للـــــتـوااااااصل
[poem=font="simplified arabic,6,#1e2e78,normal,normal" bkcolor="" bkimage="" border="none,4,#400000" type=2 line=1 align=center use=ex num="0,#400000"]
ياسعد عينك يالسلي تهتني النوم=وأنا عيوني لاغفت قمت مرتاع
عزي لمثلي دايم الدوم مهموم=مركب همومي في البحر ماله شراع
وطيور فكري في الفضا تبعد الحوم=وتهبط على النايف ولا تالف القاع
مهبط حرار ٍ مايجي حوله البوم=الحر مايهبط على القاع لوجاع
وباروح من دار ٍ بها الضيق وأشوم=أشوم لديار ٍ رفيعات ووساع
ومانيب في رفقة هل المكر ملزوم=اللي صداقتهم بها مكر وخداع
مشيي وحيد ٍ في صحاصيح وحزوم=أخير من رفقة خبيثين الأطباع
البارحة ليلي تفاكير وهموم=وحاولت نوم العين يضوي ولا طاع
لانيب لا صاحي ولانيب منجوم=لكن بلاي القوم غادين الأسناع
اللي عليهم من مواجيبهم لوم=تورثوا مجد ٍ من يدينهم ضاع
مجد ٍ لأوايلهم على العز مرسوم=بالدين والسيف الحدب في الملا شاع
مجد الرجال مدلهة كل مضيوم=أدناهم اللي يشري المدح ماباع
واليوم وقت الضعف بالذل ملطوم=وفهودنا لأوامر الذيخ تنصاع
وصرنا نداري خطّر الفرس والروم=اللي طعون أسلافنا فيهم وساع
الليل حندس ماظهر وسطه نجوم=فيالله بنجم ٍ يكشف الليل لمّاع
فوين أنت ياللي للثقيلات زيزوم=ياللي على لطم المعادين بتّاع
تبرك لحمل ٍ كنه طويق وتقوم=وتضرب بسيف ٍ للصليبات قطّاع
وحنا جنودك وأنت تامر ومخدوم=نرد مد أخصامنا عشرة أصواع
أما نعيش بعز والخصم مغموم=ولا نموت بعزة ٍ صيتها ذاع
رجل ٍ بلا عزّ ٍ حقير ٍ ومذموم=لا صار خصمه به جسور ٍ وطمّاع
العز في العليا على رأس مزموم=وربيبها الأحرار وفهود وسباع
واللي يروم القاع بالشين مضيوم=يمشي وهو مكره ذليل ٍ ومطواع
ورأس الردي بالذل والعار موسوم=لاهوب هدّاد ٍ ولا هوب فرّاع
وأزكى صلاة من الملا دايم الدوم=على نبي ٍ للمصلين شفاع[/poem]
تعليق