سقى الله سنياتٍ مضت لي وانا بـزر
وانا جاهل درب الهوى ما عرف لونه
وانا دمع عيني كل ما هل من شهـر
هماليل واخفي عن هلي لا يشوفونـه
ونوب تهل دمـوع ونـوب دمٍ حمـر
ونوب كما عد ٍ هل الطرش يردونـه
أنا حالف ما انساك يا هايف الخصـر
ولو كان قبري قاعة الحيـد يطوونـه
ولا ياهل المجمول ماعاد بـي صبـر
وذي بندقي في ما تقولـون مرهونـه
ويا عم..يا المنعور مافي يدي حجـر
بزيّك يبي سمح القبل داعـج عيونـه
أبو لبةٍ عفرا وطـوقٍ علـى النحـر
ويا مخبلك يا عاذل القلب مـن دونـه
ولا يمّحي حبٍّ عليـه اللحـم جبـر
سطى في العظام وصافي الدم من دونه
وانا ماذبحني كود ابـو مبسـمٍ حمـر
تجيبه حلوم الليل والبعـد مـن دونـه
ويا ونتي ونة مريـضٍ بـه الخطـر
توعّى وشاف الخام فوقـه يقوسونـه
الا يا وجودي وجد من لا بلي صبـر
صبور ٍ على الفرقى ليا غاب مضنونه
ويا فوح صدري فوح بنٍّ اليـا طفـر
تعدى الحدود وسجوا اللـي يصالونـه
ومنزالهم مابين (جهويله) الـى (قطـر)
ورمث الزبار الزين ما هـم يحلونـه
عسى من يلوم القلب في ناقل الزهـر
يجيه العمى وانا من اللـي يقودونـه
تعليق