يالله بليلن فيه رعاد وبروق .. نوه عروض سامراتن بروقه
لاساقه الغربي غدا نوه طبوق .. يضفي على الربع الجنوبي حقوقه
يسقي لنا عدن مضاميه عروق .. ومنين ماجيته طوالن عروقه
يجيه من صوب الخليلين طاروق .. وعند الحظاير يظهر سهيل فوقه
بلاد الدواسر كلها عنه من فوق .. وعدود يام كلها من شروقه
مادام باقي العمر بتبع به النوق .. ومادام لي في نية البدو شوقه
لاشفتها ترعى زهر كل زملوق .. يعيش قلبي يوم تقطف عنوقه
غديت كني يوم عاشق ومعشوق .. يوم الهوى لي ضاحكاتن طروقه
احب من الدكان والقصر والسوق .. واحب من غرسن تمايل عذوقه
واخير من اللي ياخذ الدين بنطوق .. يطلب من البنك الزراعي حقوقه
اللي لبنها غايتي كل ما ذوق .. يغني عن اكل الزاد ماغذي سوقه
الشاعر/ مسعود بن عنبر المقابله الدوسري
تعليق