لها شهرين وعشارها على مايرام وامورها طيبه .
نقول ان شاء الله ماعليها خلاف .
وان شاء الله يفيدونك الاخوان

رد: البكره معشر وتعبث في الابل !!!!!!

شلونك ياوطبان
ياليت تتابع عشارها بشكل أسبوعي
وانا اتمنى ان تأكدك في محله من عشارها
على العموم المتابعه مطلوبة منك
وعطنا علومها الايام الجايه

زان لونك يامحمد

أبشرك أن البكرة ولله الحمد ثابت عشارها بفضل من الله
والبكرة ذرعتلها واركدت وفكيته من شهر
وازيدك عقب كتابتي للموضوع فكيت مع الابل جذع بقيد وهجار ولا وعيت الا هي باركةٍ عليه محيّصةٍ عليه واجيها واطردها منه وألا ترفع راسها وذنبها للسما كأنها ماعملت حاجة 


وهذه علومها

وسلامتكم

رد: البكره معشر وتعبث في الابل !!!!!!

يابو فهد عندي ماعندك ..

عندي بكرة لقية أضربها الجمل في الشتا الماضي
وعشرت الحمد لله ,,
وعقبها أذت البل تطاردهن وتهدر واذا شافت البعير بارك ركبت فوقه
وشككتني انها حاااايل وفكيت البعير علاها وأضربها ...
ولاحظت عقب ضراب البعير باسبوع أن ديسها نزل وكبر
يعني انها مازالت لقحة وتسوي هالسوااااااااه

رد: البكره معشر وتعبث في الابل !!!!!!

ظني ان البكرة مهيب معشر
بحسب اقوالك الي بينت لي هذا
ولكن الله يكتب لها العشار واللقاح وتشوف منها مايسرك
وفقنا الله وياك

رد: البكره معشر وتعبث في الابل !!!!!!

سلام البكره باذن الله معشرهذا فسق

رد: البكره معشر وتعبث في الابل !!!!!!

السلام عليكم

يالربع اللي ماعنده خبرة لا يشارك في الردود بشي ما يعرفه اللي يقول اضربها واللي يقول حط في رحمها ملح واللي يقول ماهيب لقحه


اللقاح ذكر ولا يخفى راعي البل لقاح الناقة إذا عرضت على البعير شالت شوال لقاح ورفعت راسها وفجت الوزر وإذا كرفها البعير تركها هذي هي اللقحه

وبالنسبة لكونها عبثه هذا أمر طبيعي بعض البل هذي عادها وإذا استفحل فيها اللقاح هدأت وواجد من البل حتى الكبار الثنايا والاربعا تعبث في اول اللقاح لا تعارضها اتركها وهي بتهون هذي خواتها عندي تركب فوق القعدان وهي معاشير الأمر عادي

والله يبارك لك فيها وفي ماعشرت به ..

رد: البكره معشر وتعبث في الابل !!!!!!

اشكر الجميع واقولكم جزاكم الله خير

وابشركم البكره هالحين لقحه واركدت وعسى الله يمنحنا منها

والله يوفقنا واياكم