اللي عنده سوال عن زيان الابل ما عدا المجاهيم

تحيه

الاخ عبدالله السلمان

نسأل الله ان يبارك لنا ولكم ولجميع المسلمين

بالنسبه للناقه مبروكه وناقتن عايديه من حيث المواصفات

الوجه عادي وكذلك الرقبه والظهر والجرم

وبنتها تراها نسخه من امها بالضبط

اذا كنت راعي منايح مايهمك واما اذا كنت تدور زين وانتاج
شف لك ناقه غيرها

المزحمي

تحيه

الاخ بندر الفالح

الله يعافيك ولا شكر على واجب

السلام عليكم
- جزاك الله خير - على هالموضوع الطيب
ابي استفسر عن جمل اسمه : رمان , يقال انه من ساس رمان للملك خالد
كان عند الامير محمد بن سلطان (صاحب شركة المراعي) واهداه لواحد من الجربا ...
والحين عند شمري في جوسمين في الجبيل . فالسؤال : وشو من فحل؟؟؟ واشلون انتاجه؟ لاني سمعت ان انتاجه بيع غالي على كلام ضيدان العجمي
(((اللي يعرف عنه شي يفيدنا مشكووور )))

وترى عليه وسم ال سعود

تحيه

الاخ فهد

وعليكم السلام ورحمة الله وبركاته

البعير اللي ذكرته ماعندي علم فيه ولكن طال عمرك انت ذكرت ان ساسه
على رمان الملك خالد رحمة الله عليه

وكان عند الامير سلطان بن محمد وانا طال عمرك اقول ان البعير ماهوب جاي ردي
وانت ذكرت ان انتاجه مذكور لك طيب

الساس مايحتاج وراعيه الامير ابو نايف سلطان بن محمد راعي ابل خيار ولا يقنى الا الطيب

المزحمي

جزاك الله خير وما قصرت

تحيه

الاخ فهد

حياك ولا شكر على واجب

السلام عليكم ورحمه الله وبركاته
في البدايه اشكر الاخ عبدالله بن مطلق المزحمي على التجاوب مع الجميع وعلى روحا الطيبه وهذى مهي مجامله ولكن الحق يقال وعلى الموضوع المفيد والى يتابع
طلب اخوانا الاعضاء فى اخذ راى الاخ عبدالله في ناقه ولا فحل ولا غيره ورده عليهم اكيد بيستفيد.
ودي اعرض لك ناقه وش خبرها.

الأخ/عبدالله وفقك الله
أخوي أبسألك عن فحل اسمه الحاكم ولد الأرقم
شريت مفروده ويوم نشدت عن أبوها قالي راعيها بنت الحاكم ولد الارقم جمل اليامي بالرياض
وسئلت عنه مالقيت جواب كافي اخر جواب لقيته انه جمل سبوق وفايز بسيف الشيخ زايد في الامارات من قبل
السؤال من هو الحاكم ولدالارقم
انتظر ردك لاهنت يابو مطلق

الله يعطيك العافيه يابو مطلق

ومجهود تشكر عليه

أخوي أبو مطلق الله لايهينك أبي رايك بهالبكيره للقناي وضحا وتلاقي بعد أسبوع أو أكثر وكم تسوى

تحيه

الاخ طارق

وعليكم السلام ورحمة الله وبركاته

واشكرك على الكلمات الطيبه ونسأل الله ان ينفعنا واياكم

بالنسبه للناقه يقالها صفرا مجاهيم وشكلها اقرب للمجاهيم

لذلك لا ينطبق عليها مواصفات المطلوبه في المغاتير

افضل شي انك تسال عنها اهل المجاهيم

تحيه

الاخ محمد الجهني

السلام عليكم ورحمة الله وبركاته

موضوعنا طال عمرك عن زيان الابل المغاتير

ومواصفاتها وايش المطلوب فيها من مواطن الزين فيها

وانا لا املك الاجابه عن الهجن وبعارينها ومواصفاتها

واسمحلي

المزحمي

تحيه

الاخ عبيد

الله يعافيك ولا شكر على واجب

تحيه

الاخ سلطان

نسأل الله ان يبارك لنا ولكم ولجميع المسلمين

بالنسبه للبكره عاديه من حيث المواصفات

البكره فيها سخف ولونها زين وكذلك و وبرتها معكرشه

اما الباقي عادي

اما القيمه والعلم عند الله من ست الاف الي سبعه

المزحمي