كسر رجل البكرة فيه امل والا يخلف الله؟

انكسرت رجل بكرة-لقية- اليوم والظاهر انه كسر قوي مابعد شفتها ابشوفها بكرا انشاء الله ولكن حبيت انشد ان كان احد قد عالج كسور الابل حتى لو الامل ضعيف لانها بكرة مزيونه الله لا يخسر علينا ولا على كل مسلم..اللي يخبر لي رجال يعالج ويجبر تكفون دلوني عليه الله يجزاكم كل خير،،،

مرحبا يا تركي

انا خابر رجال انكسرت عنده حقه وجاب بيطري وجبرها بالجبص

والان ما فيها الا العافية

مرحبا ياتركي اذا الكسر قوي الله يخلف عليك بخير منها وعذابها المبرك والمقام وتريح بقصبها .

يا مسعود جعل من جابوك في الجنه انا واعدت لي بيطري بكرا بيجيني يقول بيجبرها بس ان كان رقم البيطري اللي جبر ناقة رفيقك حولك اكون لك من الشاكرين لو تعطينيه استصاف منه واخذ العلوم لا يتعبث في البكرة البيطري اللي بيجيني ....جزاك الله كل خير وجعلها في موازين اعمالك،،

مرحبا يا تركي

انا خابر رجال انكسرت عنده حقه وجاب بيطري وجبرها بالجبص

والان ما فيها الا العافية

والله يابو عدوة الناقة عجزت لا تقوم من انكسرت لكن يقول الراعي ماصب منها دم وكسرها حدر الركبة بيجيني البيطري بكرا وفي رجا الكريم الاكرم،،، جعلك دايم سالم غانم

مرحبا ياتركي اذا الكسر قوي الله يخلف عليك بخير منها وعذابها المبرك والمقام وتريح بقصبها .

اخوي انكسر عندي حاشي قبل اربع سنوات تقريبا والكسر في يده وجبرته بنفسي وجبر والحمدلله وكانت اول تجربة لي ونجحت انصحك بتجبيرها والمحاولة قبل ماتقصبه وحاول انك ماتستعجل في فك الجبيرة حتى تكون جابرة تمام
والله يعينك ويبارك لك في حلالك اخوك ابوطارق

بكررتك تجبر ان شاء الله لاكن لاتطبطي اجبرها باسررع وقت

واالله لايخسرنا وياك

[align=center]
يا تركي الله يصبحك بالخير . أول شي كل ما كان الأسراع بالتجبير فهو أفضل بكثيررر طبعا , ثانيا البكره دامها لقيه فهي توها صغيره , وأن شاء الله بتجبر بس أهم شي اللي يجبرها يكون رجال شاطر علشان يتراكب العظم على بعضه إن كانه من الكسور الكايده , ثالثا لا تتركها تمشي أو تفلي مع البل , وأهم شي أهم شي , أنتبه لها لا تاكل تمر , وأن شاء الله بتجبر وترجع مثل ما كانت أن شاء الله .
[/align]

بإذن الله الكسر يجبر
لكن وأنا أخوك
لا تتأخر عليها وأحرص على الدكتور الشاطر

وسلامتك

[align=center]
الله يجبر كسرها
وياليت تكون متواصل بالموضوع بالمنتدى وتعطينا العلوم يوم وراء يوم عن حال التجبير لتعم الفائده
[/align]

اخواني الكرام عبدالله عبدالعزيز و قاسم ابن صنيتان و عبدالله العنزي وفهد الاحمد ومحمد التميمي مشكوررررررررررررررررررين كل رجال باسمه الله لا يهينكم ولا يخسر عليكم ولا على كل مسلم ويجزاكم كل خير يالاجاويد....حقيقة بيض الله وجيهكم كلكم-كلمة حق والله مادور وراها شي---عز الله انكم تبردون الكبد وتحبون لاخوكم المسلم مثل ما تحبون لانفسكم ...ما امداني اكتب الموضوع الا وجتني ردود ومعلومات من الشقرديه اما هنا او على الخاص فالله لا يخسر عليكم ولا على كل مسلم ويبارك لنا ولكم...

اما حال البكره فالحمدلله على كل حال....جبنا لها البيطري وشافها ويقول فيها ثلاثة كسور واحد كبير واثنين الظاهر انها رضوض في العظم ....المهم اشتغل عليها من الصبح الى اذان الظهر وجبرها ولف فوق الجبيرة بلاستيك مقوى وشد عليه باسيام...البكرة خاطرها مهوب شين و تاكل لامن قربنا لها العلف لكننننننننننن المشكلة حركتها واجده تبي تقوم ...وكل ماحاولت عجزت وانسدحت يا يمين يا يسار وهذا حرك اللحم وأدماها وخوفي ان بيعوق جبرها...

شوفت الكسر تخليني اقول اريحها واوديها المقصب ورجاجيل جوني البارح كثروا علي يقولون اصبر عليها...ونويت اني اصبر الى الخميس ان تحسنت هالثلاثة ايام فخير وبركة والحمدلله وان تردى حالها فالله العالم اني بدور لها الراحه....والله يكتب اللي فيه الخيرة المباركة.

مسا الخير ياخوي أبو عمران

أفضل إنك تعقل البكرة وتقرب معلفها عند راسها عشان ماتثور وتعور كسرها

وعقل يديها الثنتين بساعات من النهار ثم حل العقل المغرب لين العشا ثم رجع العقال عليها ومن بعد الفجر حلها لين الساعة 7 ثم عقلها لين المغرب واستمر على ذي الحالة اسبوع وكلن ما وده إن تعبك يضيع والله يشفيها ويجبر كسرها

وهذا شوري والاخوان ما يقصرون وأظن شورهم مع شوري

دامت لك العافية ولحلالك

اسأل الله الكريم ياتركي أن يشفيها ويباركلك فيه ولايخسرك

السلام عليكم
كيف حالكم يا الربع؟
ان شاء الله طيبين
اذكر يا الربع السنه اللي راحت نفس الوقت هذا تقريبا انكسرت عند عيال عمي بكره في نفس سن بكرتك انكسر ساقها وجابوا لها بيطري وجبر كسرها بس المشكلها ان غفلنا عن حاجه وحده بس وهي انا في فصل الصيف والكسر مغطى عن الهوى واروح ومشى فيه الدود وما انتبهنا لها الا بعد كم يوم وحاولنا فيها فكينا عنها ونظفنا مكان الدود وربطنا عليها بس ما فيه فايده رجع الدود وبعناها على القصاب

حبيت انبهك يا تركي بن عمران لا يصير معك مثل ما صار معنا
وان شاء الله اكون افدتك

اخواني علي القرني واحمد العطية وفراج البقمي الله لا يهينكم وشوركم عز الله انه شوور غانم جعلكم تسلمون..

و ابشركم البكرة وجهها زين وصحتها باقية تسرر وهي على حالها لا تقوى تتحرك وعلفها ومويتها عند خشمها واحنا في رجا الكريم الاكرم الله لا يخسر على مسلم...