لا نحاس ولا كالسيوم ينفع مع الطرق وش الحيله؟؟؟

أخواني السلام عليكم ورحمة الله..


أنا عندي مفروده عمرها هالحين خمس شهور ونص
غاليه بالحيل ماكان فيها الا العافيه عقب جاها طرق تقوم ترفع يدها عند الدرهام
وشفت الشباب الله يجزاهم خير يقولون علاجها حبوب النحاس والكالسيوم وتوكلنا على الله وعطيتها
ولابه فايده أبد اتلاها عطيتها ابره نحاس قبل اربعة ايام والوضع على ماهو عليه وللمعلوميه بديت بحبوب النحاس والكالسيوم
حسب الجرعات اللي أفادوا به الأخوان لي ثلاث شهور ولابه فايده شوروا علي يالربع أكويها ولا لا والبكره طيبه بالحيل...
بيض الله وجيهكم جميع
تحياتي .....

رد: لا نحاس ولا كالسيوم ينفع مع الطرق وش الحيله؟؟؟

الاخ حسن بعد التحية

اخر الطب الكي وانا جربت كل العلاجات ولانفعت من حبوب النحاس الى ملح الازرق وقمت بكيها ع الفرسن ونفعت ولله الحمد

رد: لا نحاس ولا كالسيوم ينفع مع الطرق وش الحيله؟؟؟

لاهنت ياحمد القريني وبيض الله وجهك

بنتوكل على الله وبنكوي اليوم

رد: لا نحاس ولا كالسيوم ينفع مع الطرق وش الحيله؟؟؟

انصح نصيحه اخويه لاتهملها وحبوب النحاس مابها خير انا يمحاكيك الطراق صاد بكره غاليه عندي
وشارو علي الناس الاتكويها تشوهه
قالو عطها الكالسيوم وحبوب النحاس وراح واحد
منهم وجاب لي ابره لون المحلول ازرق ولا فادة
وطقيتها بالقيد وحطيتها في شبك صغير ولا فاد
البكره عطبت وجاها لين واخرشي جبت لي رجل باخص بالابل وكواها بس قال تراك مصيف( متاخر)
واخر شي ماعاد قدرت تقوم

رد: لا نحاس ولا كالسيوم ينفع مع الطرق وش الحيله؟؟؟

أنا أشهد اني دبلت كبدها بالأبره الزرقا (النحاس) ولا فاد
لاحول ولاقوة الا بالله00000

ماعاد قامت البكره ياثامرهاذي والله الكارثه

يعني حتى الكوي ماينفع

يالربع شوروا علي الحل ويشهو؟؟؟؟؟؟

رد: لا نحاس ولا كالسيوم ينفع مع الطرق وش الحيله؟؟؟

ياحسن تماكن البكره وشف لك واحد باخص بالابل
قد مر عليه الطراق وكواه وبريت
وفطن من الي يتطبب ويقول انا اكوي وهو من جنبها
ترى ماكل واحد بخيص بالكي ترى ان لقيت رجال عارف وكواها وصاد المحل بامر اللهانها طلق عقال

رد: لا نحاس ولا كالسيوم ينفع مع الطرق وش الحيله؟؟؟

الأخ حسن كثره النحاس تسبب تسمم للحواره وانا اشور عليك تجرب معاها القيد ولا تسرح واعزلها سمعت ان القيد نفع مع الكثير والكوي ماجاب نتيجة

رد: لا نحاس ولا كالسيوم ينفع مع الطرق وش الحيله؟؟؟

بيض الله وجهك ياثامر أنت وبندر لاهنتوا جميع

الى هالحين ماكويت بجرب القيد وبعزلها الحالها على كلام اخوي بندر

وآخر شي بنتوكل على الله وبنكوي

الله يجعل ما أفدتوني فيه في ميزان حسناتكم

رد: لا نحاس ولا كالسيوم ينفع مع الطرق وش الحيله؟؟؟

قيد البكره واعزلها واغسلها بسم جره مخفف مرتين يوميا
من فوق الركبه الى المنحر على عضلة اليد من الامام ولا تفكها من القيد الا بعد شهر

على ان يكون القيد قصير لا يزيد عن شبرين وانشاء الله ماتحتاج للكي

رد: لا نحاس ولا كالسيوم ينفع مع الطرق وش الحيله؟؟؟

السلام عليكم و انا اخوك النحاس و الكالسيوم يستخدم ل الين و البعض يسميه تفداع الطرق اللي اعرفه انها ترفع ايدها في مسيرها و هذا سبته انطلق رباط في ايدها وان تداركته بدري و كويته سلمت و ان ما سلمت ترى ما يظرها عندي ناقه من يومها عجم و فيها طرقه و الحين خلفه و لا ظرها لا في مسراح و لا لقاح

رد: لا نحاس ولا كالسيوم ينفع مع الطرق وش الحيله؟؟؟

الاخ حسن الله يعافى بكرتك التجربة اكبر برهان الطرق صاد قعود عندى وكويتة على كرمة اليد وسلم لانة فى البداية وجا قعود ثانى وتاخرت علية حتى مشا على عظم اليد وتوقعت انة مايسلم وجانى رجال عندة خبرة وقال لى شب الضو وجب المسامير المهم خرقنا يدة اليسرى ويدة اليمنى بين الكرمة والخف فى المفلخ ضربناة من قدام وطلع المسمار من خلف اليد وقمت اسوقة كل يوم مع ارض قوية ويطلع من يدة ما اثنا المشى ونظف يدة يوميا حتى مايتسكر محل الخرق وسلم وشريت بكرة غالية وجاتها نفس المشكلة وعلجتها نفس العلاج وسلمت 80% وسلامت الجميع

رد: لا نحاس ولا كالسيوم ينفع مع الطرق وش الحيله؟؟؟

اخوي عيد الله يرحم والديك ويجزاك خير

لكن اقيدها واخف عليها العلف والا لا

رد: لا نحاس ولا كالسيوم ينفع مع الطرق وش الحيله؟؟؟

سلطان ارحم الله والديك

ولاهنت يالغالي

رد: لا نحاس ولا كالسيوم ينفع مع الطرق وش الحيله؟؟؟

اخوي فهد لاهنت وبيض الله وجهك

رد: لا نحاس ولا كالسيوم ينفع مع الطرق وش الحيله؟؟؟

قيد البكره واعزلها واغسلها بسم جره مخفف مرتين يوميا
من فوق الركبه الى المنحر على عضلة اليد من الامام ولا تفكها من القيد الا بعد شهر

على ان يكون القيد قصير لا يزيد عن شبرين وانشاء الله ماتحتاج للكي

الاخ الكريم عيد المنصوري القيد ينفع للحرده وهي اللين بالعضام او تقوس العضم والقيد يكون له مثل التقويم

ويعدل العظم ويمنع تقوسه للخارج

الطرقة غير واذا ازمنت لايوجد لها علاج

ثم ان الرجل يقول بكرته ماتقوم .. اذا ماتقوم وش ينفع القيد فيه ؟!

هناك اختلاف بالمسميات بين الناس ويجب الانتباه لذلك

---------------------

انصح راعي البكره بالذهاب الى المستشفى الجامعي وعمل اشعه للمفصل

اذا متهتك او يوجد قطع في الاربطة للمفصل تحتاج البكره تدخل جراحي

لكن هذا مكلف وصعب


وغالبا الطرقة سببها تقطع اربطة المفصل بسبب شد العقال عليها مع صغر السن

او تعرضها ا لظربه على المفصل سبب تهتك او شعر بالمفصل