نبـي المشـورة في حالة البكرة

السلام عليكم ورحمة الله وبركاته ... مسساكــم الله بكل خير ..

الحالـة اللي عندي غريبة .. حيث لـدي بكره ( حقة) حالتها طيبة في اكلها ومفلاها ومسراحها وبركتها ما شرهت عليها الا بحاجتين اول حاجة مشيتها تقول كن يدينها مقيده .. كنك حاط في يديها قياد .. والثانيـة البكرة ضامر مع ان الاكل طيب والمفلا طيب .. حيث أن طعامها مكعب الغدير.. مع البرسيم ..

فاللي عنده معرفة ولا مشورة لا يبخل علينا فيـها.. والله يجزاكم كل خير ...

رد: نبـي المشـورة في حالة البكرة

يمكن مبشومة

........

تأكد منها

رد: نبـي المشـورة في حالة البكرة

اكوها على المنحر معها ذبحة

رد: نبـي المشـورة في حالة البكرة

يمكن مبشومة

........

تأكد منها

سببها البشمـة قبل يمكن ثلاث شهور بس فكتها البشمـه ولا عليها خلاف .. بس مشيتها ما فكتها ..

رد: نبـي المشـورة في حالة البكرة

اكوها على المنحر معها ذبحة

الكويـة في المذبـح خطيــر والبكرة طيبـة ولا ابي اغامر بها .. والبكرة في الصبـاح مشيتها تنقد عليها بالحيل .. بس في العشي تفكها .. وتزين مشيتها .. وانا كلمت لي واحــد ويقول لي هذا دم في قلبها جامد .. مع الوقت بيفكها والله مدري عن صحـة كلامــه ..

رد: نبـي المشـورة في حالة البكرة

ي جماعة نبي مشورتكم .. في البكــرة ... البكرة تغيرت حالتها من حالتها السابقـة .. البكرة بعد ما فكتها الغثــة صارت لجت تمشي كنها تمشي مقــيدة .. واكلها زين ومسراحها زين .. واذا هجيتها ما تهج .. وبعدين جتها مثل الصده في يدها اليمين بعدين انعدلت الصده .. ثم صارت كنها تسحب رجلها اليسـار .. بعدين انعدلت .. ثم صارت لقامت من مبركها قومتها ماهيب طيبـه .. واليومين اللي راحت تشوف حالتها ضامـر بالحيـل و جسمها ناشف تقول فيها جفاف .. وكل من جاني ما عرف وش علتها .. اللي عنده معرفه لا يبخل عليـنا .. مع العلم اني عطيتها شراب دود قبل اسبوع .. وقبل تقريبا شهر دعيتها دكسـا ..

رد: نبـي المشـورة في حالة البكرة

يا جمــاعة لا تخلونـا شيروا عليـنا .. ولاحظت اليوم على البكرة ان دمنتها صغيره ويابسـة ..

رد: نبـي المشـورة في حالة البكرة

اذا اكلها زين اتوقع انه خراج مستدخل

رد: نبـي المشـورة في حالة البكرة

الحمـد لله تم اكتشاف العلـة وعلاجها ونسال الله العافية لها ... ونشكر الاخوة على مشاركتهم وعساكم ما تشوفون شر لا في انفسكم ولا حلالكم.. للفائدة ( العلـة : الحمم )

رد: نبـي المشـورة في حالة البكرة

صبحك الله بالخير الله يشفي حلال المسلمين و يبارك فيه الرجاء شرح طريقة العلاج

رد: نبـي المشـورة في حالة البكرة

صبحك الله بالخير الله يشفي حلال المسلمين و يبارك فيه الرجاء شرح طريقة العلاج

هلابك اخوي .. الامر ان شاء الله بسيط

طريقة التعرف على الحمم / عن طريق فم البكرة .. تلقى فيها انتفاخ في سقف فم البكرة ( جماها بالمسمى الشعبي المتعارف عليه ) تلقى فيه انتفاخ يمكن تمييزه بالضغط عليـه بالاصبع ..

طريقة العلاج / تقوم بتجريحه بالموس حتى يدمي ثم تقوم بتطهيره بالملح .. وقد سمعت ان هناك من يضع عليه القهوة المحروقه ( النسكافية) ..

اتمنى اني استطعت افادتك اخوي ..

رد: نبـي المشـورة في حالة البكرة

الحمد لله

يومك عرفت العلة


.........

الحمم مايخلي المطية تاكل

وان اكلت تلقاها مثل اللي تغصص واكلها ضعيف جدا


......

علاجه تجريح الورام الداخلي والحبوب الداخلية
بأي شي

وفركه بملح

وان عطيتها بنسلين طيب



......
..

رد: نبـي المشـورة في حالة البكرة

يا جماعـة البكرة ما عليها في اكلها وبدنت ما عليها بس ظهرت فيها علة جديدة ... البكرة اذا جت تقوم من مبركها تقول مفقره .. تراهز عمرها شوي لين تقوم .. اللي عنده معرفة ولا شيء لا يخلينا ...

رد: نبـي المشـورة في حالة البكرة

عندها التهاب وتجرح في الأمعاء
بسبب البشمة

عطها عليقة سهلة الهضم ومضاد لللإلتهاب

وعطها فيتامينات لتقويتها عموما
من البيطري


...
فيه واحد من الربع انبشمت بكره عنده

وطلع مع مدمنها البعر

ولكم الكرامة متحجر ومتراكم على بعضه

بعد اسبوع من المغص وريحة الجرة تروع

وأصبحت قريبة من وصف بكرتك

عطاها اللي ذكرت لك

...
والآن البكرة ماعليها خلاف بعد اسبوعين أنا شفتها

رد: نبـي المشـورة في حالة البكرة

عندها التهاب وتجرح في الأمعاء
بسبب البشمة

عطها عليقة سهلة الهضم ومضاد لللإلتهاب

وعطها فيتامينات لتقويتها عموما
من البيطري


...
فيه واحد من الربع انبشمت بكره عنده

وطلع مع مدمنها البعر

ولكم الكرامة متحجر ومتراكم على بعضه

بعد اسبوع من المغص وريحة الجرة تروع

وأصبحت قريبة من وصف بكرتك

عطاها اللي ذكرت لك

...
والآن البكرة ماعليها خلاف بعد اسبوعين أنا شفتها

لا هنت اخوي والله كلامك مقنع .. وعسى الله يكتب فيه الفايدة