أدفعو للوضح زينات الوصايف
الشاعر/ محماس بن شميسان العتيبي - قصيدة الابل
ادفعو للوضح زينات الوصايـف *** لين تظهرلي جميـع اوصافهنـي
افرقن في لونهن والطبـع كايـف *** كنهن عسكر نظـام ليـا مشنـي
وان ندبهن راعي القعده خفايـف *** يلحقنـه وان عقبـهـن يثقلـنـي
كنهن جولٍ يحوز عـن الحتايـف *** للمعشـا لـو تبعـد ياصلـنـي
زينهن يوم اقبلن صـفٍ ولايـف *** كنهـنـه للحـمـاد يلاعبـنـي
يوم اوصف مشيهنه مشي خايـف *** والفحل مقهور مـع مقهورهنـي
كن لمع الوانهن لمـع الصحايـف *** والوبر مثـل الحلـق بفروعهنـي
والجنوب عراض وبطون العسايف *** والظهور من الفقايـر يظهرنـي
مع عراقيبٍ مثـل فنـدٍ مهايـف *** وغير جـل اذيالهنـه يقصرنـي
والغوارب متن شاهـوقٍ مسايـف *** للنسانيـس السـنـاد يسنـدنـي
والنحور وساع وارقابٍ نحايـف *** العدالـه والـرهـا بارقابهـنـي
والأذانـي لاقصـار ولا نوايـف *** فاهقـات مناسبـات لوصفهنـي
شرعٍ بسفـوح هامـاتٍ قنايـف *** حول شبريـن المسافـه بينهنـي
وضحٍ اشبابٍ عليهـن الحسايـف *** روسهن روس الجمال بحجمهنـي
والوجيه الها تواصيـفٍ طرايـف *** الخدود عـراض مـن ميزاتهنـي
والعرانيـن الكرانيـف العكايـف *** واللحـي مـن المهنـد ياخذنـي
والمشارب كنها بيـض القطايـف *** ضافياتٍ قـدم رثـم خشومهنـي
طافحاتٍ وصفهن مابـه كلايـف *** كنهـنـه للخـيـال يخايلـنـي
وعظم وحدتهن مع العمر متكايف *** بين دق وبيـن جـل عظامهنـي
كل مافيهن مـن ميـزات نايـف *** بالرهـا يقـفـن والا يقبلـنـي
تعليق