يابوي في صدري هواجيس وهمـوم
واللـي بـرك للحمـل لازم يشيلـه
قد لي اسبوع ما ذاقت عيونـي النـوم
ياكود غفوة ذيـب فـي كـل لليلـه
ادور الراحه عسـى خيـر مقسـوم
وشلون صارت راحتـي مستحيلـه
يابوي وانت اسمك مقدر ومحشـوم
وان تاهت اقدامـي تـراك الدليلـه
تعبـت وانـا اقبّـل جبـاه وخشـوم
واجامـل اللـي مانفعنـي حصيلـه
صارت حياة الناس من يفرق السـوم
واللي ما معه فلـوس ياعزتـي لـه
قلّوا هـل النامـوس ذبّاحـة الكـوم
وكثـروا مـزودة الهـروج القليلـه
وزادوا هل النمّـات طـرادة اللـوم
هذا تحكي فيه وهـذاك تحكـي لـه
وشفنا شيوخ الاسم من غير مرسـوم
اهل البشوت اللـي كممهـا طويلـه
لو انهـا بالسيـف ومناطـح القـوم
ومداحـم الفرسـان يـوم الدبيـلـه
في ذمتي ان تشوف شجعان ورخوم
وتشوف بعض الناس يومـي شليلـه
لكنهـا شيخـة دنانـيـر وخـتـوم
وشيخ الدراهم فـوق شيـخ القبيلـه
وانا اعرف ان الناس معطى ومحروم
واللـي كتبـه الله لعـبـده يجيـلـه
لكن مهمـا عـاش لابـد لـه يـوم
يحـط وسـط الحفـره المستطيلـه
وانا لانـي ظالـم ولانـي بمظلـوم
لكـن علـي حمـول بقعـا ثقيـلـه
آجابـه الدنيـا ولانــي بمـلـزوم
اطرد ورى بـرقٍ سـرى فالمخيلـه
وسلامتكم
تعليق