من عين لها حل

يالربع انا عندي عشرا مادري وش فيها انا توني شاريها قبل رمضاان معها قعوود واول ماجبتها ماوالفت مع البل قعدت لها حول شهر لين قيدنااها وشبكنا على حوارها ولاهيب سمينه بالحيل وبعد فتره والفت مع البل وصارت منقطعه سمنت شوي بس البلى مافيها شحم لاشفتها مااش ماكن لها سناام من الضعف وولده يرضع منها وفيه شخص يقول لي السبب ولدها انه من الرضاعه وهي من اول ماهيب سمينه والبل ماعليها قصور علفها طيب والبل اللي عندي كلها سمااااااان ولافيها كلام بس هالعشرا اللي انا متحير منها مع انها تجي للعلف وامورها طيبه وتاكل مع البل بس الضعف هاذا اللي مالقيت له حل ولكم جزيل الشكر

تبيلها خير
اعزل ولدها واكرمها وان شبكتها هذه الايام تقوى بسرعه
حلها بايدك يابومحمد

نعم كلام الاخ عيد عين الصواب انا كان عندي ناقة عشرا نفس حالة ناقتك وسويت مثل كلام الاخ المنصوري
وصارت الامور تمام

عيد المنصوري & محمد العنزي

انا ماقصرت معها عزلتها وحطيت لها برسيم ورودس وشعير بس مااش ياخوك

مع العلم ان ابلي مااعطيها برسيم مااعطي الى الحشوان وهي بس

يابو محمد خل ولدها معزول عنها حتى تغرز وعطها ابرة هيام الفرنسية وابرة الجرب واذا القحت ان انشالله بتزين وتسمن إن شاءالله

خالد الحجي لاهنت على الافاده

أخوي سالم

مع كلام الأخ خالد
أول شيء أعزل ولدها
ثم طال عمرك أعطها أبرة الهيام الفرنسية وعقب أسبوع أعطها أبرة الجرب (السوبر) تحت الجلد وكررها عقب 14 يوم
وعقبها بسبوع عطها حبوب الدود المركزة أنا أفضل تعطيها حبتين وعقب 12 إلى 14 يوم عطها بعد حبتين

وعقب هالكورس المركز
عطها شهر وكرر عليها حبوب الدود المركزة فقط
حبتين .. وعقبها من 12 إلى 14 يوم حبتين

وأكرمها وإن شاء الله بتسمن.

اخووي فهد لاهنت جعل عمرك طويل وبنجرب عسا الله ينفع بها وشكرا