الفزعه خلفه تغص بالعلف ولا تاكل

مساكم الله بالخير

ياربع عندي ناقه خلفه توي شاريها سنها ام خمس تحتها بكره تو ماجالها شهر

الناقه حالها ضعيف مجيوبه من البر ودايم تضرس واذا اكلت العلف تغصبه وتقوم تسعبل وتزبد اكرمكم الله

لدرجة انها معاد تقدر تتنفس الا بصعوبه لين تلفض الي في فمها وها لحاله ماتجيها الا اذ اكلت

لدرجة اني احيانا احتريها تموت من قو غصتها غيرت العلف وحطيت شعير بس اكلت شيء مايذكر مع العلم ان الناقه مافيها نفوخ
وصحة بنتها زينه

فيه ناس قالو هيام وناس قالو دود واليوم ابي رايكم من عنده خبره ولا مرت عليه مثل هالحاله يفزع لي

برك الناقه وعقلها وافتح فمها وشف شدوقها من الداخل تلقا فيها زوائد مثل الشوك ..ان كان طولها زايد بحيث انها يمكن تقرضها مع الاكل فهذي علتها والعلاج بسيط ...شف لك مقص حاد وقصصها واحذر على يدك لا تروح بين الطواحن وبعد التقصيص افركها بملح خشن وانتظر النتيجه...وان كانها طبيعيه فالناقه يمكن في حلقها شي دور لك طبيب شعبي جيد والا بيطري عنده خبره وخله يشوف ناقتك

الله يشفيها
ولايخسرك

مثل مقال اخوي حاصل اليامي
الله يشفيها

مع أخوي حاصل بلاها في حلقها يمكن ناشب شي من الأكل بحلقها
شوفلك رجل خبير أو بيطري ممتاز والله يشفيها ولايخسرك

اخوي حاصل جزاكـ الله خير

جاري الكشف..........

فيصل
مسلم
احمد
الشكر موصول لكم على المشاركـ والتواصل وجزاكم الله كل خير

هذا حصل عند واحد من الربع في بعير والسبب انه ضاربه الراعي على لهاته(على رقبته) وداوم على الشوار(النخاله)طبعاُ مع الماء وايام قليله زال الالتهاب وطاب البعير.

مثل ماقال حاصل
انا صارت عندي في ناقه شريتها ولا تاكل اكلها
ردي بالحيل ورحت للبيطري قال عطها حبوب دود
ولافادت وجبت لي رجال واول شي سواه فتح فم
الناقه ولقاه مليان من هالهدب
وقص الزوايد وحط لها ملح وابشرك الناقه كل يوم
احسن

الله يشفيها ان شاء الله

هذه احصلت في قعود لواحد من الربع وراح به عند الجامعه ودخلوا في فمه منظار وطلع فيه سدد عباره عن قطعه قماش ملتصقه في مجرى الاكل وعملو له عمليه بسيطه وهو بصحه ولله الحمد بعد العمليه

ناقتك الله يشفيها مهدبة وعلاجها مثل ما قال الأخ حاصل اليامي

شريت لي ذود قبل رمضان الماضي واخبرني راعيه الاول انه مايعرف الشعير ابد
عانيت من هالمشكله فكل ما تعشت البل طلعت ثلاث او اربع غصص لين اقول بتموت
قلت بعدين تعود عليه وبعد 5 اشهر اضطريت احول على المكعب مما شفت في هالمساكين كل يوم ورغوها يتزابد
الان على المكعب كل شي على مايرام واكلها زين ولا فيها الا العافيه
حبيت انقل لك تجربتي والله يوفقك

هذا المرض يسمي (( الوخام ))
فك حلق الناقة مثل مقال اليامي وقطع الزايد وعلك بالملح الخشن وافركة وأنشالله يشفية الله سبحانة

يالربع ممكن شرح مفصل للمرض وعلاجه عشان نستفيد