ماهو رأيكم بمن يمنع أضراب البعير على الناس

الي يمنع من غير سبب مقنع .... مافي خير وردي

وان كان الجمل في شي ..... ولا ناقتك فيها شي يضر الجمل ......... هذا عذر مقبول

والله يعين اهل الزمول الطيبه

اللي يبي يمنع هذا مافيه خير وضعيفه نفسه ولايداني خير لغيره
ولالله مبارك بحلاله

حلاله وهو حر فيه

ان تجمل وخلاك تعرض ضروبك بياض وجهه ومنعك . منت خشير له في حلاله

والرجال مادفع مليونيين الى على شان مايحتاج لاحـــــــد.ليش ماتنضرون لها من المنضور هذا .

ليش منضورنا دئما اناني ياخلني اضرب ابعيرك يانت رخمه ومافيك خير ومنت كفوا للابل ياخي

يمكن الرجال مايبغاء يضرب على بعيره الى انياق كفو تساعد البعير في طيب الانتاج . لان بعض

الابل صراحه راعيها مايستحي يجيك بجربنا وجها كنه سكروب والانتجت سكروب مثلها اشتغل سب

في البعير ونتاجه

عزالله ماهوعذر يجمّل ان راعي البعير يمنعه لأن ضرايب الناس ابل عاديّه

{ وَيَمْنَعُونَ الْمَاعُونَ }

مثل هذا بشره بالفلس
وتراه حرم نفسه وباخل عليها من حاجتين

الأجر العظيم عندالله في الآخرة
وحرم نفسه وبخل على نفسه من قولة (( والنعم )) في الدنيا

وسلامتكم

انا اعرف شخص ضعيف ما ديا وعنده بكره واعطا ها بنص وهو بدوي وما درا الا خويه الي اخذ البكره بنصف جا يه وعندما تقهوا طلع له مليون ريا ل قا ل البدوي ما ها ذا قا ل اله انا بعت البكره بثنين مليون وهذا نصيبك اندهش البدوي وشترا فله يوم الفلل رخيصه وسيا ره وا نا متكد ان البدوي بيدعي الصا حب البعير في ضهر الغيب ويدعي للمضمر بضهر الغيب علي اما نته والبعير المنتج ان صا ر عند وا حد حسود فهو اختبا ر من الله اله اعرف شخص عنده بعا رين منتجه سبق وهو يدور فطوره عند العما ل المسا كين الي ما سكين حلا ل انا س اللهم لا شما ت ضعيف نفس

السلام عليكم ورحمة الله وبركاته.
يا أخوان لنكن واقعين بعض الشي,والبعير مايمنع عنه إلا الردي من الرجال ولكن التنظيم مايزعل منه إلا الردي والآناني,فلو إن هناك صاحب جمل طيب وحشوه لها صيت بين أهل البل وجعل لإبله سهم من بعيره اللي إشتراه بالملايين لمده معينه ولمن أراد الضراب عنده لمده معينه,فأنا أرى إنه عداه اللوم,بشرط إن لايغط المضرب عنده صيت بعيره..
لإنه تحضرني قصه لإحد أصحاب الفحول الطيبه حيث يقول أنه لديه فحل منتج وكان بالقرب منه جار من كبار السن ولديه إبل من فصيلة الفحل وكان كل سنه يأتي إلى صاحب البعير ليستمنحه في إبله لمده معينه ومن ثم يقوم برد البعير إلى صاحبه,ولكن الملفت للنظر إن صاحب هذه الإبل عندما يسآله صاحب البعير عن عشار البل وهل عشر شئ منها على الفحل يرد عليه ويقول أنه لم يعشر عليه شئ منها,علماً أن صاحب البعير يقول أنني عند ولادة إبل جاري لايخفاني حيران بعيري,!!
ومن هنا يأتي هذا الجار في السنه القادمه ليمتنح البعير مدة أخرى وعندما كررت السؤال مرة أخرى رد علي بقوله لم يكتب الله نصيب من إنتاج هذا الفحل,!!
مما دعاني عند قدومه في السنه التي تليها أن أعتذر منه في طلب الفحل وقد عللت له سبب الرفض بأن الفحل لم ينتج عندك لسنتين متتاليتين ومن هنا فما الداعي لإعطائك الفحل,وقد غضب صاحب الإبل وأتهمني بالشح بماء البعير,!!
وأنا أقول أن رضاء الناس غاية لاتدرك ومن يمنع عن البعير فلاهوب في خير ومن يضرب عند الرجال وبغط إنتاج إركابهم ماهو في خير أيضاً,والتسامح زين وقبل لانحكم على الطرف الآخر لابد من التآكد من السبب..

ودمتم بخير جميعاً.

موضوع التضريب لو أخذناه بموضوعيه لطال النقاش فيه بسبب تعدد وجهات النظر التي يغلب عليها العاطفه والحماس والأنتصار للرأي
ولن يكتمل هذا النقاش إلا بوجود العنصر الأساسي ... أصحاب الفحول الطيبه اللي عليها الكلام ومن لهم تجارب لتوضيح وجهات نظرهم ومعاناتهم
وما يواجهون من أحراجات وما يقومون به من تنازلات على حساب انفسهم وحلالهم وما قد يتسبب لهم ذلك من ضرر
ومع ذلك حسب رأيي الشخصي لن يكون هناك عذراً مقبولاً مهما كان ... إلا عذر الفحل نفسه أو ما قد يلحقه من ضرر بسبب الضراب مثل العدوى أو ما شابه

ولنكن منصفين بعض الشئ هناك ناس ما تعذر أبد والناس تختلف حسب أجناسها والتعامل مع بعضهم قد يكون صعب

فقد ذكر كثيراً من الأعضاء كثير من النقاط المهمه تحتاج فرز واقتباسات من هذه الردود وجمعها لنخرج ( بزبدة النقاش )
ولكن يبقى الأساس والمهم والشئ الغير قابل للعذر أو المناقشه ألا وهو الرد الطيب سواء بالقبول أو الرفض .. بأسلوب لبق وترحيب ووجه بشوش وعلوم رجال .. فأن عدم ذلك فماذا بقي ؟!
فالأسلوب الطيب والعلم الغانم .. كفيل بأن يحفظ الناس لك هذه الحسنه وأن يذكروك بها حتى وأن لم يستفيدوا منك
وفي النهايه النيه الطيبه والصادقه .. هي أساس الرزق والبركه و التوفيق من الله ..

وعلى طاري التضريب ...

بحثت من وقت عن فحل طيب اضرب عليه كم ناقه .. فوجدت في أحد مواضيع هذا المنتدى الشامخ بعض الاخوه يذكروا فيه أناس فيهم الخير وأن شاء الله أنهم كذلك ( ولايهون الجميع ) ولا يردون أحد ... ومن الكلام هذا ..
فقلت لماذا لا أجرب بأن أقوم بمراسلتهم وستأذانهم .. فما شاهدته من ذكرهم كفيل بأن لا أتردد في طلب ذلك منهم وهذا ما شجعني على ذلك الطلب
ولكن للأسف حتى ( التعذر ) لم أحصل عليه وكأني لم أرسل شئ ( بالعربي حتى تعبير ما عبرونا ) ولو بإي عذر أو كلام .. وكان يكفيني ذلك لقبول عذره عشان نشوف غيره ولحفظ ماء الوجه

وصدق من قال ( الرجال مخابر ماهم مظاهر ) ....

هاذا خمام كرمتو جميع

البعير ما يرد عنة الا الردي الزلابة

ماتدوم الدنيا للفقير والغني لانها فانيه

مايدوم بين الناس غير المعروف والعلم الطيب ولا ماكان العرب تصنف الناس حسب افعالهم اذا ورد
في مجالسهم اسم الرجال ان كان حيا يقال عنه والنعم عزالله انه رجال كفو وان كان ميتأ الله يرحمه
مذكور بالخير والطيب والبشر يختلفون منهم من يتمنى الغنى ليكرم ومنهم من يتمنى الغنى ليبخل
حتى ولوكان في بول يعير............................طرالي بيت من الشعر يقال انه لشاعره
الطيب يالي تريدونه.....رجم طويل فوق قاره
بس البلا شعيب دونه....كله خنابيق وجحاره

رخمه ولا تبرابه الذمه

طرى علي قصيده طويله لشاعر طاحوس بن عيبان الدوسري في اللي يمنعون من الفحول وبجيب منها بعض الابيات
يقول فيها

الفحول الطيبه كلن يبيها == مير ماكلن بيقدر يشتريه

طيروها بالملايين الكثيره

فيهم اللي لاشراه وجا يسوقه == قال كلن مانقصر في حقوقه

مرحبا بهل الكبيره والصغير

مرحبا باللي لهم حقن علينا == والقبايل كلهم منا وفينا
مانفرق بين سكان الجزيره

فيهم اللي مايرد اللي يجونه == مير فيه من الحسد شعبه ومونه

وظواهر بيض والموت السريره

كل يوم وقصراه يطردونه == مقفين واللي وراه يتابعونه

مستهيف وكل يوم له بديره

مايجي من اليوم والصبح وقفيه == لين يقضي حاجته راعي المطيه

ويتجمل في الضيوف وفي قصيره

وفيهم اللي قام يطرد عن بعيره == حاسدن لاياخذ الانتاج غيره

الله انه لايبارك في بعيره

ماتجمل في الرجال الله يصيبه == وحتمى عرضه وذل من الغليبه

والخساره مبرك بعير وذريره


ويل للي يمنع الماعون ويلاه == وادي في النار وبعوره طويله

خوفو الله وحذرو عمى البصيره

وسلامتكم والمعذره على الاطاله

اللي يمنع من بعيره مافيه خير مهما كان السبب اذا كان البعير يضرب الا اذا كان البعير مريض ومحمي ولا يضرب حتى ابل صاحبه
ولا احد يالربع يحط مبررات او يتعذر تراه يلحقه كلام لان الردى رداه على نفسه ولا هو بلاحقك من رداه شي الا اذا وافقته في رداه فانت مثله لان الراضي كما الفاعل

والرجال اللي يحط سرى ما يجمله ودك ان ماعنده بعير ابرك له لانه يلحقه الملام

واول ما يجب على راعي البعير اللي يدور للعلم الطيب قبل يحط السرى ان يضع نفسه مكان اهل السرى وينظر لترتيبه بنظرتهم هل لو كان مكانهم يرى الترتيب مناسب ام لا

ويستشير بعض العقال واللي فيهم خير من اهل السرى وياخذ بالراي الانسب والاصلح للجميع

واللي فيه خير من اهل الركاب الطيبه يصير هو واهل السرى في البعير سوى ولا يتمنن عليهم ببعيره







[poem=font=",6,,normal,normal" bkcolor="transparent" bkimage="" border="none,4," type=0 line=0 align=center use=ex num="0,black""]
ليت الركاب الطيبه عند الرجال الطيبين = عند الرجال اللي قبيلتها تزود بزودها
اللي الى جا ذكرها قالو ونعم الحاضرين = ويطلق لسانك فعلها والطيب سلم جدودها
كنك الى من جيتهم متجملن فيهم سنين = ومنزالهم روس العدايم والرجال ترودها
ولا الردي ما ودك انك تجيه والخافي يبين = الى استوت جمالته في العالم ومنقودها[/poem]

السلام عليكم

احد ملاك الفحول الهجن المشهوره

السرا كان عنده كبير جدا حتى ان الفحل تفطرت ركبه راح يدخله النادي وقال بدربه عشان بس يخفون الناس


اما البعض بدون سبب يقفل على بعيره تجيه متعني معاك ناقه يقول للراعي قله اني مو موجود

ومحرص على الرعيان مايطلقون الفحل


ونصيحه لو بتضربون عند احد لاتروح الا مكلمه

ترا اقسى شي على النفس قهرها

الاخوان ماقصروا وكلن اعطااا راية وفية اتفاق بعدم منع بول البعير وهذا سلم الاجواد من قديم والحين ... لكـــــــــن الحين فية ناس تجي تضرب هلايم (اسم ناقة ) من بعير طيب ويبيها تنتج
وذا جابت مثلهاااا طاح سب بالبعير وان انتاجة تعبان وشوة سمعت العبير ، وفية من يجيب لك ناقة جربااا ويبي يضربهااا وذا تعذرتة فضحك بين الناس ولا ناقة صعود مالها عشر ايام من اصعدت
ويبيك تضربها لة .

[منذر الدوسري]

المفروض إذا كانت نظيفه و الناقة متوسطه الزين يضربها
لآن الناقه الرديه يبي يصير انتاجها ردي وينسب للبعير

مافيه مانع من الضراب

ياليت كل الناس مثل واحد من الرجاجيل اضربت عنده العام الماضي والله ياهو يفرح إذا شافك ويستبشر
وبعيره ماشاء الله طيب الله يرزقه منه البكار الغوالي


وفيه شيء آخر بعض الأخوان ما يمنع ولاكن يضرب لك بنفس رديه تقل مغصوب على شان كلام الناس
هذا والله اني ودي ما اضرب منه ابد والله اني لآضرب بالبعير ابو خمسة الاف ولا اضرب عنده