تباشروا بسهيل دار بمداره * * تباشروا به بينكم يارجاجيل ( جديدعرض البل وقت الشديد )
ياللي تعدون الليالي المقابيل
اليوم كلن يعتني في وجاره
ويصف من حوله دلال ومعاميل
تباشروا بسهيل دار بمداره
تباشروا به بينكم يارجاجيل
نجمٍ يجينا كل عام بزياره
اليوم كلن يرقبه دون دربيل
عقبه يدارجنا النهار بقصاره
نونس براده مع نسيم آخر الليل
يطيب للوبال عقب الحراره
تجهيز جيبه بين صلِّح وتبديل
ويطيب للوبال باول نهاره
جذب الدلال اللي تبي بن وهيل
يالله بنوٍ ممطرٍ في غزاره
الماطر اللي ضربه ينوِّخ الحيل
من التريبي لا شمال ام عماره
تفرح به العربان من قوَّة السيل
عقبه نشوف الروض زاهي بخضاره
رويان من كثر الندى والهماليل
ومن عقب ذا يازين شوف مجاره
في خايعٍ مابه شبوك ودراكيل
أمد شوفي ماترده زباره
مدٍ خلي والقاع قفر ومداهيل
نجلس على ضوٍ تطاير شراره
يدور فيها البن الاشقر مع الهيل
وسوالفٍ مابين جد وعياره
على وجارٍمابه إلا مشاكيل
هذا الغنى يامدورين التجاره
كسب المراجل من خيار المحاصيل
كلمات/ سعود الجوفان
مع بعض التعديل مني
أخواني الكرام أقدم لكم عرض للبل
اتمنى يرتقي لذائقتكم
تقبلو تحيتي
تعليق