بعد الأبرة وبعد الكوي .. تحسن نسبياً ..( صور وفيديو ) للمعاينة

السلام عليكم ورحمة الله وبركاته
أسعد الله مسائكم بالخيرااااااات

يالربع عندي ناقة سبق وان كتبت عنها بداية وجعها على هالرابط
http://www.mzayan.com/vb/showthread.php?t=44470


الناقة لها مدة ماتمشي نهائياً أغلب وقتها على جنبها ..
وكويتها ولا عينت أي تحسن ..
وظربتها أبرة دقسا فينايل بتوصيه من أخونا خالد العايذي بيض الله وجهه والحمد لله عقب الأبرة
قامت ومشت وفلت بنسبة 40 %

ولكن على هالحال لها مايقارررررررررررررب 22 يوم ولم ألحظ أي تحسن
اللي عنده راي والا مشووورة يسدحه لاهان

صور الناقة ..
ملاحظة (( المربعات مكان الكوي ))








فيديو ممشى الناقة

http://www.youtube.com/watch?v=5fjNaXUQXfg&feature=youtu.be

رد: بعد الأبرة وبعد الكوي .. تحسن نسبياً ..( صور وفيديو ) للمعاينة

الناقه ما تاطا الارض بخفها فتش الخف مزبوط بلاها منه

رد: بعد الأبرة وبعد الكوي .. تحسن نسبياً ..( صور وفيديو ) للمعاينة

مرحبا ابودرر جعل ماتشوف شر في نفسك وعيالك ومالك وانا مثل الي يبيع الحاجة على الي يصنعها انت استاذنا طال عمرك مايخفاك ان المضادات والابر في بعض الحالات تعطي تحسن نسبي ثم ترجع الدعوى على ماهي وانت رقيت وكويت وبالابر طقيت رأي وانا خوك ان كان الناقة غالية عليك حملها لكلية القصيم خلهم يسوون لها أشعه وبأذن الله تبين علتها
هاااااه ومايحتاج اوصيك شف الربع الي حولك الي عنده حايل بيوديها ولا شي لاتروح الناقة لحالها دمت بخير لك خالص الود أخي العزيز

رد: بعد الأبرة وبعد الكوي .. تحسن نسبياً ..( صور وفيديو ) للمعاينة

ارحب ياطلال
دور على صاحب هجن يكوي الناقه على عرقوبها

اللي كاويها ابعد عن مواقع الكي المفروض تكوى عن العرقوب

نصيحتي ابر بي كومبلكس مع كي العرقوب من الخارج والداخل

ثلال مطارق عرضيه على المفصل وللاسف حتى مفصل الرسغ متضرر

تحميل الدنا والربط الخاطئ

رد: بعد الأبرة وبعد الكوي .. تحسن نسبياً ..( صور وفيديو ) للمعاينة

ياعزتي عنها عطية الله
والله يكتب لها الشفاء ويسرك بسلامتها يابو درر ,
أولاً : اللي لاحظته من كوايا الخف انها غير صحيحه للأسـف .
ومقع الكيـه الأخرى لو ارتخى شوي كان افضل والعلم عند الله ,
كوايا الخف اربعة مطارق صغار المطرق الواحد تقريباً 4 سم يربع بها الخف ,
والناقه فيها نوع شلل عصب والتهابات ناتجه عن تمزق الاعصاب . والله اعلم ,
كان عندك فرصه وتبي تشيل الناقه للقصيم فنعم الراي ..
واتوقع أنها عيـن .. والعياذ باللـه ,

رد: بعد الأبرة وبعد الكوي .. تحسن نسبياً ..( صور وفيديو ) للمعاينة

اولا الكي كواها كبر الكيه وسببن التهاب وياليت تعطيها ابره للالتهاب
ثانيا الناقه يبيلها كي من زر الرجل من فوق جنب قاعة الذيل من صوب الظلعه واذا مافهمت على كلامي ارجو الاتصال ونقول مرحبا 0097455504721

رد: بعد الأبرة وبعد الكوي .. تحسن نسبياً ..( صور وفيديو ) للمعاينة

وعليكم السلام
اخي طلال انا اتفق مع الاخ مشعل كونه شلل عصب لان الناقة كأنها تسحب رجلها
ولله يرفع الضر عن حلالك

رد: بعد الأبرة وبعد الكوي .. تحسن نسبياً ..( صور وفيديو ) للمعاينة

اولا الكي كواها كبر الكيه وسببن التهاب وياليت تعطيها ابره للالتهاب
ثانيا الناقه يبيلها كي من زر الرجل من فوق جنب قاعة الذيل من صوب الظلعه واذا مافهمت على كلامي ارجو الاتصال ونقول مرحبا 0097455504721

نفس رائي اخوي سعود

رد: بعد الأبرة وبعد الكوي .. تحسن نسبياً ..( صور وفيديو ) للمعاينة

الناقه كان ماني بواهم بلاها من صدام سياره والله العالم .

رد: بعد الأبرة وبعد الكوي .. تحسن نسبياً ..( صور وفيديو ) للمعاينة

بيض الله وجيهكم جميعاً على مداخلاتكم وآرائكم
وهذا العشم فيكم يا آل مزاين

الناقه كان ماني بواهم بلاها من صدام سياره والله العالم .

هلا وغلا اخوووي محمد ، والله ياخوك مدري وش بلاه ، من يوم شريتها وهي ماترفع رجلها عن الأرض اذا مشت
وكل يوم تزود سوء ،، والحمد لله والفضل على كل حال .

رد: بعد الأبرة وبعد الكوي .. تحسن نسبياً ..( صور وفيديو ) للمعاينة

اولا الكي كواها كبر الكيه وسببن التهاب وياليت تعطيها ابره للالتهاب
ثانيا الناقه يبيلها كي من زر الرجل من فوق جنب قاعة الذيل من صوب الظلعه واذا مافهمت على كلامي ارجو الاتصال ونقول مرحبا 0097455504721

انا مع الاخ سعود الكي من زرالرجل على شكل مشط وهذ الي بالناقه مشاع

رد: بعد الأبرة وبعد الكوي .. تحسن نسبياً ..( صور وفيديو ) للمعاينة

هلا اخوي خالد

ان كان في خف الناقه ورم والا في مفصل العرقوب من بدايه المرض فدق علي جوال لانها قد مرت علي في ناقه هالسنه والله فك لها 0559954000

رد: بعد الأبرة وبعد الكوي .. تحسن نسبياً ..( صور وفيديو ) للمعاينة

والا يمكن الناقه فيها الثفن وهو كيه من داخل الثفنه ان كانها ما تاطا على خفها دوس بيدك على الثفنه من داخل اذا رغت فهو منه وامرها بسيط انشالله

رد: بعد الأبرة وبعد الكوي .. تحسن نسبياً ..( صور وفيديو ) للمعاينة

من بعد الفيديو تاكدت انه ثفن الناقه تاطا على رجلها بس تستعجل بسبب ثفنتها والله اعلم

رد: بعد الأبرة وبعد الكوي .. تحسن نسبياً ..( صور وفيديو ) للمعاينة

والا يمكن الناقه فيها الثفن وهو كيه من داخل الثفنه ان كانها ما تاطا على خفها دوس بيدك على الثفنه من داخل اذا رغت فهو منه وامرها بسيط انشالله

هلا وغلا يا سعود ..
الله يبيض وجهك بياض كلن يهرجبه الحادر والمسند

الناقة تاطا على خفها ماعندها مشكلة أبد ..
وماطا خفها من تحت صاير لونه أحمر ( تقول حفيان ) وفيه صدوع
وثفنتها منتفخه من داخل .. ولا تداني ان أحد يلمسها