بعير الكيرعاني

السلام عليكم ورحمة الله وبركاته
مساكم الله بالخير يالربع
ونعم بالكيرعاني علمه غانم وبيض الله وجهه ومن جاني يمدحه
بس بستفسر يالربع أنا جاني علم
أن بعيره ينطل زرق وأكدو لي رجالين
هل أحد جاء معكم انتاج على بعيره؟
وسلامتكم

الاخوان الأعزاء مع التحية
السلام عليكم ورحمة الله وبركاته :
جتني الاخبار خلال اليومين ومن رجال ثقات وياتون بالعلم وهي كالتالي :
1- انتج عليه قعود (املح) من ناقة (زرقاء مجاهيم) وعند شيباني صوب الخاتلة .
2- انتج عليه بكرة (زرقاء مغاتير) من ناقة (ملحاء) وعند عتيبي صوب الدوادمي .
3- انتج عليه بكرة (زرقاء) من ناقة (ملحاء) عند قحطاني صوب الفروسية .
4- انتج عليه عند الكيرعاني بكار (زرق) من نوق (مجاهيم) صوب عزبته دون (رويغب).
واتمنى اني قد كفيت في ذا الموضوع وسامحوني على القصور .
وتقبلوا مروري ...

سؤال / 1- الزرق اللى تجي على البعير هل بيتغير لونها الى مجهم في المستقبل وخاصة اذا كانت امها غرابية ؟

مساكم الله بالخير جميعاً
حبيت اشاركم بالموضوع الي عن بعير ابو فارس الله يرزقه منه
انا ضربت عنده العام وانتج عندي بكره سوادء من ناقة فيه من الصهاب شوي والله يرزقنا ويرزق المسلمين اجمعين

ماشاء الله تبارك الرحمن

انا شفت بكره غرابيه من ناقه اقرب للصهاب
بيعت في الطائف ب 150 الف مع امها ووصلت في الرياض 450الف