الناقه ماتقدر تاكل؟؟؟

السلام عليكم ورحمته وبركاته مساكم الله بالخير
عندي ناقد فاطر القحه من قبل اسبوع بدت تضلع من يدها اليسرى واذا جت ترخي راسها للاكل ترفع يدها وهاليومين يقول العامل اشتد عليها اكثر حتى ماتقدر ترخي راسها ...
اللي عندي خلفيه عن هذه المشكله يعطينى الحل ولكم تحياتي

المشكله لايوجد وصف كامل للحاله وهل الناقه بخفها شي ام من وين وجعها

الأخ عيد مشكور على ردك خف الناقه سليم مافيه شيء أنا قصيت على ضلوع الناقه مافيها شيء لأنه توقعته فجور والألم في كتف الناقه

ولك تحياتي

ارفعو لها لاكل لما تلقون حل

والله يعينك

انا مع احترامي ما فهمت
هل المشكلة ماتقدر تنزل راسها او تضلع

العامل يقول الناقه تشتكي من رقبتها ماتقدر تنزل راسها للطعام بالأرض لكن ادا رفعنا لها الطعام تاكل طبيعي ومشيتها طبيعي واالالم في ارقبتها بعد النحر بشبر او شبرين وتحس انه فيه ورم بسيط جدا لالمسناه تألمت الناقة ولكم تحياتي

السلام عليكم ورحمة الله وبركاته

اخوي خالد الحل انشاء الله موجود والتوفيق من عند الله الشي الاول ان انت تقول الناقه لقحه صح .؟

انا عندي لك خلطه انشاء الله يفيدها والتوفيق من عند الله تاخذ لها بيكوم فتامين بي 1 بي 6 بي 12 فيه بيكوم الهندي وفيه نوع فرنسي وانتبه في نوع مايصلح للناقه القحه اسئل الدكتور هو البيكوم او الفرنسي وتاخذه لمده ثلاثه ايام 20 سم وفيه مضاد حيوي تبع الاعصاب بس اسئل الدكتور هو ينفع للقحه او لا قبل لان والله انا ناسي اخوي و الشي الثاني فيه علاج ثاني ودي تعطيها لاكن الناقه المشكله لقحه وخايف على الي في بطنها وممتاز جداً واذا الناقه مقرب علمني عشان اتابع معك . والشي الثاني تسوي للناقه عرابيد على جمع اليد تخلط دخن وحلبه مع دقيق بر اومجروش بر وكلها مجروشه او شبه مطحونه . وعطها تدريجي اول شي صغير كبر الفنجال مرتين وبعد كذا عطها كل يوم والعرابيد تسوى باليل وتنشر عشان تنشف وتعطى الصباح ثلاث عرابيد بس وانشاء الله يفيد لمده ثلاثه اسابيع ولاتكثر من الحلبه يعني مقدار كاس بلاستك تبع الماء الورقي و لان الحلبه تكثر الحليب و الناقه تقول لقحه وانا خايف على الناقه .

واتمنى لك ان تصح الناقه وتسر خاطرك امين .

الأخوان مشكور على ردودكم الأخ عبدالله الناقه لها في اللقاح اكثر من 8 اشهر
وهالوصفه الدخن والحلبة تخلط مع ايش مافهمتك ممكن توضح اكثر والعرابيد مافهمتها المعذره ولك تحياتي

السلام عليكم ورحمه الله وبركاته

اخوي خالد العرابيد هي تسويها من قليل من الدخن قد كاس تبع الماء البلاستك والحلبه مثل مقاس الدخن والدقيق مقدار كاسين وتخلطها مع بعض مثل العجينه وتسويها عرابيد مثل كوره التنس الارضي لمده ثلاثه ايام او اربعه بعدها تزود الكميه في الدخن كاس و والحلبه كاس والدقيق كاسين وتخلطها مثل العجين وتسويها عرابيد مثل الجمع في يدك وتخليها على ثلاثه لقمات او اربع على حسب الكميه او اذا تحب تسويها مثل الخبز لما تنشف وتصير مثل الخبز تعطيها كل يوم وخلك وسط ماتكثر ؟ وانشاء الله تشوف تقدم ولاتنساء الابر الي قلت لك مصاد حيوي تبع الاعصاب والمفاصل يسمونها ابره الضلعه مضاد حيوي وقبل اي ابر تاخذها اسئال الدكتور تصلح للناقه القحه او لا .؟؟

تمنياتي لك التوفيق انشاء الله

الاخ خالد
اذا الناقه فيها اتفاخ في صدرها عند المبرك هذا هبوب وهو غازات متجمعه وله كذا حل منها تعطيها 3 قوارير زيت السمسم او حبت البركه وتكثر منه ولها كوي في الرقبه من يسار من النحر امكن شبر بتجاه الراس بالشكل هذا ا__ا__ا__ا

بيض الله وجيهكم الأخ عبدالله والاخ فيصل ابشركم الناقه الحمدلله الحين احسن والحمدلله لأن الدكتور يقول انه التواء عصب واعطها ابره والحمدلله الحين افضل

السلام عليكم
يمكن البلاء من فقرات الرقبة
والله العالم
تقبل مروري
,,,,